Жамбыл Жабаевтың туғанына 170 жыл толу мерейтойы қарсаңында жыраудың шығармашылық өмірін зерттеп, зерделеген бірнеше кітап жарық көріп жатыр. Олардың әрқайсысынан ақын шығармашылығының әр қырын тануға болатындай. Абай атындағы ҚазҰПУ-дың «Ұлағат» баспасынан жарық көрген қос кітапта да Жамбыл Жабаевтың шығармашылығына арналған.

Жамбыл Жабаевтың «Таңдамалы шығармалар: өлеңдер-дастандар, айтыстар» жинағының жалпы редакциясын басқарып, жинақты құрастырған: филология ғылымдарының докторы, профессор Бекен Ыбырайым. Бұл жинақта авторлық ауызша поэзияның алып тұлғасы – Жамбыл Жабаевтың әр жанрдағы шығармалары іріктеліп енгізілді.

Ал «Жамбылдың әзілдері» жинағына Жәкең­нің қалжың өлеңдері мен естеліктерден, мақа­ла­лардан алынған әзілдері енгізілді.

Бірде қара сөзбен, бірде өлеңмен жеткен Жамбыл юморының көркемдік кестесін, зер-нақыш­тарын, суырыпсалма  ақындық өнердегі зергерлікті зейін қойып зерттеуге, жанрлық ерекшеліктерін (күл­діргі әңгіме, анекдот, т.б.) айқындау – қазақ әдебиетінің тарихын, әсіресе, авторлық ауыз әде­биетінің поэтикасын байыптау – ұлттық рухани қазынамызды тану мен түгендеу контексінде күр­де­лі де зәру мәселелердің бірі. Өз болмысымызды, байырғымыз бен болашағымызды пайымдауға мүм­кіндік берген тәуелсіздік кезеңінде мән-маңы­зы орасан зор.

Ж.Жабаевтың бұл шығармалар жинағында бұған дейін енгізілмей келген, айтылған жерде ша­шылып қалып қойған ұтымды сөздер, әзіл өлең­дер «Дастан ата» атты естеліктер жинағында, сонымен бірге, С.Бегалиннің «Жамбыл», Н.Төре­құлов­тың «Жүз жасаған бәйтерек», М.Жол­дас­бековтің «Асыл арналар» атты кітаптарынан, мер­зімді бас­па­сөз беттерінен іріктеліп төрт том­дық толық шығармалар жинағында жарық көр­ген.