Соңғы жылдары жасанды интеллект (ИИ) технологиялары ғаламдық деңгейде қарқынды дамып, қоғам өмірінің барлық саласына еніп отыр. Бұл құралдар еңбек өнімділігін арттыруға, ақпаратқа жедел қол жеткізуге, шығармашылық процестерді жеңілдетуге айтарлықтай мүмкіндік береді. Алайда ИИ-ды шамадан тыс және жауапсыз пайдалану мәселесі күн өткен сайын өзекті бола түсуде.

Қазіргі таңда көптеген азаматтар қарапайым, өз күштерімен шешуге болатын тапсырмаларды да жасанды интеллектке тапсырып, өздігінен ойлану дағдысын әлсіретіп барады. Сонымен қатар ИИ көмегімен жалған видеолар жасау, жалған дауыстарды қолдану арқылы адамдарды алдау фактілері де жиілеп келеді. Бұл – технологияның теріс бағытта пайдаланылып жатқанын көрсететін алаңдатарлық құбылыс.

Әсіресе білім беру саласында айқын проблема байқалып отыр. Оқушылар мен студенттер оқу тапсырмаларын – мәтіндік жұмыстарды, шығармаларды, есептерді – өздігінен орындаудың орнына жасанды интеллектке жүктеуге дағдылана бастады. Мұндай әрекет олардың талдау, іздену, логикалық ойлау секілді негізгі академиялық және когнитивтік қабілеттерін әлсіретіп, білім сапасының төмендеуіне алып келеді.

Егер бұл үрдіс осылай жалғаса берсе, болашақ мамандардың интеллектуалдық деңгейі мен дербес шешім қабылдау қабілеті төмендеп, қоғамның дамуына кері әсерін тигізуі ықтимал. Технология қаншалықты дамыса да, адамның ойлау қабілеті – қоғамның прогресін анықтайтын негізгі факторлардың бірі болып қала береді.

Сондықтан жасанды интеллектіні тиімді және жауапкершілікпен қолдану – бүгінгі күннің маңызды талабы. ИИ адам мүмкіндіктерін толықтырушы құрал болуы тиіс, ал адамның ойлау, талдау және зерттеу қабілеттері негізгі орында сақталуы қажет. Технологияның артықшылықтарын пайдалана отырып, білім мен дағдыны дамыту – болашақтың сапалы және саналы болуына негіз болмақ.