Адам өміріндегі ең игі істерінің бірі – мұқтаж жандарға қамқорлық жасау. Адамдар бір-біріне қайырымдылық, мейірімділік таныту, қамқорлықты қажет ететін жандарға қол ұшын беру арқылы өмірін жақсылыққа бастайды.

«Қайырымдылық жасасаң, қайырымын өзін көресің» деген екен дана халық. Қайы­рым­­дылық – халқымыздың ең ізгі қасиет­те­рінің бірі.

«Жанашырлыққа жан риза» дегендей, қам­қорлыққа алынған балалардың жанашыр қамқоршысы болып, аялы алақанын тосып, жүрек  жылуын ұсыну, сауабы мол іске атсалысу әрбір адамның азаматтық парызы.Осы мақсатта Елбасының оқушы­лардың толық мектепке баруын қамтамасыз ету жөніндегі тапсырмасын орындауда «Мектепке  жол» атты респуб­ликалық акция өткізіліп келеді. Биыл да Ш.Уәли­ха­нов атындағы №12 маман­дандырылған гимназияда Тәуелсіздігіміздің 25 жылдығына орай «Бақытты балалық шақ мекені» ұраны­мен акция өткізілді. Акция­ның басты мақ­саты – балаларды орта білім­мен толық қам­тылуына жағдай жасау.

«Жылуы жоқ үйден без, қайырымы жоқ биден без» дегендей, қайырымдылық, адам­гершілікті биік ұстап, кісілікті ту етіп, жаны жаралы жанның жасын сүртіп, жылы лебізін аямай, қолдан келген жәрдемін ұсынып, достық пейілдерін танытып жатқан жанашырларымыз да аз емес. Атап айтсақ: Сейсенбаев Марат, Иманжанова Айжан, Амерханова Ақмарал, Алдияр Алия, Бейсеуова Айнұр, Жаржанова Ға­лия, Ашимова Асель, Сортова Анар сынды демеушілерге гимназия­ның алғысы­ шексіз.

Бұл шара жаңа оқу жылында әр бала бойынша жақсы көңіл-күй, жа­ңа қарқын, білімге деген құштарлық ұялататыны сөзсіз.

Арай ЖАЙЫҚБАЕВА,
№12 мамандандырылған
гимназияның оқытушысы.