---

Сахна тынысын жетік меңгерген Аман Бе­кенұлы қойылымға шығатын әрбір спек­такл­ьдің кілтін кілтипансыз тауып, сәйкес құбылыстармен құлпыртып шығарады. Сол шеберлік көрерменнің жүрегіне әсерлі­лігі­мен жылылық ұялатады. Тоқетері – театр атау­лы пластикасыз алға баса алмайды. Осы өнерімен ресейліктерді де мойындатқан оны ондағы театр шеберлері аса құрмет тұ­тады. Соны байқағанда: «Мәскеуліктер мен Санкт-Петербургтегі театр мектебі де, Аман ағайды жақсы біледі екен ғой», – деп масаттандық.

Өзінің қызметі мен міндетін терең жа­уап­кершілікпен сезінетін Аман Бекенұлы жет­­пісінші жылдардың басында Алматыдағы Құр­манғазы атындағы Өнер институтының «Дра­ма театры және кино актері» бөлімін ойдағыдай тәмамдаған соң алғашқы еңбек жо­лын осындағы «Актер шеберлігі» кафедрасында ұстаз болудан бастайды. Сол кез­дегі ка­федра меңгерушісі, ҚР еңбек сіңір­ген қай­раткері, профессор Р.М.Қа­ныбаева жә­не кафедраның ұстаздары, КСРО халық әр­тістері, профессорлар Ы.Ноғай­баев, Х.Бө­кее­ва, Ш.Жандарбекова, Ә.Мәм­бе­тов, Е.Диор­диев, Қазақстанның халық әр­тістері, про­­фессорлар А.Тоқпанов, Н.Жан­төрин, Г.Рут­ковская сынды ұлттық өнердің біртуар тұл­ғаларының сынағынан өткен Бекең ке­йін­тінде  осы оқу орнының ректоры қызметін де абыроймен атқарды.

Аман Құлбаевтың шығармашылық ең­бек­тері де ел ықыласына ерте бөленді. Атап айт­қанда, «Сыр мен сымбат монографиясы», «Актер шеберлігі», «Сахна қозғалысы пә­ні­нің негіздері, сахна сайысы оқулықтары» кітаптары күні бүгін оқу жүйесі бағдар­ла­ма­­сынан түскен емес.

Сәл шегініс жасар болсақ, Аман ағамыздың кәсіби үлкен сахнадағы тұң­ғыш қадамы үшінші курста оқып жүр­ген­дегі өндірістік практикасы кезінде-ақ бас­тау алған. Болашақ театр майталманы сол практикасын Алматы мемлекеттік Жасөс­пі­рім­дер мен балалар театры, (бүгінгі Ғ.Мүсірепов атындағы қазақ мемлекеттік академиялық Балалар мен жасөспірімдер театры) сахнасында өткізді. Онда ол ұлы жазушы Мұхтар Әуезовтің «Абай жо­лы» романы бойынша КСРО халық әртісі, Мем­лекеттік сыйлықтың иегері Шәкен Ай­ма­нов сахналаған «Жас Абай» спектакліне өзінің курстастарымен бірге қатысады. Сол бір қызықты күндерді ағамыз былайша ес­ке алады: «Сахнаның шымылдығы баяу сыр­ғып ашыла бергенде «сүйінші, сүйінші! Абай келе жатыр!» деп, айғай салып, ауыл аза­маттарын шақырып, сахнаға шығару ме­нің міндетім болды. Шәкен аға қолымнан ұстап: «Мына кулисаның жанына келіп, қо­лыңдағы қамшыңмен ауаны шеңбер жасай қуанышты дауыспен айғайлайсың. Қарама-қар­сы кулисаға жүгіріп барып тағы да соны қай­талайсың. Содан кейін ғана залға қарап жар салып ұрандайсың!», – деп режиссерлік нұсқауын айтты. Шәкен ағаны біз өте са­быр­лы, өз ісінің нағыз кәсіби маманы, театр­ға бар жанымен берілген биік өнер иесі ретінде танып, бағаладық. Аса білікті де шебер сахна, кино маманы болған ол кісі­ні сахна сәнін енді сезіне бастаған біз сияқ­ты жастар түгел пір тұттық. Ерекше тұл­ғалық қасиеттер ол кісінің бар болмысынан айқын көрініп тұратын. Ұлттық өне­ріміздің маңдайына біткен мұндай тұл­ғалар шоқтығы биік өнер жұлдызы әрине, сирек. Міне, жаратылысы бөлек осындай дара жандардың тәлімі мен өнегесін көріп, өнер биігіне талпындым.

Сахнадағы жолы сәтті басталған Аман Бе­кенұлы кейін, кино өнеріне де араласып, көп­теген фильмдерде эпизодтық рөлдерде ой­нады. Бұдан кейін режиссер Дамир Ма­набайдың «Кек» толықметражды көркем фи­льмінде ат үстіндегі және жаяу ұлттық қару­лармен шайқасатын каскадерлік трюктер қойылымдарын да өзін таныта білді.

Жетпісінші жылдардың аяғында «Музыка өнері және эстрада, хореография» фа­куль­теттері ашылды. Оның құрылуына және өмір­ге келуіне тікелей мұрындық болған осы академияның түлегі әрі профессоры Құл­баев Аман болатын. Аталмыш кафедра оқытушылары, студенттердің толық маманданып, көрнекті өнер қайрат­кер­ле­рінің тәжі­ри­белерін жинақтауына айрықша ықпалын тигізді. Осы акаде­мия­ның бұрынғы ректоры қызметін абыроймен атқарған, бүгінгі күні еліміздің Мәдениет және спорт министрі болып отырған, ұлттық өне­ріміз бен жалпы руханиятымыздың үл­кен жанашыры Арыстанбек Мұхамедиұлы Аман Құлбаевтың өнердегі орнын жоғары ба­ға­лаған еді.

Кімге болса да бір жерде табан аудармай жұмыс жасап, тұрақтылықтың үлгісін көр­сету оңай емес. Бұл жағынан алғанда Аман Бекенұлы Құлбаев қайсарлық пен қа­жырлық танытып 45 жылдан астам уа­қыт қызмет атқарды. Қазір академияның Театр өнері факультетінің деканы, ҚР ең­бек сіңірген қайраткері, өнертану ғылы­мы­ның кандидаты, профессор, академик Аман Құлбаевтың өнегесі мол өмір мектебі – біз­дердің тағылым орталығымыз.