Алакөлде республикалық айтыс өтті
Айдынды Алакөлге арнайы ат басын бұрған қалың қауымның биылғы демалысы ерекше есте қалды. Шілденің шуақты күнінде «Ел айбыны, жыр айдыны – Алакөл» республикалық ақындар айтысына еліміздің әр өңірінен келген 14 ақын түрлі тақырыптарда ой қозғап, жыр төкті.
Демалыс аймағының олқылықтары мен артықшылықтары айтылып, Қабанбай батыр есімі халық санасында қайта жаңғырды. Көрнекті қаламгер Зейнолла Сәнік шығармашылығы тілге тиек етіліп, ауыл-елдің мәселелері ой елегінен өтті. Осылайша шетелдіктер мен байтақ қазақ даласының әр қиырынан жиылған жұрт бір сәт төл өнеріміздің төрге озған сәтіне куә болып, өрелі ой, сүбелі сөз, жалынды жыр айтқан ақындарға жанкүйер болды.
Айтысқа белгілі ақындар, академик-профессорлар (Ұлықбек Есдәулет, Ғалым Жайлыбай, Мұхтарбек Каримов, Дихан Қамзабекұлы, Серік Әкірамұлы, Серікзат Дүйсенғазы, Дәулеткерей Кәпұлы, Бауыржан Халиоллаұлы) қазылық жасады. Танымал әншілер мен жергілікті өнерпаздар өнер көрсетіп, тыңдаушының құлақ құрышын қандырды. Айтыстың бас жүлдесі (1 000 000 тг) Еркебұлан Қайназарға бұйырса, 1-орынды (700 000 тг) Аспанбек Шұғатай иеленді. 2-орынға (500 000 тг) Рүстем Қайыртайұлы, 3-орынға (300 000 тг) Талғат Мықи мен Мақсат Ақанов лайық деп танылды, 9 ақынның әрқайсысына 200 000 теңгеден сыйақы берілді. Айтулы шара «Зейнолла Сәнік атындағы мәдениет қорының» идеясы һәм демеушілігімен, Үржар ауданы әкімдігінің қолдауымен өткізілді. Мәдениет қоры Үржар ауданының әлеуметтік аз қамтылған талантты 6 оқушысына бір жылдық шәкіртақы тағайындады.