ҚР Мемлекеттік Орталық музейінде Алматы қаласының 1000 жылдығына арналған «Алматы – ғасырлар куәсі» атты көрме өтті. Көрмені Орталық музей Алматы қаласының әкімдігімен бірлесіп ұйым­дас­тырған. Халықаралық ЮНЕСКО ұйымының шешімімен Алматы қаласының 1000 жылдығы 2016 жылдағы мерейтойлық күндер тізіміне енгізілгені белгілі.

Алматы және Алматы өңірінің (Жетісу) Қазақстан тарихындағы орны ерекше. Ал­ма­тының мыңжылдық тарихы жайлы сөз қоз­ға­ғанда археологтар  ғылыми ортада қалып­тасқан қала деген түсінікке сай әкімшілік билік, қолөнер мен сауда орталығы қалыптас­қан ке­зеңді алға тартады.

Көрменің мақсаты – Алматының ежелден, сонау – қола дәуірі, ерте темір, орта ғасырлар, XIX ғ. (Верный қ.) кезеңдерден бүгінгі күнге дейінгі қалыптасу, даму, өркендеу жолын көрсету, яғни өткенді және бүгінгіні саралап, көрерменнің болашақты бағамдауына ықпал ету.