28 қаңтарда Ғабит Мүсірепов атындағы Қазақ мемлекеттік академиялық балалар мен жасөспірімдер театрында белгілі жазушы Кәмила Құдабаеваның шығармасының желісімен жазылған «Жаңбыр бейне» қойы­лымының премьерасы өтті.

Аншлагпен өткен қойылымда қыз баланың жан дүниесі, адамның сан алуан сезімі жаңбырмен астаса отырып ашылған. Спектакльдегі әйел тағдыры, әйел жан дүниесінің табиғатпен үйлесе образдалуы көрермен қауымның көзіне жас келтірді. Әйелдің көз жасынан мөлдір дүние жоқ шығар бұл дүниеде… Басты рөлде ойнаған Ділдәбек Талшынның бейнесі көз алдымызға жазушы, марқұм Кәмила апайдың өзін қайта тірілтіп әкелгендей болды.
Фархат Молдағалидың режиссерлығы­мен, Ернар Амандықтың музыкалық әрлеуі­мен сахналанған қойылым көрер­мен­ге ерекше әсер етіп, жаңбыр суымен тазарт­қандай күй сыйлады.