Қыз тәрбиесі – ұлт тәрбиесі
![](https://qazaqadebieti.kz/wp-content/uploads/2024/03/WhatsApp-Image-2024-03-28-at-14.25.32-300x167.jpeg)
Қыз баланың тәрбиесі ата-анаға ғана емес бір ұлтқа сын. Ұлы бір әулеттің қамқоры болса, қыз баласы бүкіл ұлттың шырақшысы екенін әу бастан-ақ біздің бабаларымыз дәлелдеп кеткен. Сондықтан қыз баланың тәрбиесіне салғырт қарамай, басқа шаңырақтың болашақ анасы болатындықтан, бар ыждаһатпен назар аудара білуіміз қажет. Міне, осындай үлкен мақсатты ұстанған кездесу ҚазҰҚПУ-нің кәсіби білім беру колледжінде өтті. Оқу орнынының сұранысымен өткен кездесуге «Сенімен болашақ» республикалық ата-аналар қоғамдық бірлестігінің Алматы филиалы бойынша өкілі Меруерт Мәулетқызы және сарапшысы, педагог, педагогика ғылымының кандидаты, Әл-Фараби атындағы ҚҰУ қауымдастырылған профессоры, «Қазақ аруы» арнайы курсының тұжырымдамасын жасаған автор Сараш Қоңырбаева қатысты. Колледж директорының тәрбие ісі жөніндегі орынбасары Әйгерім Нұрахынқызы ашып, мақсатын түсіндірген іс-шарада бірлестік өкілі ұйымның мақсатымен таныстыра отырып жұмысты ілгерілету бағытындағы жобаларға, нақты жұмыстарға тоқталып өтті.
![](https://qazaqadebieti.kz/wp-content/uploads/2024/03/WhatsApp-Image-2024-03-28-at-14.26.10-300x159.jpeg)
Ал негізгі тақырып бойынша спикер болған Сараш Сахиқызы бұрынғы бабалар ұстанған тәрбиенің бүгінгі жолына, бағытына тоқталды. Бүгінгі бойжеткен ертең бір ұлттың ұрпағын жалғастыратын ана болатындықтан қыз бала өзін-өзі ұстауына, болмысына бас мән беру керектігін жеткізді. Ару, қылық деген сөздерге талдау жасай отырып, алшақтап бара жатқан ұлттық негізді жіктеп берді.
![](https://qazaqadebieti.kz/wp-content/uploads/2024/03/WhatsApp-Image-2024-03-28-at-14.29.24-300x233.jpeg)
Ұрпақ тәрбиесіндегі бабалар даналығы бүгін аса қажет дер едім. Өз тәуелсіздігімізді алсақ та, заманның құбылып тұрған шағында батыстың бейәдеп әдет-ғұрпы жастарымыздың бойына сіңіп жатқанын жоққа шығара алмасақ керек. Егер өнегелі тәрбиенің өзегі бүгін жасалмаса, ертең ұрпағымызды тәрбиелейтін қыз балаларымыз өз ошағынан алшақтап қалмасына кім кепіл?! Сондықтан ұлттық әдет-ғұрып, салт-сана құндылықтарын сіңіре отырып, қыз балаға болашақ ана, шаңырақтың ырысы мен берекесі екенін ұғындыру аса маңызды болар еді, — ой түйіндеткізген спикерге қатысушылар сұрақтарын қойып, ашық пікірталас жасады.
![](https://qazaqadebieti.kz/wp-content/uploads/2024/03/WhatsApp-Image-2024-03-28-at-14.30.06-288x300.jpeg)
Кездесуді қорытындылаған директордың оқу-әдістемелік жұмыс жөніндегі орынбасары Нұргүл Әлімбекова қонақтарға алғысын айтып, өзге ұлттар таңдай қағып қарайтындай қазақ қызы сыртқы ғана емес ішкі жан-дүниесінің сұлулығымен, мәдениеттілігімен, әдептілігімен, ибалығымен өсе берсін деген ниетін білдірді.
Медина ТҰРСЫН