Ұлттық киім үлгілері көз қуантты
Республикалық Наурыз мерекесіне арналған онкүндік шеңберінде Ұлттық киім күніне орай, Алматы қаласындағы Қазақ мемлекеттік академиялық филармониясында қазақтың ұлттық киімдерін дәріптейтін фестиваль өтті. Іс-шараның мақсаты – қазақтың ұлттық киім үлгілерін күнделікті қолданысқа енгізуге ықпал ету және осы бағытта жұмыс істеп жатқан дизайнерлерді ынталандыру.
Фестивальге ұлттық болмысты айшықтауға белсенді үлес қосып жүрген Қазақстанның еңбек сіңірген қайраткерлері, суретші-дизайнерлер мен БАҚ өкілдері қатысты. Халықаралық және республикалық байқаулардың лауреаты Әсел Атабектің орындауындағы «Наурыз-думан» әнінен бастау алған кеш сән көрсетіліміне ұласты. Көрсетілім Италияның Милан, Венеция қалаларындағы сән көрсетілімдеріне қатысып, ұлттық киім үлгілерімен әлемді тамсандырып жүрген Алматы қаласы «Белсенді ұзақ өмір» орталығының «Алматы әжелерінің» ерекше топтамасымен ашылды. Әдемі қарттық үлгісін ұлттық бояуы қанық киімдерімен айшықтай білген ата-әжелерімізге көпшіліктің құрметі ерек болды. Ал этно-дизайнер, ҚР дизайнерлер одағының мүшесі Бақыт Қызырқызы «Айпара» топтамасы арқылы қазақ ұл-қызының қайталанбас киім үлгісіндегі көркемдікті, ерекшелікті, өзіндік сұлулықты жаңашыл көзқараспен үйлестіре білген.
Жас та болса биікті бағындырып жүрген этно-дизайнер Нуршаим Асылбекқызының адам мен табиғаттың үйлесімділігін, гармониясын сездіре білген «Самғау» топтамасы заманауилықтың жарқын үлгісі болды. «Этно-Эрато 2019» ХХІ Еуразиялық жоғары сән ұлттық киімдер байқауында, сондай-ақ Мәскеуде өткен ХІХ халықаралық байқауда «Ретро» номинациясы бойынша екінші орынды иеленген бұл топтама ұлттық киімді еуропалық үлгімен көркем түрде үйлестірген.
Алматы сән және дизайн колледжінің студенттері мен оқу өндіріс шеберінің қолымен дайындалған Несібелі Ахметованың «Сапура» топтамасы көрермендерге жылулық пен жайлылық сыйлады. Келесі кезекте көрсетілген Т.Жүргенов атындағы өнер колледжінің киім дизайны бөлімінің 3-курс студенттері, жас дизайнерлер Анарбек Жансаяның «Жаңа Тыныс», Айтмухамбетова Көркемнің «Көктем самалы» топтамалары да ерекше ілтипатқа ие болды.
Осылайша, бұл күні ұлттық киімдер арқылы халық рухының шұғыласы шашылып, ұлттық дизайнның көркемдігі мен қайталанбас өрнегі тамсандырып, қазақтың бай мұрасынан шабыт алдық. Дәстүр мен стилді ұштастыра білген жас таланттарды қанаттандырған мұндай іс-шаралар халық мұрасының маңызын арттыра түсері анық.
Меруерт
МӘУЛЕТҚЫЗЫ,
журналист