Егемендіктің 25 жылдығы еліміздің әр аума­ғын­да орындалып жатқан игі іс-шараларға  негіз болып жатқаны мәлім. Атаулы мереке қарсаңында ұлт болашағы мен тұрмысына қажетті бірталай жоспарлар іске асуын Елбасымыз­­дың сындарлы саясатының көрінісі деп білеміз. Жетісу жерінің тарихында бұ­рын жазылмаған оқиға тір­келді. Қа­раша айының соңғы күні Алматы облысы халқының риясыз қуа­нышына, жүрекжарды тілегі мен мол алғысына толы болды. Атап айтсақ, 30 қарашада облыс аудандарында төрт бірдей жо­баның тұсауы кесіліп, халық игі­лігіне берілді. «Қуанышты бө­ліссең, көбейеді» демекші, об­лыс жұртшылығының осынау шат­тығына біз де куә болып қайтқан болатынбыз.

25 жылдыққа – 25 балабақша

Тұсауы кесілген төрт бірдей жо­баның ішіндегі көптің көңілін аулаған, әрі сауапты, әрі болашақ ұрпақ үшін тиімдісі бір күнде бір­дей есігін ашқан 25 балабақша бол­ды. Бұл жаңалыққа бәрінен бұ­рын жұмысбасты ата-ана мен асық ойнаған бала  ерекше қуан­ды. Қазіргі таңда балабақша мә­селесі қай ауданды алып қара­саңыз да шешімін таппай тұр. Қай жерге бас сұқпаңыз, кезегін за­рыға күткен бала жетектеген ананы көресіз. Балабақша тап­шылығы белең алған бүгінгі уа­қытта мынандай елеулі жаңа­лық­қа таңғалмасымызға бол­ма­ды. Бір емес, жиырма бес де­ге­ніңіз бүткіл Қазақстан бойын­ша сирек кездесетін сан. Бұл уа­қиғаның елімізге екі түрлі бас­ты пайдасы бар: біріншісі, бү­тін бір халықтың әлеуметтік ахуа­лын түзетіп отыр. Екіншісі, «Мәң­гілік Елдің» болашақ мұ­­ра­­герлерін тәрбиелейтін ал­ғаш­қы баспалдағы қаланды. Ба­лабақшалардың салтанатты ашылуынан бар көріп-білгеніміз бір-ақ нәрсе: бейбіт күннің ба­қытты балалары.
Өскелең ұрпақтың келе­ше­гі жолында ашылған бала­бақ­шалардың артықшылығын атап өтпеске болмас. Қаратал ау­даны, Үштөбе қаласында бой кө­терген 320 орынды «Балбөбек» балабақшасы сөзімізге толы­ғы­мен дәлел болып отыр. Аталмыш балабақшаның ашылуында өңір басшысы Елбасымыздың ба­лаларды мектепке дейінгі тәр­биемен қамту туралы тапсыр­ма­сын орындау бағытында  ат­қа­ры­лып жатқанын  атап өтіп:
– Бүгінгі ашылып отырған ба­лабақшалардың барлығы да жаңа талаптарға сай, бала­лар­дың жан-жақты дамуына барлық жағдай жасалған. Кіш­кентай балдырғандардың бо­ла­шақта ақылды, алғыр болып өсуіне ықпал ететініне се­­не­мін. Шын жүректен бар­шаңыз­ды Тұңғыш Президент күнімен және Қазақстан Тәуел­сіздігінің 25 жылдығымен құт­тықтаймын! Толайым табыстар мен отбасыларыңызға береке ті­леймін, – деп жүрекжарды ті­ле­гін білдірді. Үштөбе қала­сын­дағы бұл балабақшаның ерек­шелігіне таңданысымызды жасыра алмадық. Себебі, мұнда бір топ инклюзивті, яғни тілінде мүкісі бар балалармен жұмыс істесе, екін­шісі денсаулығы әлсіз, жиі ауыратын бүлдіршіндерді тәулік бойы тәрбиелеп, сауы­ғуы­на үлес­терін қоспақ. Тіпті, сол ба­­­лаларға арналған жедел са­ты­ны да байқадық. Басқа да балабақшаларды күнде көріп жүрміз  ғой. Бірақ  нақ  денсаулығы нашар бүлдіршіндерге жағдай жасайтын балабақшаны жиі жолықтыра  бермейміз. Бұл  бір от­ба­сыға  ғана емес, барша қоғамға пай­далы іс. Біз көрген ойын залы, жа­тын бөлме, меди­циналық ка­бинет, психолог, ло­гопед бөл­мелері мен физиотерапия ка­бинеті көңіл жадырататындай. Екі қабатты ғимараттағы му­зыкалық  және  гимнастика залдары ең соңғы үлгідегі құ­рал­дармен жабдықталған екен.
25 балабақшаның басым бө­лігі Алматы қаласының маңын­да орналасқан халық тығыз қо­­­ныстанған аудандарда ашыл­ға­нын тілге тиек ету керек. Мә­се­лен, Талғар ауданында жалпы са­ны 800 орынды 9 балабақша, Іле ауданында 520 орынды 7 ба­ла­бақша, Жамбыл ауданында  470 орынды 4 балабақша, сол сияқ­ты Еңбекшіқазақ ауданында 2, Тал­дықорған қаласында және Пан­филов, Қаратал аудандарында бір-бір балабақшадан бой тү­зеді.
25 жылдыққа берілген 25 ба­ла­бақшаның ахуалын байқап, ба­ғамдағандай болдық. Кейінгі ұр­пақтың тәрбие алар орны ой­да­ғыдай болса, нақ орындалған мақ­сат сол болмай ма?!

Жетісу жаңалығы: жаңа ГЭС

Мереке қарсаңында Сарқан ау­данының Лепсі өзенінде қуат­ты­лығы 17 МВт болатын шағын ГЭС-2  іске қосылды. Жаңа ны­сан­­ның салтанатты ашылуына об­лыс әкімі А.Баталов қатысып, Қа­зақстандағы тау суларының гидроэнергетикалық қорының 65 % Алматы облысында екенін ай­та келе, өңірде су және жел энер­гетикасын дамытудың арнайы бағдарламасы әзірленгенін, соның аясында жаңа ГЭС ашылып отырғанын атап өтті.
–  Осы ГЭС-ті  іске қосудың нә­тижесінде  өңірдегі электр энер­гия­сының дефициті сағатына
68 миллион кВт-қа азайды. Бұл өте маңызды жетістік, дегенмен ме­же емес. Қазіргі кезде Қора өзе­нінде қуаттылығы 26-дан 29 МВт-қа дейінгі тағы 3 ГЭС-тің құ­рылысы жүріп жатыр. Оған қоса тағы бірнеше нысанның құ­рылысы жоспарланған. Мұның барлығы өзіміз өндіретін электр энер­гиясының тапшылығын азайтып, облыстың электр қуаты үшін сыртқа тәуелді болмауына және жаңартылған энергия көздерін да­мытуға ықпал етпек. Сонымен қатар, компания­лар жоспарлап, салған ГЭС-тар ЭКСПО – 2017» көрмесіндегі «Қазақстан» павильонынан көр­некті орын алатын бо­ла­ды, – деді өңір басшысы сөз соңын­да.
Нысанның салтанатты ашылуынан кейін қатысушылар жаңа ГЭС ғимаратының ішін аралап кө­ріп, жаңа үлгідегі нысанның жұ­мыс істеу ерекшеліктерімен та­нысты. Атап өтсек, Сарқан ау­даны Лепсі өзеніндегі шағын ГЭС-2  жылына орта есеппен 67,78 миллион кВт/сағ. электр  энергия­сын өндіреді. Құрылыстың сме­та­лық құны  4,2 миллиард  теңгені құраған. Құрылыс жұмыстары 2014 жылдың тамыз айында бас­талды. Жобаның авторы және бас мердігері – 500 кВ-қа дейінгі электр желілері мен подстанцияларды жобалау, салу, жаңғырту мен жөндеу саласында еліміздің на­рығында алдыңғы қатарда са­налатын «АСПМК-519» ЖШС хол­дингі. Тұрғылықты халыққа жа­ғымдысы сол, жаңа нысан іс­ке қосылғаннан кейін 17 адам тұрақты жұмыспен қамтылған.

Мерейтойлық мүсін

Тәуелсіздігіміздің ширек ға­­­­сырын арқау етіп, Алма­ты об­лысының орталығы Тал­дықор­ған қаласында еліміздің Тұңғыш Президенті Нұрсұлтан Әбішұлы Назарбаевтың мүсінінің ашылуы өтті.  Өткенге оралсақ, осыдан бір­шама уақыт бұрын Елбасы мүсінін орнату туралы баста­ма­ны жетісулық ардагерлер кө­теріп, облыстық мәслихат де­путаттарының қолдауына ие бол­ған болатын. Игі бастама жү­зеге асырылып, Президент мү­сіні Талдықорған қаласының ор­талық алаңындағы Қазақстан Рес­публикасының Тұңғыш Пре­зидентінің скверіне орнатылды.
Көптің басын қосқан жиын Қа­зақстан Республикасының Мем­лекеттік Гимнімен  басталып, мүсін бейнесі көрсетілген  соң, құт­тықтау  сөздермен  жал­­ғас­ты. Шаһар басшысы А.Баталов сөз алып, ізгі тілегін былайша жет­кізді:
– Елбасы, Тұңғыш Прези­дент Нұрсұлтан Әбішұлы – қан­дай құрметке болсын лайық тұл­ға. Президентке деген хал­қы­ның алғысы, елінің ақ тілегі шек­сіз. Бүгінгі шара – ел риза­шы­лығының  айқын көрінісі. Бір­лігі мен берекесі жарасқан, ыры­сы мен ынтымағы тасыған, Мәң­гі­лік ел болуды мұрат еткен,
кө­п­ұлт­ты халқымыздың айбыны ар­та берсін!
Айта кетейік, аталмыш мү­­­­сінді тұрғызуда  ҚР  құр­мет­ті сәулетшісі, «Құрмет» орде­ні­нің кавалері, 40-тан астам ескерткіштің авторы Қазбек Жарылғапов және та­нымал мүсінші, Суретшілер ода­ғының мүшесі Мирлан Аз­ма­ғанбетовтың еңбегі көп. Ес­керт­кіштің биіктігі 4,2 метр, қо­ладан жасалынған. Ал тұғы­ры­ның биіктігі 4,5 метр, ол қоңыр граниттен тұрғызылған екен. Ескерткіштің жан-жағы Қа­зақстан Республикасының мем­лекеттік рәміздерінің аллея­сымен толығады деп жоспарлануда.

Бүгінгінің қуанышы – бес жұлдызды қонақ үй

Мерейтой қарсаңында Тал­ды­қорған қаласында жаңа та­лапқа сай қонақ үй кешені пай­далануға берілді. Қаланың  оңтүстік-батыс ауданында  орна­ласқан 16 қабатты «Көктем Гранд» көпсалалы қонақ үй кешені жеке инвестордың қар­жысына салынған.  Тұсауын кес­кен облыс әкімі А.Баталов:
– Тәуелсіздіктің 25 жылдығы ая­сында ашылып отырған Тал­дықорған қаласындағы «Көктем Гранд» қонақ үй кешені қаладағы ең заманауи, соңғы үлгідегі, жо­ғары класты кешен болғалы тұр. Астанада өтетін «ЭКСПО – 2017» ха­лықаралық көрмесінің өтуіне бай­ланысты жоғары деңгейдегі қо­лайлы жағдай қарастырылған қонақ үйлерге деген қажеттілік өсіп отыр. Шетелдік туристерге ұсы­нылған нысандар тізімінде Ал­маты облысының да көрнекті орын­дары енгізілген. Туристік са­ла өңірдегі ең маңызды салаға ай­налып келеді. Сол себепті де об­лыс орталығы Талдықорған қа­ласын көркейте түсу – біздің бас­ты мақсатымыз. «Көктем Гранд» қонақ үй кешені жеке ин­вестицияға салынған, ортақ іске өз үлесін қосып, Тал­ды­қорғанның тартымды қа­ла болуына атсалы­сады деп се­немін, – деп атап көрсетті.

М.ӘБІШ.