ШЫН ҚҰРМЕТКЕ КІМ ЛАЙЫҚ?
немесе қошеметтің жолы мен жөні
Тәуелсіздігіміздің 25 жылдығы қарсаңында жаппай марапаттау науқаны жүрді. Сонда байқағаным, құрметке ие болғандардың қатарында шынымен ерен еңбегі еленген ел ағаларымен бірге өнерге кеше ғана келген «жұлдыздар» мен халқына қай еңбегі сіңгенін өзі де онша түсінбейтін шала дүбәралар бар екен. Әлеуметтік желілерде жаппай суреттерін жаудырған, омырауына орден таққан көпшілікті көріп, «осының барлығы құрметке шын лайық па екен?» деген ой туғанын несіне жасырайын. Бұнымыз «байдың асын қызғанған байғұстығымыздан» емес, әрине. Бұрынғыдай желдің өтінде, малдың соңында жүрген шопанынан бастап, егістік даласындағы диханына дейін назардан тыс қалдырмай ісін елге үлгі етіп, өзін құрметке бөлейтін заман келмеске кеткен. Алайда, шын мәнінде құрметке лайық іс атқарып, нардың жүгін көтеріп жүрген азаматтар ел арасында жетерлік. Оларды кім ескеріп, еңбегін кім елеп жатыр? Төредей төбемізге көтеріп, сый-сияпатты аямай төгетін спортшыларымызға көрсетілетін құрметті жетістікке жеткен өзге сала мамандарынан аяп қалатынымыз неліктен? Осы біз кімдерді құрметтеп жүрміз, анығында шын қошеметке кімдер лайық? Бүгін осы сауалдарды тақырыбымызға өзек етіп көрдік.
Алтай Тайжанов,
М.Оспанов атындағы Батыс Қазақстан мемлекеттік медицина университетінің Әлеуметтік-саяси пәндер кафедрасының меңгерушісі, философия ғылымының докторы, профессор
МАРАПАТ ЖАСЫ МЕН ІСІНЕ САЙ БЕРІЛСЕ
Қашаннан мұсылман қауымда, оның ішінде қазақта да құрмет-қошемет өзінің болмысымен, азаматтығымен әр түрлі салада ерен іскерлік көрсеткен, еңбегін сіңірген, үлгі-өнеге болған адамдарға лайық. Оларды марапаттаудың жолдары да әрқалай. Алайда, құрмет иесіне берілетін атақтар мен марапаттар адамның жасы мен еткен еңбегінің көлеміне байланысты төменнен жоғары қарай тағаланып отырғаны жөн болар еді. Бұл адамның өсуіне де, ынталануына да, азамат ретінде қалыптасуына да зор әсер етері хақ. Ал енді шын лайықтылар емес, көлденең көк аттылар Бәкеңнің, Сәкеңнің арқасында медаль, ордендерге ие болып жататын болса, бұл марапаттар мен құрметтер көптің алдында өзінің мәнін жоғалтып алмақ. Әсіресе, жас ұрпақтың әділдікке деген сенімі азаяды. Бара-бара көпшілік «ой бұл нағыз иесін табатын нәрсе емес қой» деп қолын бір-ақ сілтейтін болады. Қазірдің өзінде «бәленше түгеншенің туысы екен, ана атақ сатылады екен» деген секілді қаңқу сөздер көп айтылатыны жасырын емес. Бұл – бірінші мәселе. Екінші мәселе, осы көрсетілген құрметтерге лайық нәрсенің бірі атақ, орден беру ғана емес, халықтың қалаулысына айналдыру. Яғни әр түрлі деңгейде депутаттыққа сайлау. Себебі, біздің түсінігімізде депутат халықтың қалаулысы. Ал бүгінгі күнгі сол депутат корпустарымызға қарайықшы. Шетінен байлар, байшыкештер, жеке бизнесі бар азаматтар. Олар депутат бола жүріп, қара бастарының қамын күйттейді. Шаруаларын біраз дөңгелетіп алғаннан кейін орден, медаль алғылары келе бастайды. Адам баласы өзі қанағатсыз келеді ғой. Қарап отырсаңыз, біздің Парламенттегі депутаттардың орден алмағаны жоқ. Ал негізінде орден кімдерге берілуі тиіс? Оған мәдениетіміз бен әдебиетімізге, өнерімізге, ғылымымызға, әлеуметтік-экономикалық салаларымызға ерен еңбегі арқылы ықпал етіп, дамытқан адамдар лайық емес пе?! Сонда біздің Парламентте отырған депутаттар трактор айдап, жер қазып жатыр ма? Әлеуметтік-экономиканы еселеуге білек түре кірісіп жүр ме? Әйтпесе олар қалай орден алып жүр? Олардың міндеті заңды жетілдіру, заңды қорғау, заңды қабылдау еді ғой. Ендеше олар қабылдаған заңдар неге біріне-бірі қарсы шығуда? Айталық, кейін әлеуметтік қақтығыстарға әкеліп соққан «Жер туралы Заңды» да қабылдаған депутаттар. Ал сол заңды қабылдауға қатысқандардың бірқатары орден алды. Менің ойымша, осындай әрекеттер шын құрметке лайықты адамдардың көзден тысқары, елеусіз қалуына әкеліп соғады. Ал ол адамды, әсіресе жас ұрпақты еңбекке, адамгершілікке үйретпейді. Олардың бәсекеге қабілеттілігін арттырмайды. Керісінше оларда бәрібір еңбегіңді ешкімді елемейді дейтін немқұрайлылық пен немкеттілік пайда болады.
1999 жылы біздегі берілетін құрметті атақтардың көпшілігі қысқарып қалды. Нақтырақ айтсақ, «Қазақстанның ғарыш-ұшқышы» деген атақтан басқасының барлығы алынып тасталды да, оның орнына «Қазақстанға еңбегі сіңген қайраткер» деген атақ енгізді. Менің ойымша, біздің осыдан ұтқанымыз шамалы. Бұрынғы уақыттарда білім саласының үздігі, мәдениет саласының қайраткері, халық әртісі, еңбек сіңірген әртіс, т.б. болатын. Ал қазір жасы отызға келмеген немесе жаңа келген, ыңырсып ән салып, секеңдеп билеп жүргендердің бірталайы «Қазақстанға еңбегі сіңген қайраткер» атанып үлгерді. Қателеспесем, Қайрат Нұртаста да осы атақ бар-ау. Қай уақытта адам отыз жасына дейін халқына еңбегін сіңіріп үлгереді? Әлде секіріп-бақыра бергеннен халқыңа еңбегің сіңе ме? Қалай айтсақ та біздің бүгінгі жағдайымыз осындай. Сондықтан жас ерекшелігіне қарай берілетін бұрынғы құрмет, марапат, атақтарды қайтару керек деген ойым бар. Бұл нәрсеге біз өте жауапкершілікпен қарап, атақтың кімдерге берілетінін қадағалауымыз керек. Ал бүгінгі күні атақ пен даңқты негізінен әртістер, ара-тұра журналистер мен жазушылар алып жүр. Ғылым саласындағыларға берілуі өте сирек. Тағы бір айта кететін нәрсе, құрмет пен марапат тек Алматы мен Астанадағыларға ғана тиесілідей көрінеді кейде. Яғни нағыз құрметке лайық адамдардың еңбегін бағалап, жетістігін ұрпаққа үлгі етудің орнына, мұны бір науқанға айналдырып жіберген жайымыз бар. Тағы бір мәселе, бізде барлық атақ-марапат жылына бір-ақ рет, тәуелсіздік мерекесі қарсаңында беріледі. Адам ерен еңбекті жазда немесе қыс мезгілінде көрсетті ме, ол өз ісінің нәтижесі бойынша белгілі бір марапатқа ұсынылуы тиіс. Адамға айтылатын алғыс пен берілетін атақ-даңқ та дер кезінде болғаны жақсы. Әрбір атақ өзінің лайықты егесін табуы керек. Бізде қазір алды үш-төрттен орден алған әкімдер бар. Тіпті кей шенеуніктердің атын көшелерге, елді мекендерге, өндіріс орындарына беріп жатқаны жасырын емес. Мәселен, біздің әкелеріміз, олардың қатарлары ерен еңбек етті. Олардың арасында Ленин орденін, Социалистік Еңбек Ері атағын, Еңбек Қызыл Ту ордендерін алғандары бар. Ал солардың көбінің аты ұмыт болды. Мүмкін іздеушісі, сұраушысы, болмаса артында қалдырып кеткен байшыкеш ұрпағы жоқ шығар. Ал осындай әр саладағы еңбегі ерен адамдарды жас ұрпаққа үлгі ету, есімін естен шығармау мемлекеттің міндеті емес пе еді.
Бүгінгі күні ғалымнан бұрын спортшының қошеметке бөленуі қалыпты жағдайға айналды. Қазақ халқы о баста спортты ойын деп түсінген. Қазақтың ұлттық ойындары жиын-тойлар мен астарда адамды сергіту үшін ұйымдастырылған. Алайда, халқымыз ондай ойындарды еңбекпен салыстырғанда төмен қойған. Еңбек қашан да бірінші кезекте тұрған. Мәселен, қазақтар сәбиді «еңбектейді» десе, орыстар «ползает» дейді. Яғни сәбидің алғашқы қозғалысы да еңбек. Бабаларымыздың қашаннан «асық ойнаған азар, доп ойнаған тозар, бәрінен де қой бағып, көтен, мойын жеген озар» деп еңбекті дәріптеген. Бірақ ел дамыған сайын адамның пайым-түсінігі өзгереді. Осы тұрғыдан қарағанда бүгінгі күні спорт мемлекеттің атын шығаратын, қай тұста оның даңқын көкке өрлететін, әлемге танытатын біздің бір атрибутымыз болып қалды. Ендеше біз спортқа да жеңіл-желпі қарамауымыз керек. Олимпиада чемпиондарын Елбасының өзі қарсы алып, марапаттап, алғысын білдіруі де сондықтан. Дегенмен, спортшыларға бөлінген қаржы мен жасалатын қамқорлық біздегі басқа еңбек адамдарынан, ғылым мен өнер, техника мен өнеркәсіп, ауылшаруашылығы салалары мамандарынан әлдеқайда жоғары болуын дұрыс деп ойламаймын. Құрметтесін, марапаттасын, бірақ оларды өзге сала мамандарынан бөле-жарып, ерекше ілтипатқа бөлеу меніңше дұрыс емес. Бізде қазір ғылымға жөнді көңіл бөлінбей жүргені көпшілікке мәлім. Сондықтан сахнада секіріп, ән салып жүрген бала-шаға ғылым адамынан әлдеқайда сыйлы, дәрежесі жоғары. Басының санасы ғалымдардың балағына келмейтін көп адамдар осы күні зор құрметке ие болып, «не ішем, не жейм» демей шалқып жүр. Бұл өте қауіпті тенденция. Өйткені, ғылымы дамымаған, оқуы жетілмеген ел ешуақытта, ешқашан әлемдік кеңістіктен өз орнын ала алмайды. Осыны терең түсінген Иосиф Сталин кезінде «ғылымға бөлінетін қаржыны жүз есе көбейтіңдер» деген екен. Сол тұстағы ғалымдар кеңес үкіметін космостық державаға айналдырғаны да соның нәтижесі болса керек. Ендеше өмір ән салып, би билеп жүре беретін жеңіл нәрсе емес. Өмір – қуаныш пен қайғының қат-қабат келуі. Соның ішінде мұңды сейілтіп, қайғыны азайтатын қуанышты күндердің көп болғаны жақсы, әрине. Ал өміріміздің жайлы болуы табысымыздың молдығы мен еңбегіміздің дұрыс бағаланып, дер уағында еленуіне байланысты.
Өміржан Әбдіхалық,
журналист
ЕҢБЕК ЕТКЕН ӘР АДАМ ЕЛЕУСІЗ
ҚАЛМАСА ИГІ
Үлкен жақтан алсақ, әрбір адам құрметке лайық қой.
Ел іші әлі де болса шын құрметке лайық азаматтарды біледі деп ойлаймын. Ал шен-шекпендінің алдында құрақ ұшу қай заманда да бар әдет. Мұндай әдет жалпы жұртқа ортақ деуге келмес. Жетістік жеке адамның ісі ғой. Адамның өз қажыр-қайраты, еңбегі, табандылығы, арман-үмітіне байланысты деп ойлаймын. Маған салсаңыз, қарапайым еңбек адамына көп көңіл бөлініп, сол адамдардың еңбегі еленіп отыруы керек. Мәселен, көше тазалаушы адамдар Тәуелсіздіктің 25 жылдығы медалімен марапатталса болар еді. Олар қоғамға, адамдарға нақты әрі нәтижелі қызмет көрсетіп келеді ғой. Сол сияқты еңбегі көзге көріне бермейтін, елеусіздеу болғанымен таза әрі қарапайым еңбек адамдарының табан ет, маңдай тері бағалануы тиіс. Мемлекет сондай миллиондаған қарапайым еңбеккерлердің арқасында өсіп-өркендеп жатады. Екінші жағынан мұндай адамдарға құрмет еңбек құнын арттырып, жұмыстың жақсы я жаманы болмайтынын, еңбек еткен әр адам елеусіз қалмайтынын қоғамға жеткізетін идеологиялық дүние болар еді. Кез келген ел қарапайым еңбек адамын бағалау арқылы ғана қоғамды тұтастырып, адам капиталын арттыра алады деп ойлаймын. Әр адам өз қызметінің маманы болса, бәсекеге қабілеттілік деген сол шығар.
Ал спортшыларға деген зор қошеметке келсек, бұл теңсіздік мәселесі ғой. Меніңше, құрмет, назар бәріне бірдей болуы шарт. Әрі ол нақты, даусыз жетістік жасаған адамдарға жасалуы керек-ақ. Қазір билік өзіне жақсы ұпай, бедел беретін салаларға басымдық беріп, соны қоғам назарына көп ұсынады. Әйтпесе, түрлі салада өз еңбегімен үлкен көрсеткіштер көрсетіп жатқан жастар көп. Сондай дарынды жастардың еңбегі қажетті дәрежеде еленбеген соң көптеген жақсы мамандар шетелге кетіп, өзінің білімін, талантын сол жақта жұмсап жатыр. Сондықтан мемлекет бұл мәселені мықтап ойланып барып, қолға алғаны жөн. Бір күндік жеңістің емес, бүгіннен басталып, болашаққа апаратын түпкілікті мәні мен түбірлі маңызы, нәтижелі көрсеткіші мен жалғастығы болатын дүниелерді көтермелеп, серпін беруі қажет-ақ.