ЭКСПО АЯСЫНДАҒЫ ТУРИЗМ
ЭКСПО – жаңалықтар алаңы ғана емес, сонымен бірге, жаңашылдық, инновация саласында сұхбаттасумен қатар, жалпыадамзаттық мәселелер бойынша ғаламдық диалогтарды дамыту мәселелерін де қозғап келеді. Міне, осылайша Халықаралық көрме – мемлекеттердің өзара түсіністігін орнатуға күш салып келеді.
Астана ЭКСПО-2017 көрмесі біздің денсаулығымыз бен қоршаған орта қауіпсіздігін қамтиды. Экономикалық және әлеуметтік дамуды жылдамдатуға қатысты адамзат алдындағы міндеттер мен мәселелерді ескере отырып, қуат тасымалдаушыларына жалпы, жаһандық көзқараспен қарауға көмектеседі. Осы міндеттер мен мәселелердің сәтті шешімін табуы көптеген факторларға байланысты болмақ.
Қазақстан Президенті Нұрсұлтан Әбішұлының бұл айтулы көрмеде Қазақстанның мәдениетін, тарихы мен дәстүрін көрсетудің маңыздылығына ерекше мән беретіні де сондықтан. «Отандық мәдениет қайраткерлерінің өнер көрсетуіне басымдық беру керек. Мәдени-думанды шаралар көрме аумағында ғана емес, бүкіл қалада өтуі қажет. Музейлер, көрмелер мен театрлар қонақтарды ең жоғары деңгейде қарсы алуға дайын болуы тиіс. Мәдени-думанды шаралар жоспары әлі күнге дейін келісілген жоқ. Барлық мемлекеттік органдардың үйлесімді қызмет еткені керек, осы жұмысты жеделдетуді тапсырамын», – деген еді Мемлекет басшысы өз сөзінде.
Расында, халықаралық аренада салмағы басым мұндай мерейлі шараны өткізу жұмысы біздің елге сеніп тапсырылған екен, ендеше меймандардың бұл көрмемен таныстығы – қазақ елімен, оның мәдениетімен, дәстүр-салтымен, рухани құндылықтарымен, табиғатымен таныстығы емес пе!..
ЭКСПО-2017 халықаралық көрмесінің біз үшін тағы бір ұтымды тұсы – отандық туризмді насихаттау десек, бұл шара аясында да бірқатар қадам жасалып жатқанын айта кету парыз.
Мәселен, жуырда ғана «Астана ЭКСПО-2017» Ұлттық компаниясы және Қазақстанның Польшадағы елшілігі Еуропаның аса ірі туристік көрмелерінің бірі – «World Travel Show» Халықаралық туристік көрмесіне қатысты.
Аталмыш туристік көрмеге Қазақстаннан өзге 30 мемлекет қатысқанын айта кету керек. Көрмеге 50 мыңнан аса ықтимал туристер келді. Бұл шара – Президент Н.Ә.Назарбаевтың тамыз айындағы Польшаға мемлекеттік сапары барысында қол қойылған «Астана ЭКСПО-2017» АҚ және Польша туристік палатасы арасындағы Ынтымақтастық туралы меморандумды іске асыру шеңберінде Польша туристері мен қонақтары арасында қазақстандық туристік бағыттарды танымал ету бойынша Польша тарапымен бірлесіп жасалған алғашқы қадам.
Польша жұртшылығы мен Варшава қонақтарына қазақстандық павильон Астана ЭКСПО-2017 жобасын, қазақтың туристік інжу-маржандарын, сонымен қатар, Қазақстанның қазіргі заманғы туристік бағыттарын таныстырды. Көрме барысында «Астана ЭКСПО-2017» өкілдері мен қазақстандық туроператорлар польшалық ірі туроператорлармен бірлескен ынтымақтастық туралы ұсыныстарды талқылады, Қазақстанға туристерді көп тарту мақсаттарында Польшаның туристік бизнесінің өкілдерімен байланыстар орнатты. Польша туристік палатасының Вице-Президенті Дариюш Войталмен «Астана ЭКСПО-2017» АҚ қолдауымен Польшаның жетекші туроператорлары үшін Варшавада арнайы роуд-шоу және Қазақстанға ақпараттық тур ұйымдастыру туралы келісімге қол жеткізілді.
Польша мен ЕО азаматтары үшін анағұрлым қолайлы туристік жағдайлар жасау үшін 2017 жылғы 1 қаңтардан бастап Қазақстан Үкіметі Польша азаматтары үшін 30 күнтізбелік уақытқа визасыз қабылдау тәртібін енгізетінін айтуға тиіспіз. Қазақстанның және Польшаның әуе жолдарын басқарушылар, сонымен қатар, Польшаның LOT ұлттық әуе желілері келесі жылдың бірінші жартыжылдығында Варшава мен Астана арасында тікелей тұрақты әуе рейсін ашу үшін келіссөздер жүргізіп жатқанын атап өту керек.
Жалпы, ғаламдық жаңалықтардың, технологиялық мүмкіндіктердің, заман ағымына сай өнертабыстардың бары мен жоғын паш ететін басты алаңына айналған Халықаралық көрме – ЭКСПО-ға тек қана өнертапқыштар, ғалымдар, осы сала мамандары ғана қатысады деп жеңіл ойлаудың өзі дұрыс емес. Осы күнге дейін өткізіліп келген Бүкіләлемдік көрмелер тарихына көз жіберсеңіз, дарынды ақындар, жезтаңдай әншілер, қаламы сиқыр суретшілер, мүсіншілер, заманауи фотографтар – көптеген өнер адамы ЭКСПО көрмесіне қалмай қатысқанын байқауға болады. Мәселен, көрменің арғы-бергі тарихында Вагнер, Штраус, Верди сияқты таңғажайып композиторлар мұндай көрмелерге арнап арнайы музыкалық шығармалар да жазыпты. Мане 1867 жылы Париждегі Бүкіләлемдік көрменің суреттерін салса, Дали 1939 жылы Нью-Йоркте сюрреализм павильонын рәсімдепті, ал Пикассо 1937 жылы Париждегі көрмеде XX ғасырдың символына айналған «Герниканы» ұсынған екен. Бұлардың қатарына әсем даусымен көрме қатысушыларын баурап алған әнші Әміренің әнін қосыңыз.
«Астана ЭКСПО-2017» Ұлттық компаниясы да халықаралық көрменің әлемдік өнер үшін жасалуы тиіс жолдарын да қарастыруда. Мәселен, «Астана ЭКСПО-2017» Ұлттық компаниясы National Geographic-пен бірге арнайы жоба жүзеге асыруда. Ол жоба туралы компанияның Ілгерілету және туризм департаментінің директор орынбасары Роза Асанбаева, «National Geographic Traveler» бас редакторы Ольга Яковина және Ілгерілету және туризм департаментінің бас менеджері Даниел Сержанұлының қатысуымен болған баспасөз мәслихатында белгілі болды.
– «Халықаралық National Geographic Travel Awards» жүлдесі туризм саласының өзіндік Оскар сыйлығымен пара-пар. Биыл жүлде серіктесі Қазақстан, ЭКСПО-2017 атанды. Бұл қазір Қазақстандағы әлеуеті мейлінше зор бағыт. Оған деген қызығушылық күн санап арта өсуде. Сондықтан біз Халықаралық, ресейлік туризм мен саяхат туралы жетекші басылым ретінде оған назар аудармай тұра алмадық», – дейді баспасөз мәслихатында Ольга Яковина.
«Астана ЭКСПО-2017» Ұлттық компаниясы National Geographic-пен бірлескен арнайы жоба аясында екі байқау өтеді. Бірі – «Қазақстан – жаңа ашылым уақыты», екіншісі – «Қазақстан – болашақ энергиясы».
«Қазақстан – жаңа ашылым уақыты» маршруттар байқауы 8 қыркүйек пен 6 қараша аралығында өткізілуде. Бұл байқауға қатысқысы келетіндер nat-geo.ru порталына Қазақстанның көрікті жерлері туралы өз оқиғаларын жолдауларына болады. Қазіргі күннің өзінде байқауға 26 өтінім келіп түскен. Бас жүлде иегері ЭКСПО-2017 халықаралық мамандандырылған көрмесіне жолдама алады. Сонымен қоса, бас жүлде 17 қараша күні Мәскеу қаласында өткізілетін National Geographic Traveler Awards 2016 салтанатты шарасында табыс етіледі.
«Қазақстан – болашақ энергиясы» фотобайқауы 28 қыркүйекте басталып, 28 қазанға дейін өткізілді. Оған қатысамын деушілер де nat-geo.ru сайтына Қазақстанның суреттерін жолдаған болатын. Байқау әділқазылары ең үздік жұмыс иелерін 1 қараша күні атайтын болады. Жеңімпаздың еңбегі National Geographic-тің әлеуметтік желілерінде жарияланады. Сондай-ақ, жеңімпаз National Geographic командасы және шеф-фотограф Андрей Каменевпен бірге 2017 жылдың мамыр айында Қазақстанға фотоэкспедицияға бара алады.
Халықаралық көрмені өткізу – болашаққа қадам жасаудың жаңа бір белесі. Прогресс пен өндірістік дамудың көрінісі болып табылатын көрмелер өзін қабылдайтын елдердің болашақта табысты дамуының кепіліне айналатынын ескеріп, 2017 жылы Астанада өтетін Халықаралық көрменің де өз ерекшелігі, айтулы жаңалығы, өшпес естелігі болатынына сенеміз…