12 қарашада Қазақтың М.Әуезов атындағы қазақ мемлекеттік академиялық драма театрында Қазақстанның халық әртісі, «Парасат» орденінің иегері Нүкетай Мышбаеваның 80 жасқа толған мерейтойы өтті. Қазақ театр өнерінің негізін қалаған актерлердің көзін көріп, тәрбиесін алған Нүкетей Мышбаева осы театрға 20 жасында келіп, 60 жыл бойы табан аудармай еңбек етті. Әр образы өзіндік бейнесімен ерекшеленіп тұратын, бірнеше буын көрерменнің көңілінен шыға білген актрисаның сексен жастық тойына мәдениет пен әдебиет, өнер саласының ірі өкілдері келді.

Ел Президенті Н.Назарбаев­тың арнайы жолдаған құттықтау хатын Мәдениет және спорт вице-ми­нистрі Ақтоты Райым­құлова оқып берді. Қазақстан Жазушы­лар одағының төрағасы Нұрлан Оразалин мемлекеттік хатшы Гүл­шара Әбдіхалықо­ва­ның, Се­нат төрағасы Қасым-Жомарт То­қаевтың құттықтау­ларын жет­кізіп, Жазушылар ода­ғының аты­нан Нүкетай Мыш­баеваға сый-сияпат көр­сетті. Парламент Мәжі­лісінің депутаты Се­рік Сейдуманов мерейтой иесіне ҚР Парламент Мәжілісінің тө­р­а­ғасы Нұрлан Нығ­ма­тул­линнің  құттықтауын жеткізсе, театр ди­­ректоры Ерлан Біләл мә­де­ниет және спорт министрі Арыс­танбек Мұха­медиұлының ақ тілегін оқыды. Сонымен қатар, акт­рисаның туған жері Алматы об­лысы, Райымбек ауданы, На­рынқол ауылы әкім­ші­лігінің өкіл­дері өз құттықтау­ларын жет­кізді. Сахнада қатар жүрген әріп­­тестері, Қазақ­стан­ның ха­лық әртісі, Мемлекеттік сый­лық­­тың лауреаты Сәбит Оразбаев пен өнердегі сіңлісі Қа­­­­­зақ­стан­ның халық артисі, «Құр­мет» ор­денінің иегері Торғын Тасыбе­кова сөз сөйлеп, жүрек­жарды ті­лектерін айтты.

---

ҚАЗАҚСТАННЫҢ ХАЛЫҚ АРТИСІ Н.МЫШБАЕВАҒА

Айдай сұлу мінсіз туған майталман
Білгенімді бір өлеңмен айта алман.
Атқан таңдай арайланған жүзіңді
Сахнадан көрмей үйге қайталман.

Ойнадыңыз талай сұлу жеңгені,
Бал татыған қымыз құйып – Теңгені.
Асекеңдей ұлағатты ұстаздың,
Апатай-ау, сіз емес пе сенгені.

Шығатынсыз Майра болып жайраңдап
Гүл тердіңіз Әлиман боп сайраңдап.
Көрерменнің көзайымы Нүкеңе,
Таңдап, талғап қашан қондың қайран бақ?

Қайтып кетпе Нүкетайдан баян бақ,
Ортамызда жүре берсін жайраңдап.
Әлі күнге қызды ойнауға жарайды,
Гүл тер десең гүл тереді тайраңдап.

О, құдіретті сахнаның киесі!
Соның бүгін Нүкетай ғой иесі.
Жарқылдаған, аңқылдаған апама,
Жағылмасын жамандықтың күйесі.

Арамызда жүре берсін ұлы күштің иесі
Рөл де бар апамызға тиесі.
Сахнада сіздер барда бұзылмас,
Өмір деген ұлылықтың жүйесі.

Закария ЖҮНІС,
ақын.