Есім СЕГІЗБАЕВ
Қазақ мәдениеті мен өнері ауыр қазаға ұшырады.
2018 жылы 25 қарашада Қазақстанның Еңбек сіңірген өнер қайраткері, профессор Есім Жүкеұлы Сегізбаев өмірден озды.
Есім Жүкеұлының еліміздің өнері мен мәдениетінің дамуына сіңірген еңбегі зор. Ол 40 жылдан астам уақыт бойы Темірбек Жүргенов атындағы Қазақ ұлттық өнер академиясында «Актер шеберлігі» пәнінен дәріс беріп, өз шеберханасынан драма және кино, музыкалық театр актерларын тәрбиелеп шығарды. Одан білім, тәрбие алған талантты шәкірттері Астана мен Алматыда және Қазақстанның барлық қазақ театрларында, радио- телестудияларында, өнер мекемелерінде табысты қызмет етіп келеді.
Ол шәкірт тәрбиелеумен бірге бірнеше фильмдерге түсіп, көрермендердің көзайымына айналды. Көптеген фильмдерде басты кейіпкерлердің дауыстарын қазақ тіліне дубляждаған.
Есім Жүкеұлы – ғылыми-методикалық еңбектердің, жоғары және орта өнер оқу орындарына арналған «Актер шеберлігі» пәнінің типтік бағдарламаларының, «Қысқаша орысша-қазақша театр терминдерінің түсініктеме сөздігі», «Украинша-қазақша сөздіктерінің» авторы.
Оның қазақ тіліне аударған классикалық оперетталары театр сахналарында орындалып келеді.
Жылдар өтер, бірақ абзал тұлға, көрнекті өнер қайраткері, ұстаз Есім Жүкеұлы Сегізбаевтың жарқын бейнесі оны білетіндердің жүрегінде мәңгі сақталады.
Қазақстан Республикасы Мәдениет және cпорт министрлігі Қазақстанның еңбек сіңірген өнер қайраткері, профессор Есім Жүкеұлы Сегізбаевтың қайтыс болуына байланысты марқұмның отбасына, туыстары мен жақындарына қайғырып көңіл айтады.
ҚР Мәдениет және спорт министрлігі
Жаны жайсаң жан еді…
Темірбек Жүргенов атындағы Қазақ Ұлттық өнер академиясы ұжымы ең аяулы да қадірлі ұстаз, Қазақстан Республикасының Мәдениет қайраткері, Қазақстан Білім беру ісінің Үздігі, «Еңбек ардагері», Бауыржан Момышұлы атындағы «Батыр шапағаты», «Парасат» орден-медалдарының иегері, Қазақ Ұлттық өнер академиясының профессоры Есім Жүкеұлы Сегізбаевтың дүние салуына байланысты отбасына, туған-туыстарына орны толмас қайғысына ортақтасып, көңіл айтады.
Есім Жүкеұлы Сегізбаев – Т.Жүргенов атындағы өнер академиясында театр, кино мамандарын дайындаған ұлағатты ұстаз, үлкен парасат иесі болды.
1978 жылдан негізгі кәсіби мамандығы «Актер шеберлігі» пәнінен Қазақ ұлттық өнер академиясында оқытушы, аға оқытушы, доцент, профессор лауазымдарын атқарды.
Ол бүгінге дейін «Актер шеберлігі» пәнінен дәріс беріп, өз шеберханасынан драма және кино, музыкалық театр актерларының 13 тобын (200-ден астам шәкірттерді) оқытып шығарды. 15 дипломдық спектакль қойды. Одан білім, тәрбие алған талантты шәкірттері Астана мен Алматыда және Қазақстанның барлық қазақ театрларында, радио- телестудияларында, өнер мекемелерінде қызмет етіп жүр.
Есім Сегізбаевтың жарқын бейнесі қазақ елінің жүрегінде мәңгі сақталады.
Бақұл бол, АҒА!
М.Әуезов атындағы Қазақ Мемлекеттік академиялық драма театрының ұжымы Қазақстан Республикасының Мәдениет қайраткері, Қазақстан Білім беру ісінің Үздігі, «Еңбек ардагері» медалі, Бауыржан Момышұлы атындағы «Батыр шапағаты» медалі, «Парасат» ордендерінің иегері, Қазақ Ұлттық өнер академиясының профессоры Есім Жүкеұлы Сегізбаевтың қайтыс болуына байланысты қайғысына ортақтасып, жақындары мен туған туыстарына көңіл айтады.
Театр, кино майталмандарын қанаттандырған ұлағатты ұстаздың топырағы торқа, иманы жолдас болсын!