«ӨТКЕНГЕ ТАҒЗЫМ – КЕЛЕР ҰРПАҚҚА АМАНАТ»
03.06.2016
1034
0

Голод25 мамырда «Ғылым Ордасының» кітапханасында Әділет қоғамының қатысуымен аштық пен қуғын-сүргін құрбандарына арналған «Өткенге тағ­зым – келер ұрпаққа аманат» атты ғылыми-тәжірибелік конференция өтті.

Айтулы шараның шымылдығын Ал­маты қаласы Тілдерді дамыту басқар­ма­сының бастығы Мамай Ахетов ашты. «Өт­кенге салауат айтып, дұға бағыш­тау­ды дәстүрге айналдырдық», – деп сөз бастаған  басшы жиынға қатысу­шы­лар­дың барлығына ыстық лебізін білдірді. Тарих және этнология институтының бас ғылыми қызметкері Қайдар Алда­жұ­манов тарихтың тереңінен сыр шер­тіп, аштық тақырыбын зерттеу барысын­да кездескен жантүршігерлік оқи­ғалар жайында да айтып өтті. Қырғыздың Тоқ­мақ деген қаласында төрт қазақ ке­лін­шек жиырма күн бойы бала жегені ту­ралы да азапты жылдардың енді қай­тып келмеуі үшін, өткеннің қиянаты мен қасіретін еш ұмытуға болмайтынын сөз етті. Ашаршылық жылдарындағы қиын-қыстау кезеңнің қиыншылығын сөзбен суреттеген Қ.Алдажұмановтың баяндамасы өткеннің мұңын шерткендей болды. Қуғын-сүргіннің қасіретін баяндаған Әділет қоғамының басқарушы мүшесі Б.Қойшыбаев сөз соңында қазір­гі таңдағы жас ғалымдарды осындай күрмеуі көп мәселеге атсалысуға ша­қыр­ды.

Рахила ОРАЗҒАЛИЕВА.

 

ПІКІР ҚОСУ