Абай атындағы Қазақ Ұлт­тық педагогикалық университетінің базасында «Қазақ­стандағы қазіргі қазақтілді контент: зерт­теу парадигмалары» тақырыбында халықаралық ғылыми-теориялық конференция өт­ті. Ғылыми жиын аясында «Тіл ғылыми зерт­теулерін үйлестіру» орталығы салтанат­ты түрде ашылды. Аталған іс-шараға ҚР ҰҒА-ның көрнекті ғалымдары мен университет­тің профессор-оқытушылары қатысты.

Конференцияны кі­ріспе сөзбен ашқан Абай университетінің Басқарма Төрағасы-ректоры, философия ғылымда­рының докторы Дархан Біләлов орталықтың ашылу өзектілігіне тоқталып, оның басты мақсаты – алдағы уақыт­та еліміздің жоғары оқу орындарындағы 10-нан астам диссертациялық кеңестердің тіл ғылыми зерт­теулерін үйлестіруші ретінде ғылымды дамы­тудың басым бағыт­тарын айқындап, тіл ғылымы бойынша орындалатын докторлық диссертациялық жұмыстардың өзекті мәселелерге арналуын және тақырыптардың қайталанбауын қадағалайтынын айт­ты.

Ғылыми орталықтың басшысы болып сайланған ҚР ҰҒА академигі, филология ғылымдарының докторы Кә­рімбек Құрманәлиев орталықтың ашылу идея­сын тілге тиек ет­ті. «Көрнекті ғалым, рухани әкем, ұстазым – академик Шора Шамғали­ұлы Сарыбаев негізін қалаған Тіл ғылымы зерт­теулерін үйлестіру орталығының қызметі ұстазымның өмірден өтуіне байланысты біраз жыл тоқтап қалған болатын. Соңғы кезде тіл білімі бойынша қорғалатын диссертациялық жұмыстардың сапасына байланысты ғылыми жұртшылық тарапынан түрлі сындар айтыла бастады. Сын пікірлердің дені диссертацияның мақсат-міндет­терін, өзектілігін айқындаудағы нақтылықтың өз деңгейінде болмауы мен таңдалған тақырыптардың басқа диссертациялық жұмыстармен ұқсастығына байланысты қозғалып жатады. Осыған орай, Шөкең ізін салған сара жолды жалғастырып, жас ға­лым­дарға бағыт-бағдар беруде маңызы мол мәселені қолға алу идеясы туған еді», – деді академик алдағы жұмыс барысын да саралай келіп.
Ғылыми басқосуда сөйлеген ғалымдар университет­тер мен Ұлт­тық ғылым академиясының арасындағы тығыз ынтымақтыстық – жас ғалымдардың зерт­теулерінің жоғары деңгейде жүргізілуіне ықпал ететінін ерекше атап өт­ті.