ҚР Еңбек және халықты әлеуметтік қорғау вице-министрі Біржан Нұрымбетов Қазақстанның солтүстік бөлігінде еңбекке қабілетті жастағы азаматтардың азайғанын мәлімдеді. «Біздің тарапымыздан түрлі зерттеулер жүргізілді, егер қазіргі демографиялық, көші-қондық үрдістер сақталар болса, алдағы бес жылда ШҚО, Павлодар, СҚО және Қостанай облыстарында 167 мыңнан аса еңбекке қабілетті азаматтарды жоғалтамыз. Ал Жамбыл, ОҚО, Алматы, Маңғыстау және Қызылорда облыстарында еңбек ресурсы көп, халықтың саны көбейіп жатыр. Сондықтан бос орындарды оңтүстіктің есебінен толтыру үшін 2018–2022 жылдары 59 мың отбасыны солтүстікке көшіруді көздеп отырмыз», – деді вице-министр өз сөзінде.

Б.Нұрымбетовтың айтуынша, жыл басынан жұмыс бабымен өңірден-өңірге көшу бағ­дар­ламасы аясында 114 отбасы, тиі­сінше 461 адам оңтүстіктен сол­түстікке көшіп, жұмыспен қам­тылды және тағы 1 200 отба­сы көшуге дайын.
«Егер оңтүстіктің азаматы сол­­түстікке жұмыс бабымен көш­­кісі келсе, көші-қон шы­ғын­дарын өтеу үшін әр отбасы мүшесіне 79 415 теңгеден төлеп бе­реміз. Екіншіден, барған же­рін­де тұрғын үй мәселесін шешу үшін, бір жылға дейін пәтер/үй жалдайтын болса, жалға алатын ақшаны айына 34 мыңнан 68 мың­ға дейін бір жыл бойы төлеп беруге дайынбыз. Егер ай сайын төленетін қаражаттың есебінен ауылды жерден шағын үй сатып алу мүмкіндігі болса, бір жыл­дық пәтерақыны бір мезгілде төлеп беру жолдарын қарасты­рып жатырмыз. «Тұрғын үй құ­ры­лыс банкімен» бірлесіп, бағ­дар­лама аясында көшетін аза­маттарға жеңілдетілген заем, суб­сидиялар беру тетіктерін қа­рап жатырмыз», – деген Біржан Нұрымбетов солтүстік өңірдің ауылды елді мекендеріне көшіп барған оңтүстік азаматтарына жер телімдері конкурссыз бе­рілуі мүмкін екенін де айтты.
«Өздеріңізге белгілі, қазіргі уақытта жер конкурс арқылы бері­леді. Ал біздің бағдарлама қа­тысушыларына ауыл шаруа­шылық жерлерін, коммерция­лық тұрғыда пайдаланылатын немесе балабақшамен айналыса­тын жерлерді конкурссыз беру жолдары шешіліп жатыр. Ол үшін тиісті заңдарға өзгерістер енгізу қажет», – деді ол.
Тағы бір айта кетерлігі, оң­түстіктен солтүстікке көшкен аза­маттардың бизнес-идеясы бол­са, олар «Бизнес-Бастау» жо­басы арқылы оқытылады. Егер «Атамекен» кәсіпкерлер палатасы жас кәсіпкер туралы оң пікір білдірсе, оған 5 миллион теңгеге дейін қайтарымсыз грант беру мүмкіндіктері қарас­тырылуда.