14 наурыз күні Ұлттық кітапханада  белгілі ақын, талантты аудармашы, «Дарын» жастар мемлекеттік сыйлығының лауреаты Ақсұңқар Ақынбабаның орыстың көрнекті ақыны Анна Ахматовадан тәржімалаған  «Жарылыс» кітабының тұсауы кесілді.

Қазақстан Жазушылар одағы ұйымдастырған жыр кешін Қазақстан Жазушылар одағы Басқарма төрағасының орынбасары, Қазақстанның еңбек сіңірген қайраткері, ақын, этнограф  Қасымхан Бегманов жүргізіп отырды.  Алқалы басқосу А.Ахматованың кітабы  қазақ тілінде жарық көруіне байланысты Ресей Жазушылар одағынан Қазақстан Жазушылар одағының төрағасы Мереке Құлкеновтің атына арнайы жолданған хатты оқумен  басталды. Хатта кітапты қазақша сөйлеткен Ақсұңқар Ақынбабаның аты-жөні аталып, алғыс айтылған.
М.Әуезов атындағы Әдебиет және өнер инс­титутынан, Ресейдің Бас консулдығының Алматыдағы өкілдігінен, ЮНЕСКО аясындағы Халықаралық мәдени өкілдігінен, ҚХА өкілдігі, Дүниежүзі қазақтары қауымдастығының Алматыдағы өкілдігінен, «Қазақстан-орыс мәдениеті орталығынан» арнайы қонақтар келіп, қос ақынның шығармашылығы мен аударма турасында жылы лебіздерін жеткізді.  Сондай-ақ белгілі әдебиет сыншысы Әлия Бөпежанова, белгілі жазушылар Нұрдәулет Ақыш пен Сәуле Досжанова, Республикалық Кітап палатасы директорының орынбасары Толқын Сәлменбаева, ҚЖО Орыс әдебиеті және халықаралық әдеби байланыс кеңесінің төрағасы Василий Шупейхин, ҚЖО Аударма кеңесінің төрағасы Заманбек Әбдешов,  белгілі  ақын  Алмас Ахметбекұлы, ақын, «Жанайым шығармашылық жобасының» жетекшісі  Жанайым Ауғанбай сөз алып, ақынның тәржімаларын жан-жақты талдап-таразылап берді.