«Тәуелсіздік» деген сөз қымбат болып тұрғанда, «әлем елдері өзара саналы түрде тәуелділік дәуіріне келуі керегі несі» дерсіз? Бұл – ақын Олжас Сүлейменовтің сөзі. Олжекеңнің ойлары біздің қоғамға кейде түсініксіз болып жататыны бар. Ақын бірде асып сөйлейді, бірде тасып сөйлейді. Алайда дәл осы сөзінің жаны бар. Өйткені – әлем тұтас. Ал тұтас әлемге үйлесімділік пен өзара тәуелділік керек.

Қазақстанның Халық жазушысы, ақын Олжас Сүлейменовтің бұл философиялық формуласы қазанның 26-сында Алматыда өткен Еуразия мәдениеттерін жақындастыру Халықаралық форумына негіз болды.
«Дүниежүзіндегі зорлық-зомбылық ошақтары, өркениеттер қақтығысы, идеологиялық діни көзқарастар – мұның бәрі тұтас жалпыға ортақ адамзаттық сананың жоқтығынан», – дейді сарапшылар.
Қазақстан, Испания, Үндістан, Франция, Түркия, Ресей елдерінің озық ойлы өкілдері «Әлемдегі мәдени сәйкестік», «Өзара тәуелділік мәдениетін дамытуға арналған білім» тақырыптары төңірегінде ой бөлісті.
Мәдениеттанушы Мұрат Әуезовтің ойын­ша, біз саналы түрде өзара тәуелділікке келуіміз қажет. Біз, әлем елдері бір-бірімізге тәуелді екенімізді терең түсінуге тиіспіз. Бірақ бұл бастама саналы, мәдениетті түрде, өзара тепе-теңдік ауқымында жүргізілуі керек.
«Бүгінгі жиынды планетарлық сананы қалыптастыруға жасалған игі қадам дер едім», – деп ойын түйіндеді Мұрат Мұхтарұлы.