ОЙЫНҚҰМАРЛЫҚ ОРҒА ЖЫҒАДЫ
08.11.2023
187
0

 Дүниежүзілік денсаулық сақтау ұйымының психикалық ауытқуға соқтыратын сырқаттар қатарына жатқызған дерттің бірі – ЛУДОМАНИЯ екен. Соңы сан соқтырып, орны толмас өкінішке ұрындырар бұл дерт соңғы жылдары елімізде дендеп, белең алып барады.  Соның ішінде  ел ертеңі болатын  өрімдей жастарымызды да шырмап, «қызығымен» құнықтырып, өз құрдымына тартып бара жатқаны алаңдарлық жағдай.   Букмекер­лік кеңселер мен тотализатор­лар­дың торына түскен жастарымыз тапқан-таянғанын жеңіл жолмен ақша табамын деп желге ұшырып жатыр. Құмар ойынның зынданына түскендердер күн санап артып бара жатқандықтан ойынқұмарлыққа қарсы күрес те күшейіп, залалы мен зардабын түсіндірген тәрбие жұмыстарына  ерекше мән беріліп келеді.

Осындай тәрбиелі іс-шара ҚР Ішкі істер министрлігіне қарасты М.Есболатов атындағы Алматы академиясында өтті. Академияның  офицерлік құрамы мен курсанттарының қатысуымен  өткен іс-шараға  «Сенімен болашақ» республикалық қоғамдық бірлестігінің мамандары шақырылды. Бірлестіктің журналисі Меруерт Мәулетқызы ұйым ұстанымы туралы тоқталып, бірлестік мамандары тарапынан лудомания  бойынша да жүйелі жұмыстар жүргізіліп жатқанын жеткізді. Ал бірлестіктің Алматы филиалы бойынша  сарапшысы, психолог Айгүл Исламбекқызы құмар ойынға шалдығудың факторларын, оның ішінде психологиялық факторларға тереңірек тоқталды. Лудоманияға тәуелділіктің алдын алу үшін қайтпек керек деген мәселені кеңінен тарқатты. Құмар ойынға қызығудың соңы неге апарып соғарын айтып, қып-қызыл отқа айналған құмар ойынға құмартпауға шақырды. Семинарға қатысушылардың сұрақтарына жауап беріп, пікірлерін тыңдады. Семинарды мағыналы тренингпен қорытындылап, балаларымызды,  достарымызды, жақындарымызды тәуелділіктен қорғап, қауіпсіз елге айнала білейік деген оймен түйіндеді.

Меруерт Мәулет,

бірлестік журналисті

ПІКІР ҚОСУ

Ваш адрес email не будет опубликован.

Пікір