Қазақстанның халық жазушысы, Мемлекеттік сыйлықтың лауреаты, қоғам қайраткері Олжас Сүлейменов ресми іс-сапармен Анадолыға  барып қайтты. Алғашқы сапары  Түркияның Ерзурум қаласынан басталды. Түркілікті ту етіп, ежелгі дәстүрмен өмір сүріп отырған ерзурумдықтардың тыныс-тіршілігімен, өңірдің көне тарихымен танысты. Селжұқ­тардан қалған ескерткіштерді көріп, көне жазбаларды бүгінгі күнге дейін сақтап келген  Ататүрік университетінің шәкірттерімен кездесіп, ежелгі түркі мәдениеті мен өркениеті тақырыбында дәріс оқыды.

Ақынның  80 жылдығына орай өткен салтанатты шараға Қазақстанның Түр­кия­дағы елшісі Жансейіт Түймебаев, Халы­қаралық ТҮРКСОЙ ұйымының Бас хатшысы Дүйсен Қасейінов, Ерзурум қаласының губернаторы Ахмет Алтыпармак, Түркияның зиялы қауым өкілдері мен журналистер, Ататүрік университетінің ұстаздары мен шәкірт­тері қатысты.

Ататүрік университетінің ректоры Х.Кочак өз сөзінде ақын О.Сүлейменов­тің түркі мәдениеті мен өнеріне, ғылым мен әдебиетіне сіңірген еңбегін, түркі жұртшылығының бірлігі мен ынтыма­ғын сақтау жолындағы қайраткерлігін ег­жей-тегжей баяндап берді. Ерзурум қа­ласы­ның губернаторы А.Алтыпармак: «Ерзурум қаласына орыстың ұлы ақыны А.С.Пушкин келіп, «Арзрумға саяхат» атты кітап жазды. Бүгін түркі дүниесінің мақтанышы, аты аңызға айналған ақын Олжас Сүлейменов Ерзурумға келіп, мерейі­мізді өсірді. Ақынның Әзербай­жан­да көрсеткен ерлігін біздер еш уа­қыт­та ұмытпаймыз. Түркі мәдениеті мен әдебиетінің мерейі үнемі үстем болсын!» – деп ерзурумдықтардың атынан құт­тықтады.

Қазақстанның Түркиядағы елшісі Жансейіт Түймебаев қоғам қайраткері О.Сүлейменовтің Қазақстан Республикасы Тәуелсіздігінің орнығуына, әрі кү­шеюіне қосқан үлесін, сондай-ақ, дип­ломатия саласында атқарған ерен еңбегін атап өтіп, Қазақ елінің атынан Ерзурум қаласы мен университет басшыларына алғыс сөзін жеткізді. Салтанатты жиынның аяғында алғыс сөзін жеткізген О.Сүлейменов Ерзурум қала­сы­ның губернаторы мен Ататүрік уни­вер­ситетінің ректорын «Невада-Семей» қозғалысының 25 жылдық медалімен марапаттады.

Ежелгі түркі, мысыр, қытай мәдение­тін, соның ішінде, көне жазба тілдерін зерттеп жүрген ақын  Ерзурумдағы кездесулерден кейін ат басын Байбурт қала­сына бұрды. Шығыс Анадолының асқар тауы – Коптың биік асуларынан өтіп, ежелден «Бай жұрт» деп аталатын қалаға жетті. Қонақтарды құшақ жая қарсы алған Байбурт қаласының мэрі Мете Мемиш ақынға естелік сыйлықтарын тап­сырып, қаланың тыныс-тіршілігімен та­ныстырып, оғыз түркілерінің пірі Деде Қорқыттың кесенесіне алып барды.

Байбурт қаласынан Анкараға ұшып келген ақын Олжас Сүлейменов Түркия Республикасының Премьер-министрі орынбасары Тұғрыл Түркешпен кездесті. Жиын барысында екі бауырлас ел ара­сын­дағы саяси-экономикалық қарым-қа­тынас пен мәдениет және әдебиет сала­сындағы байланыс мәселелері тал­қыланды. Түркияның Премьер-минис­трі орынбасары қазақтың ақынына естелік сыйлығын тапсырып, құрмет көрсетті.

Ал Анкараның қақ ортасында ор­налас­қан Шератон қонақ үйінде Түркия­ның шығармашылық орталықтары мен қауымдастықтары бірігіп, ақынның 80 жылдығына арналған халықаралық  жиын өткізді. Басқосуды  Түркияның экс-министрі, қоғам қайраткері Намык Кемал Зейбек құттықтау сөзбен  ашты. Қазақстанның Түркиядағы елшісі Ж.Түймебаев пен ТҮРКСОЙ Бас хатшысы Д.Қасейінов құттықтау сөз сөйледі. Жиын барысында ақынға  Түркі дүниесі жазушылар мен өнерпаздар қорының тағайындаған «Түркі дүниесіне сіңірген ерен еңбегі үшін» сыйлығын, «Деде Қор­қыт» қорының тағайындаған «Деде Қор­қыт» сыйлығын және Түркі халық­тары қауымдастығы тағайындаған «Түркілікке сіңірген қызметі үшін» сый­лы­ғын тапсырды.

Халықаралық ТҮРКСОЙ ұйымының штаб-пәтеріне арнайы келген ақынды Түркияның мәдениет және өнер қайрат­керлері қарсы алды. Кездесу барысында ТҮРКСОЙ-дың ұйымдастыруымен, Қазақс­танның Түркиядағы елшілігі мен Қазақстан Жазушылар одағының қол­дауы­мен он түркі тілдерінде (әзербайжан, башқұрт, қазақ, қырғыз, құмық, өзбек, та­тар, түрік, тыва және ұйғыр) жарық көр­ген ақын О.Сүлейменовтің жыр жина­ғының тұсаукесері өтті. Жинақты құрастырған Қазақстанның ТҮРКСОЙ-дағы өкілі Мәлік Отарбаев. Басқосуға Шанаққала қаласынан арнайы келіп қатысқан әзербайжан ақыны Мамет Ысмайыл О.Сүлейменовтің «Қыш кітабын» түрік тіліне тәржімалаған­ды­ғын жеткізді.

Еуразия Жазушылар қауым­дас­ты­ғына барып, түрік қаламгерлерімен кез­дескен О.Сүлейменов Түркиядағы әдебиеттің жағдайымен әрі Сүйінбай, Қ.Аманжолов, Б.Соқпақбаев, Ш.Мұр­таза сынды қазақтың белгілі ақын-жазу­шыларына бірнеше санын арнаған «Кардеш калемлер» журналының жұмы­сымен танысты. Журналдың соңғы саны О.Сүлейменовтің 80 жылдығына орай жарық көрді. Журналға Елбасы Н.Назар­баевтың, Елші  Ж.Түймебаевтың, ТҮРКСОЙ Бас хатшысы Д.Қасейінов­тың, әзербайжан жазушысы Анардың және тағы басқа түрік қаламгерлердің Сүлейменов шығармашылығы мен қайраткерлігі турасында жазылған материалдар енген. Қаламгердің  келесі кездесуі Қазақстанның Түркиядағы елшілігінде өтті.

Түркияда өткен төрт күндік сапар   барысында туысқан  екі елдің  ара­сындағы  байланыс нығайта түскендей болды. Анадо­лы­лық­тардың қазақ ақынына көрсет­кен риясыз құрметі – Қазақ еліне, әде­биеті мен руханиятына көрсеткен құрметі деп қабылдадық.