Аймақтар мен облыстарда поэзиялық жиындар ұйымдастырылып, әдебиетсүйер қауымды қуанышқа бөлегені көпке мәлім.

16-мамыр күні Ұлытау облысында алғаш рет «Кеңгір керімсалы» жыр фестивалі өт­ті. Жас ақындардың қаламын ұштап, талабын арт­тыруды мұрат тұтқан жыр мерекесіне Қазақ­стан Жазушылар одағы басқарма төрағасының орын­басары Бауыржан Жақып, Абай атындағы мемлекет­тік сыйлықтың лауреаты Ғалым Жайлыбай, «Отан» орденінің иегері Жүрсін Ерман мен жыршы, профессор Алмас Алматов арнайы шақырылды. Абай ескерткішінің алдынан бастау алған шара балалар мен жасөспірімдер кітап­ханасындағы «Жаңа кезең. Жас қаламгер» дөңгелек үстеліне ұласты. Онда қонақтар мен жергілікті қаламгерлер сөз сөйлеп, әдебиет­тің даму үдерісі жайында пікір алмасты. Жезқазған қаласы әкімінің орынбасары Бақытжан Өміртайұлы жүргізген дөңгелек үстелде жер-жерден келген жас ақындар мен аға буын қаламгерлер қазіргі жастар поэзиясындағы ізденістер мен іркілістер, қатысушы ақындардың кітаптары мен қалам алысындағы жетістіктері туралы пікір алмасып, ұсыныстарын ортаға салды. Қалам иелерінің ұсынысымен, жергілікті әкімдіктің ұйғаруымен фестиваль аясы кеңейіп, екі жылда бір рет тұрақты түрде өткізіліп тұратын болды. Болашақта бұл фестивальді халықаралық деңгейде өткізу туралы ұсыныстар да қолдау тапты.
Ауқымды басқосудан кейін қалам иелері С.Қожамқұлов атындағы музы­калық драма театрын­дағы «Кең­гірдің қоңыр кешінде» поэзиялық жиынына бет түзеді. «Ұлар» әдеби клубының жетекшісі, жас ақын Абай Ораз тізгіндеген кеште ақындар Ұлытау-Жезқазған өңіріне арналған бір өлеңі мен еркін тақырыптағы жырларын оқыды. Одақ төрағасының орынбасары, ақын Бауыржан Жақып қатысушыларға Қазақ­стан Жазушылар одағы басқарма төрағасы Мереке Құлкеновтің құт­тықтауын жеткізіп, қаңтар айында Одақ мүшелігіне қабылданған Мұқанбетқали Сейітқазы, Сара Смағұл, Төлеш Асан, Ернұр Сейдахмет­ке мүшелік билет­терін тапсырып, омырауларына Жазушылар одағының төсбелгісін қадады. Сондай-ақ «Кеңгір керімсалы» республикалық жас ақындар фестиваліне белсене қатысқан жас ақындарға Қазақ­стан Жазушылар одағы Хатшылығының Алғысхатын табыстады. Фестиваль жергілікті ақын Мұқағали Сейіт­қа­зының «Маған сені жақсы көрген ұнайды» ат­ты әдеби-сазды кешімен қорытындыланды. «Кеңгір керімсалы» республикалық жыр фестивалі Жезқазған қаласының жетпіс жылдығына арналып өткізілді.

«Ұлытау – тарихи қазынаға бай өлке. Жошы хан кесенесі, Домбауыл кесенесі, Алаша хан кесенесінің іргесі қаланған, ішкі, сыртқы туризмді дамытатындай мүмкіндігі орасан өңірде мақтанышпен көрсететін жерлер көп. Жас ақындардың алдында үлкен жол күтіп тұр. Сол қасиет­ті сапар киелі Ұлытау даласынан басталып, Қазақ­стан аспанына жыр жұпарын аңқытса, ұлт руханиятына үлкен олжа салынды деген сөз», – деді Бауыржан Жақып аталған жиынның маңызына тоқталып.
Бұдан бөлек, 15-16-мамыр күндері кеншілер шаһары – Қарағандыда «Қарағанды көктемі» жыр фестивалі жан-жақтан жиналған жыр иелерінің басын қосса, жер жәннаты – Жетісуда Ілияс Жансүгіров оқуларында өңір-өңірден келген талант­ты оқушылар бақ сынасты.
Қасым топырағындағы фестиваль сол күндермен тұспа-тұс келген туған күн иелерін құт­тықтаудан басталып, алаш ақындары арқалана жыр оқыған кешпен жалғасты. Қазақ­стан Жазушылар одағы басқарма төрағасының орынбасары, ақын Қасымхан Бегманов Қазақ­стан Жазушылар одағы Басқарма хатшылығының атынан сөз сөйлеп, Қарағандыны «қара өлеңнің өз өлкесі», – деп, фестивальдің жоғары деңгейде өтуіне тілектестігін білдірді.

Ұлытауда өткен фестивальде Ұлытау облысы жас ақындарының «Кеңгір керімсалы» антология­сы мен жезқазғандық Жанат Әбдіғожиннің «Арнадым саған» кітабы оқырманға жол тартса, «Қарағанды көктемінің» аясында алматылық Роза Аспанқызының «Өзін оятқан адам» жинағы мен ұлытаулық Абзал Мақаштың «Мәжнүн мұнарасы» кітабының тұсауы кесілді.
«Жетісу облысының білім басқармасы» мемлекет­тік мекемесі «Жетісу дарыны» облыстық дарынды балалар мен талант­ты жастарды анықтау және қолдау оқу-әдістемелік орталығы» коммуналдық мемлекет­тік мекемесінің ұйымдастыруымен өткен Алаш қайраткері, көрнек­ті ақын Ілияс Жансүгіровтің туғанына 130 жыл толуына орай өткен «Ілияс оқулары» байқауында Қазақ­станның 16 облысындағы орта мектептерден 100-ге жуық оқушы білім дода­сына түскен. Бес кезеңнен тұрған сайыста жеңімпаз атанған жүлдегер оқушылар бас жүлде және І, ІІ, ІІІ дәрежелі дипломдармен, Алғысхат­тармен марапат­талды. Сонымен қатар жүлде иелеріне бағалы сыйлықтар берілді. Қазылар алқасы байқау жеңімпаздарын марапат­тау кезінде өз ой-пікірлерімен бөлісіп, мектеп бітіруші түлектерге сәт­тілік тілей келіп, қазақ тілі мен әдебиеті мамандығына таңдау жасаған оқушыларды, жоғары оқу орындарының филология, журналистика факультет­теріне оқуға шақырды.

Мөлдір РАЙЫМБЕКОВА