Өткен аптада Алматы қаласындағы Оқушылар сарайында Алматы қаласы әкімдігі, қалалық Ішкі саясат, Білім, Тілдерді дамыту басқармалары және «QAZAQ EPOS» қоғамдық қоры өкілдерінің ұйымдастыруымен Елбасы Н.Ә.Назарбаевтың «Болашаққа бағдар: Рухани жаңғыру» бағдарламалық мақаласындағы міндет-мақсаттарды басшылыққа ала отыра оқушылар арасында кітап оқуды, қазақ халқының батырлар жырларын насихаттау мақсатында «Тұлпар мініп, ту алған!» атты байқау өтті.

«Үй тапсырмасы» ретінде «Алпамыс батыр» жырын жатқа айту берілген әдеби және тарихи-танымдық байқауға алма­тылық 1300-ден астам бала өтініш біл­дірген. Олардың 54-і – өзге ұлт өкілдері. Жалпы, «Алпамыс батыр» жырының оншақты нұсқасы бар. Байқау ұйым­дас­тырушылары солардың ішінен Сұлтанбек Аққожаевтың нұсқасына тоқталды. Ол жеке кітапша етіп шығарылып, қалалық білім бөлімі арқылы Алматы оқушыла­ры­ның тәлімгерлеріне алдын ала таратылды. Кітаптың 106 бетінен тұратын «Алпамыс батыр» жырын ұзақтығына қарамастан басынан аяғына дейін жаттап алған жас өрендер алдымен қаланың 8 ауданы бойын­ша өткен іріктеу кезеңіне қатысты. Әр ауданнан үздік шыққан үш оқушыға қалалық байқауға жолдама беріліп, ақыр­ғы сайысқа 24 оқушы ғана жетті. Байқау шымылдығын қалалық Ішкі саясат бас­қармасының басшысы Нұрлан Сыдықов құ­т­тықтау сөзбен ашып, жас қатысу­шы­ларға сәттілік тіледі. Байқауда жырдағы тарихи оқиғалардың тарихы да сұралды. Сұрақтарды Ахмет Байтұрсынұлы атын­дағы Тіл білімі институтының мамандары арнайы дайындаған. Филология ғылы­мы­ның докторы, профессор Өмірзақ Айт­байұлы төрағалық еткен қазылар алқа­сының (М.Әуезов атындағы Әдебиет және өнер институтының директоры, профессор, ҚР Еңбек сіңірген қайраткері Уәлихан Қалижан, журналист-жазушы, ҚР Президенті сыйлығының лауреаты, «Алматы ақшамы» газетінің директор-Бас редакторы Қали Сәрсенбай, ғалым, өнертанушы, филология ғылымының докторы, профессор Тынысбек Қоңырат­баев, филология ғылымының докторы, профессор Темірхан Тебеген, М.Әуезов атындағы Әдебиет және өнер институ­ты­ның бөлім меңгерушісі, филология ғылымының кандидаты, доцент Серік­қазы Қорабай) шешімімен 1-орынды №76 ОШ-тың 9-сынып оқушысы Аружан Әбсаттар (тәлімгері Майра Айыпхан­қызы) жеңіп алды. Жеңімпаз жеткіншекке 1,5 миллион теңге көлеміндегі ақшалай сыйлық табысталса, байқауға дайын­да­ған ұстазына Оксфорд қаласында ағыл­шын тілі курсынан өтуге жолдама берілді.