АЛҒАШҚЫ ИПОТЕКА
13.07.2018
326
0

Алматыда «7-20-25» бағдарламасы бойынша алғашқы несие берілді. Оған 25 жастағы бойжеткен Нарбота Бақытхан қол жеткізді.

Бұл бағдарлама басталмай тұрып 3 жыл бойы ақша жинаған бой­жет­кеннің қаржысы 7-20-25 бағдарламасының талабына сай келген. Нар­бота үйін Ақсай шағын ауданындағы тұрғын үй кешенінен таң­дады. Енді тек пәтердің кілтін алып, қоныстану ғана қалады. Бағ­дар­лама­ның қаржылық серіктесі «ЦентрКредит» банкінің өкілдері 7-20-25 бағдарламасының алғашқы пайдаланушысына гүл сыйлады.
«ЦентрКредитбанкі» АҚ төрағасының орынбасары Тимур Иш­муратовтың мәлімдеуінше Қазақстанның 6 өңірінде Алматы, Орал, Аста­на, Өскемен, Ақтау, Қостанай қалаларында алғашқы несиелер беріледі. Ең басты талап – адам­ның төлем қабілеттілігі. Қа­зіргі уақытта екінші дең­гей­лі банктермен 7 келісім­шарт жасалған.
Еске сала кетсек, «7-20-25» тұрғын үй бағдарламасы бойын­ша әр жұмыс істейтін қазақстандық несиеге бас­па­на ала алады. Қазақстан­дық­тар келесі шарттармен ипотекалық қарыз алу мүмкіндігіне ие болмақ: несие бойынша сыйақы мөл­шерлемесі – жылына 7%-дан, бастапқы жарна — 20%-дан аспайды, не­сиені төлеу мерзімі – 25 жылға дейін. Ипотекалық бағдарлама бойын­ша несиелер тек ұлттық валютамен беріледі.
Клиенттер Банк Центркредит, Еуразия банкі, АТФ банкі, RBK бан­кі, Халық банкі, Цеснабанк, Тұрғын үй құрылыс жинақ банкіне өті­ніш бере алады. Жыл соңына дейін бұл тізімге Сбербанк пен Forte банк қосылуы мүмкін.

Аяулы ҚУАНЫШ,
ХАТУ «Электрондық журналистика» бөлімі

ПІКІР ҚОСУ

Ваш e-mail не будет опубликован.

Пікір