Қазақстанның Түркиядағы елшілігінің қолдауымен, Халықаралық ТҮРКСОЙ  ұйымының ұйымдастыруымен және Қарағанды облысы әкімдігінің атсалысуымен Анкара қаласында күй  құдіреті Тәттімбет Қазанғапұлы атындағы саябақ ашылды. Анкара қаласы Етимесгут муниципалитеті тұрғындарының игілігіне берілген демалыс алаңы күйші-композитордың  туғанына 200 жыл толу  мерейтойына орайластырылып отыр.

Шараның ашылу салтанатына Қаза­қ­с­танның Түркиядағы елшісі Жансейіт Түймебаев, Халықаралық ТҮРКСОЙ ұйы­мының Бас хатшысы Дүйсен Қа­сейі­­нов, Анкара қаласы Етимесгут му­ни­ци­палитетінің мэрі Әнуар Демирель, Қарағанды облысы әкімінің орынбасары Жандос Әбішев, облыс әкі­мінің штат­тан тыс кеңесшісі Рымбала Омарбе­кова, ақын Серік Ақсұңқарұлы, Тәттім­бет­тің тікелей ұрпағы Мүслім Жақ­паров, Қали Бай­жанов атындағы кон­церттік бірлес­тігі, Тәттімбет атындағы академиялық ұлт аспаптар оркестрі, сондай-ақ, дипло­ма­тиялық мекемелердің өкілдері мен тү­рік зиялылары қатыс­ты.

Ресми рәсім басталмас бұрын Тәттім­бет атындағы академиялық ұлт аспаптар оркестрінің орындауында Тәттімбеттің «Са­рыжайлау», «Сылқылдақ» күйлері көп­шілікке тарту етілді.

Қазақстанның Түркиядағы Төтенше және өкілетті елшісі Жансейіт Түймебаев муниципалитет тұрғындары алдында сөз сөйлеп:

– 2011 жылы Етимесгут ауданында  күйші-композитор Дина Нұрпейісо­ва­ның туғанына  150 жыл  толуына байланысты және өткен жылы Кечиөрен ауда­нында Сүйінбай Аронұлының ту­ға­нына  200 жыл толуына орай саябақ ашылған болатын. Ал бүгін Тәттімбет саябағының бой көтеруі біз үшін зор қуаныш, үлкен абырой. Мұндай маңыз­ды шаралар түбi бiр, тiлегi ортақ туыс ха­лықтардың арасын жақындастыра түсетіні сөзсіз. Сондай-ақ, шертпе күйдің шебері Тәттімбет Қазанғапұлы мұрасы екі елді рухани байытуда және достық қарым-қатынасын нығайтуда үлкен роль атқарады, – дей келе, Етимесгут му­ни­ци­палитетінің әкімдігіне қазақ халқы атынан  алғысын  айтты.

Салтанатты шара   соңы Ескишехир, Ан­кара, Амасия және Болу қалаларында «Қазақ­стан мен Түркия достығы» атты кон­цертпен жалғасты. Кеш барысында Қали Байжанов атындағы концерттік бірлестігі Тәттімбет  атындағы акаде­мия­­лық ұлт аспаптар оркестрі мен Әзер­бай­жан­ның, Қырғызстанның, Түркия­ның белгілі өнерпаздары өнер көрсетті. Ор­кестр­дің көркемдік  жетекшісі және бас дири­жері, Қазақстанның еңбек сіңір­ген қайраткері Дүйсен Үкібай.