Өткен жұмада Астана қаласындағы Ұлттық академиялық кітапханада Түркі мәдениеті және мұрасы қорының ұйымдастыруымен және Түркі академиясының қолдауымен академик Дархан Қыдырәлінің әзербайжан, түрік және қырғыз тілдерінде шыққан «Тасқа жазылған тарих», сондай-ақ орыс тілінде жарық көрген «Тюркский мир: через призму истории», түрік тілінде шыққан «Kod adı Turkistan: Mustafa Gokay» атты кітаптарының тұсаукесер рәсімі өтті.
Түркі мәдениеті және мұрасы қо­ры­ның президенті Ақтоты Ра­йым­құлова, Әзербайжан Респу­бли­ка­сының мәдениет министрі Адил Кари­мли, Қырғыз Республикасы Президентінің кеңесшісі Аслан Койчиев, Қазақстан Республика­сы Президентінің кеңесшісі Бауыржан Омаров, Азия кеңесінің бас хатшысы Қайрат Сарыбай, елі­міз­дегі Қырғызстан, Мажарстан, Түр­кия, Түрікменстан, Өзбекстан Респу­бликаларының төтенше және өкілет­ті елшілері, TURKSOY халықара­лық ұйымының өкілдері, мемлекет және қоғам қайраткерлері, ғалымдар мен зиялы қауым өкілдері қатысқан алқалы жиында академик Дархан Қуандықұлының түркі дүниесіне ор­тақ бай мұраны зерттеп-зер­делеу, сақ­тау істеріне және бауыр­ластық бай­ланыстарды нығайтуға қосқан зор үлесі атап өтіліп, оқырманға жол тарт­қан жаңа кітаптар туралы орамды ойлар, пайымды пікірлер ортаға түсті.
Айта кетейік, академик Д.Қы­дыр­әлі­­нің осы жиында таныс­ты­рылған «Kod adı Türkistan: Mustafa Çokay» атты деректі ғұмырбаяндық кітабы бұған дейін де бірнеше тілде жарық көріп, оқырман тарапынан өз бағасын алған туынды. Бұл жолы түркиялық оқыр­мандардың сұра­ны­сына орай, Анкарадағы «Bengü» баспасынан қайта басы­лып шықты.