ЗЕРДЕЛІ ҒАЛЫМ, ЗИЯЛЫ ТҰЛҒА
Тілектес ЕСПОЛОВ,
Қазақ Ұлттық Аграрлық университетінің ректоры,
ҰҒА Вице-президенті, академик
Адамның адамгершілігі мен ізгі қадір-қасиеттері оның жан дүниесінің тазалығында, бекзат болмысында, адалдығы мен қайраткерлігінде. Қандай істе болсын, ел үшін қызметін аянып қалмайтын, білімі мен парасатын, сүбелі сөзі мен зерделі ойын, күш-жігері мен ерен еңбегін ел игілігі үшін жұмсайтын жандар қашан да сый-құрметке лайық. Шығыстың ұлы ойшылы Жүсіп Баласағұн: «Адамның мәңгі болмағы, оның ары мен ел үшін еткен еңбегінде», – деген екен. Өзінің барлық саналы ғұмырын туған халқының болашағына арнап, осы жолда талмай қызмет еткен қайраткерлеріміз аз емес. Солардың бірі әрі бірегейі – ғалымдық пен қайраткерлікті ұштастырған, елінің ардақты азаматы, зерделі ғалым, зиялы тұлға, Қазақстан Республикасы Ұлттық Ғылым академиясының президенті Мұрат Жұрынов. Қашан да «халқыма не бердім» деп атқарған еңбектерін бағамдап, өткенді талғам таразысына салып, саралай білетін академиктің егемен еліміздің ғылым саласында атқарып келе жатқан қалтқысыз қызметі мен еңбегі орасан.
Қазақстан ғылымының қарашаңырағы – Ұлттық Ғылым академиясында Мұрат Жұрынұлымен ғылым жолында қанаттаса, қатарласа, тығыз қарым-қатынаста бірге қызмет етіп келе жатқандықтан ұстаз-академик ағамызды тек өнегесі мол ғалым ретінде ғана емес, кең жүректі, ықыласы ауған адамға жан сарайын жайып салатын, айналасына жанашыр, қадірлі аға, сенімді дос, айнымас бауыр бола алатын ерекше қабілет-қарымы арқылы етене тани түстім. Қашанда ақыл-кеңесін, қамқорлық-көмегін аямайтын ағамыз – ойы салмақты, сөзі – құнарлы, мінезі – сырбаз, ақкөңіл, жаны жомарт азамат. Өз басым өмір өткелдері мен ғылым жолында Мұрат Жұрынұлы сынды, көрген-білгені мен көкірегіне түйгені мол, кеңпейіл азаматтың қолдауын үнемі сезініп келемін.
Әрдайым айналасына шапағатын тигізіп жүретін өнегелі ғалым бүгінгідей биік белеске өзіне тән ізденімпаздықтың, табандылық пен айрықша ерік-жігердің арқасында жетті. Ол өз бойындағы тектілікті ата-анадан алған тамырлы тәрбиемен, туған жерден дарыған қасиеттермен нәрлендіре түсіп, өмір мектебінде шыңдалып, халқына шынайы берілген тұлғалы азаматқа айналып, ғылымның үлкен тұғырына көтерілді. Мұрат Жұрынұлы интеллектуал тұлға ретінде, еліміздің білім-ғылым саласының заманға сай дамуына ықпал етіп, біліктілігінің арқасында бірнеше буын шәкірт тәрбиелеп, тәжірибелі ғалымдар мектебін қалыптастырды. Отандық ғылымның жаңа бағытта өркендеуіне өлшеусіз үлес қосып жүрген академиктің еңбектері Тәуелсіз мемлекетіміздің ғана емес, алыс-жақын шет елдердің ғылыми ортасында да мойындалып, жоғары бағасын алып, әр жылдары мемлекеттік, халықаралық деңгейдегі беделді де құрметті атақтар мен марапаттарға лайық деп танылуда.
Еліміз Тәуелсіздік алған алғашқы жылдарынан бері Ұлттық Ғылым академиясы көптеген қиындықтарды бастан өткерді. Заман ағымы өзгерген сайын ғылымға қойылатын талаптар да күшейіп, академия қызметі нарық заңдылықтарына тәуелді бола бастады. Осындай алмағайып кезеңде Мұрат Жұрынұлы өз табандылығының арқасында қазақ ғылымының қарашаңырағын сақтап қала алды. Жаңа заманның жаңа талаптарына сай академия жұмысына тың серпін берген Мұрат Жұрынұлы 2004 жылы еліміздегі ірі ұлттық университеттердің негізінде академия жанынан жаңа жасақталған Ғылым бөлімшелерін ұйымдастырды. Солардың ішіндегі өзім жетекшілік ететін Аграрлық ғылымдар бөлімшесі – Қазақ Ұлттық Аграрлық университеті негізінде құрылды. Қазіргі кезде университетіміздегі барлық ғылым, білім бағытындағы іс-шаралар ең алдымен аталған бөлімшеде талқыланып, одан кейін академияның ғылыми кеңесінде қаралып, содан кейін ғана университет аясында атқарылып келеді. Мұрат Жұрынұлының ауылшаруашылығы білімі мен ғылымына деген ықыласы ерекше. Тұлғалы ғалымның ұйытқы болуымен бүгінгі күні академия жанынан шығатын «Ұлттық Ғылым академиясы хабаршысы» деп аталатын үлкен ғылыми басылымда «Аграрлық ғылым» сериясы бойынша ғылыми материалдар жарияланып келеді. Бұл ретте біздің әр бастамамызға, әрбір ұсыныстарымыз бен ғылыми жобаларымызға Мұрат Жұрынұлы тікелей қолдау көрсететіндігін, ғылыми басқосулар мен маңызды жиындарымызға қатысып отыратындығын ерекше айтқым келеді.
Академия тарапынан үнемі қолдау тауып келе жатқан Қазақ Ұлттық Аграрлық университеті бүгінгі күні 85 жылдық терең тарихы бар, экономиканың аграрлық секторы үшін мамандар дайындайтын, Қазақстан мен Орталық Азиядағы жетекші жоғары оқу орны болып табылады. 2001 жылы Мемлекет басшысының Жарлығымен Ұлттық статус иеленген оқу орнымыз бүгінгі күні Ұлттық зерттеу университетіне трансформациялануда. 2010 жылдан бастап университет инновацияға бағытталған аграрлық жоғары оқу орны статусын алды. Қазіргі таңда ауыл ша-
руашылығын дамытудағы әлемдік озық үлгілерді зерттеуде, оны насихаттап, Қазақстан жағдайына сәйкестендіруде университет ғалымдары Мұрат Жұрынұлы басқаратын Ұлттық Ғылым академиясымен тығыз қарым-қатынаста, әріптестік жағдайында аянбай еңбек етіп, нәтижелі жетістіктерге жетуде.
Қарапайым ауыл балалары білім алатын университетіміздің базасында биылғы жылы «Агротехнологиялық хаб» өз жұмысын бастады. Ол мемлекеттің және жеке меншік сектордың қорларын бір арнаға шоғырландырып, оны ел үшін пайдалы, перспективасы жоғары, бәсекеге қабілетті жобаларға бағыттауға жаңа жол ашуда. Бұл бірегей хаб еліміздегі агроөндірістік технологиялар трансферті мен ғылыми-зерттеу нәтижелерін коммерцияландырудың алаңы болып табылады. Ұлттық Ғылым академиясымен тығыз байланыс орнатқан Агротехнологиялық хаб құрылымына: университет жанындағы ауылшаруашылығы ғылыми-зерттеу қоры, технопарк, ғылыми-зерттеу орталықтары мен зертханалар, бизнес-инкубатор кіреді. Біздің студенттеріміз, магистранттар мен докторанттар осы үрдіске тікелей қатысып, аграрлық секторда өз ғылыми жұмыстарын дамытуда. Агротехнологиялық хаб жобасын жасау барысында академик Мұрат Жұрынұлы еліміздің Ауыл шаруашылығы министрлігіне арнайы ұсыныс жасап, хаб негізін қалаушы зерттеу орталықтарын құру әлем талабы екенін айтып, осы арқылы отандық агроөндірістік кешенді инновациялық бағытта дамыту қажеттігіне зор сенім білдірген болатын. Бүгінде осындай бірегей материалдық-техникалық база университеттің жаһандық деңгейде зерттеулер жүргізуіне мүмкіндік береді. Бұны шетелдік жетекші жоғары оқу орындары мен ғылыми-зерттеу орталықтарының сарапшылары растап, оң бағасын берді. Біздің әрбір ісімізді әрдайым қолдап жүретін Мұрат Жұрынұлы оқу орнымыздың Ұлттық зерттеу университетіне трансформациялану үрдісі бойынша оқу-тәжірибелік, өндірістік-техникалық кешенді жаңғыртуға қатысты бағдарламаларымызға да ұтымды ұсыныстарын енгізіп, тікелей көмек көрсетіп келеді.
2014 жылдың қараша айында Елбасының жеке қабылдауында болар алдында Ұлттық академияның Аграрлық ғылымдар бөлімшесі мүшелерімен бас қосып, айтар ұсыныстарымызды талқылап, академия басшысы Мұрат Жұрынұлын университетімізге арнайы шақырып, ақылдасып, ұжыммен пікірлескен едік. Осындай маңызды кездесу алдында тұлғалы академиктен үлкен қолдау таптық. Елбасы кездесуінен кейін ауыл ша-
руашылығы саласында ғылым, білім және өндіріс интеграциясын дамыту туралы нақты тапсырма алғаннан соң да Мұрат Жұрынұлымен алдағы атқарар іс-шараларымызды, жүзеге асыратын бағдарламаларымызды жоспарлап, кеңестік. Нәтижесінде 2015 жылы Елбасының шешімімен, Ауыл шаруашылығы министрлігінің жанынан «Ұлттық аграрлық ғылым-білім орталығы» ашылды. Аталған орталық аграрлық университеттер мен ғылыми-зерттеу институттардың, шаруашылықтар мен өндірісшілердің, ғылым мен бизнес құрылымдарының өзара ықпалдастығын күшейтуге серпіліс беруде.Бұл бағыттағы жұмыстарымызға да Мұрат Жұрынұлы ерекше көмегін көрсетті. Ұлттық Ғылым академиясымен бірлескен жүйелі жұмыстың нәтижесінде аталған орталық құрамына 23 ғылыми-зерттеу институты, 14 тәжірибелік станциясы, коммерцияландыру мен білім беру және білім тарату орталықтары және 3 аграрлық жоғары оқу орындары кірді. Бүгінде еліміздегі 3 жетекші аграрлық жоғары оқу орындарының базасында агроиндустриалдық кластерлер құрылды. Қазақ Ұлттық Аграрлық университеті базасында «Оңтүстік және оңтүстік-шығыс» кластері, Сәкен Сейфуллин атындағы Қазақ аграрлық-техникалық университеті базасында «Солтүстік» және Жәңгір хан атындағы Батыс Қазақстан агротехникалық университеті базасында «Батыс» кластері құрылды. Бұл агрокластердің мақсаты – ауыл шаруашылығында қордаланып қалған мәселелерді шешу.
Зерттеу орталықтары мен агрокластерлерді құру арқылы біз Ұлттық Ғылым академиясының Ауыл шаруашылығы бөлімшесінің академиктерінің, аграрлық саладағы ғылыми-зерттеу институттары мамандарының, көрнекті ғалымдардың мүмкіндіктерін бір орталыққа шоғырландырып, заманауи міндеттерді бірлесіп шешуге жол аштық. Ең бастысы, аграрлық бағыттағы университеттер мен ғылыми-зерттеу орталықтары автономиялық бағыттарын жетілдіріп, заман талаптарына сай өзін-өзі басқару және өзін-өзі қаржыландыру мүмкіндігіне ие болып, академиялық еркіндікке қол жеткізді.
Әлемдік қауымдастық мойындаған академиктің ғылыми қызығушылығының ауқымы өте кең, өндіріске енгізген жаңалықтары да мол. Қайраткер ағамыздың ғылыми қызметінен бөлек, азаматтығын, қоғам жанашыры ретіндегі қызметін де айрықша атап өтуге лайық. Бүгінгі күні Қазақстан Республикасы Ұлттық Ғылым академиясы құрамына Қазақстанның ең алдыңғы қатарлы ғалымдары – Академияның толық мүшелері (академиктер) және корреспондент-мүшелері кіретін республикалық қоғамдық бірлестік болып табылады. Академия құрамында: 140 академик және 110 корреспондент-мүшелері, 17 шетелдік және 78 құрметті мүше бар. Академияның Аграрлық ғылымдар бөлімшесінің өзінде 44 академик бар.
Қазіргі кезде Ұлттық Ғылым академиясының академиктері отандық, халықаралық ғылыми жобалар мен бағдарламаларға, ғылыми жаңалықтарға арнайы сараптама жүргізуге мүмкіндік алды. Бұл да академия басшысының еңбегі. Мұрат Жұрынұлы әр уақытта Академияның әр мүшесіне, ғылыми-зерттеу институттары мен шаруашылықтардың мерейтойларына ерекше кұрмет-көңілмен қарап, олардың ғылыми ізденістеріне дем беріп, игі іс-шараларын атап өтуге, кітаптарын шығаруға, ғылыми атақ-дәреже алуына үнемі қолдау білдіріп жүреді. Академия мүшелері қандай да бір жағдайға душар болып, науқастанып қалса да маған хабарласып: «–Тілектес бауырым, қадірлі ағамыздың шаңырағына барып, хал-жағдайын біліп, көңілін сұрап қайтайық», – деп ниет білдіріп отыруының өзі Мұрат Жұрынұлының ізгілігі мен кеңпейілдігін көрсетеді.
Еліміздің ауыл шаруашылығы білімі мен ғылымына айрықша еңбек сіңірген, бүгінде дүниеден өткен Хайдар Арыстанбеков, Зейнолла Қожабеков, Қасым Асанов, Қилыбай Медеубеков, Ғазиз Тәшенов, Серік Мұхамеджанов, Виктор Вернигор, Лесбек Сейітбеков, Иса Қыпшақбаев, Мұхтар Алшынбаев, Рашид Қуатов сынды көрнекті ғалымдарымызды ақтық сапарға шығарып салу, қырық күндігі мен жылдық асын беру, артында қалған ғылыми мұраларын жинақ етіп шығару сияқты сауапты істерде Мұрат Жұрынұлы адал жүрек, шын ниетімен кірісіп, марқұмдардың отбасыларына барынша демеу болып, көмек қолын аянып қалған емес. Мұндай иманды қасиеттер кез келген адамның бойынан табыла бермейді.
Өткен жылдың ақпан айында еліміздің бас газеті – «Егемен Қазақстан» басылымында ауылдың әлеуметтік-рухани мәселелерін қозғаған «Ауыл – алтын тамыр» атты көлемді мақалам жарық көргенде алғашқылардың бірі болып үн қатып, ойыма ой қосып, пікірімді қолдаған Мұрат ағамыз: «Бүгінгі жаһандануға бет бұрған әлемде руханиятымызды дамытып, ауылды сақтау – ел мен жерді сақтаудың ата-бабаларымыз көрсеткен дана жолы деп қабылдауымыз керек. Ауыл шаруашылығының қайнар көзі – қарапайым ауылда. Ауыл зиялыларын қалыптастыру ісі – ел іргесінің тірегін нығайту үшін жасалып келе жатқан қадам», – деген өнегелі сөзін айтқан болатын. Шынында да «туған жер, ауыл, ел» десе Мұрат ағамыздың ықылас, пейілі тіпті ерекше. Дана халқымыз: «Әркімнің туған жері – Мысыр шаһары» деген. Бұл, әрине, туған жердің қадір-қасиетін көрсетуден, дәріптеуден туған теңеу. Ордалы Оңтүстіктің Арыс қаласында дүниеге келген академик Мұрат Жұрыновтың өмірге, оқу-білімге, терең ғылымға, еңбекке деген көзқарасының қалыптасуы осы туған жерден бастау алады.
Мұрат Жұрынұлының, әсіресе, ізденіс жолында жүрген жас ғалымдарға деген ықылас-пейілі ерекше.Ел ертеңі білімді жастардың қолында. Болашағымыз жарқын, ұрпағымыз білімді, салиқалы болсын деген мақсатпен ғылымды тиімді басқарып, ұтқыр ұйымдастырушылық қабілетімен өзіндік үлесін қосып келе жатқан академик Мұрат Жұрынұлы қоғамдық өмірге белсене араласып, отаншыл рухы биік, зиялы азамат ретінде де үлкен мінберлер мен ақпарат құ-
ралдарында ұлттық, елдік мәселелер турасында адал пікірін айтып, елдің сөзін сөйлеп, қайраткерлік болмысынан тайған емес. Іскер азамат ретінде қаншама басшылық қызмет атқарса да, әрдайым адамгершілік, қарапайымдылық, кішілік сияқты айрықша қасиеттерді бірінші орынға қойған тұлға.
Жас кезінен ғылым-білімге құштар болып, зерек қасиеттерімен өз ортасынан озып, қатарының алды болған Мұрат Жұрынов небары 39 жасында профессор атанған адам! Отандық ғылымды өрге сүйреп жүрген ғалым бүгінде беделді академик, еліміздегі ең алғашқы халықаралық мемлекеттік университеттің негізін қалаушы, химия өндірісі бойынша әлемді мойындатқан әдістің авторы, соңынан ерген талай шәкірттің нағыз ұстазы бола білген тұлға, отбасы мен үлкен бір әулеттің тірегі.
Ауылшаруашылығы білімі мен ғылымының қарашаңырағы – Қазақ Ұлттық Аграрлық университетінің профессор-оқытушылары мен білім алушы жастары жаңашыл, білгір, отаншыл, еліміздің әлемдік қауымдастық алдында беделін көтеруге айрықша үлес қосып жүрген осындай терең ойлы ғалым, қайраткер азаматты мақтан етеді. Академиктің отандық ғылымының өркендеуіне қосқан үлесі мен мол тәжірибесі, біліктілігі мен талапшылдығы, азаматтығы мен парасаты кейінгі буынның жас ғалымдарына, ізбасар-шәкірттеріне үлкен үлгі-өнеге.
Бүгінгі күні мерейлі 75 жастың биік белесіне көтерілген Мұрат Жұрынұлын елге адал қызмет етіп жүрген ұлтымыздың ұлағатты ұлы, әлі де тың күш-жігермен ғылымға берері көп зерделі ғалым, зиялы тұлға деп білемін. Бұл белесті бағындыру – үлкен бақыт. Сондықтан университет ұжымының, еліміздің агроөнідірістік кешенінде қызмет атқарып жүрген барша ғалымдардың, қарапайым еңбек адамдары мен ауыл шаруашылығы мамандығын игеріп жүрген жастардың атынан қазақ ғылымын өрге сүйреп жүрген қадірменді тұлғаға ұзақ ғұмыр тілейміз.
ПІКІРЛЕР1