ӨТПЕЛІ КЕЗЕҢНІҢ ӨТЕЛІ КІМДЕ?
Қытай халқының «Құдай өтпелі кезеңде өмір сүруден сақтасын» дейтін сөзі бар. Бағымыз ба, сорымыз ба, кім біледі, әйтеуір, осы өтпелі кезеңде ғұмыр кешуді Құдай біздің басымызға салыпты. Енді міне, алқымнан алған дағдарысты, бір-бірін күштеп, алдап-арбап, тіпті ұрлап болса да әйтеуір пайда тапқысы келіп тұратын халық психологиясын, өзін зор, өзгені қор санайтын басшылар менмендігін, ойын-сауыққа әуес келетін жастардың жеңіл ойлылығын өтпелі кезеңнің келеңсіз сипатына балап қойып, үнсіз бақылап отырған жайымыз бар. Сонда өтпелі кезең әлі қанша уақытқа созылуы мүмкін? Құндылықтары өзгерген, ұстанымдары ауысқан, жеке бас пайдасынан өзгені ойлаудан қалған бұқараны Абай айтатын «малдан басқа мұңы жоқ» тобырға айналды деп сынау ойымызда жоқ. Алайда, осы бетімізбен кете берсек, қайда барамыз? О баста бір формациядан екіншісіне ауысуымыздың өзі елді біраз дағдарысқа ұшыратты. Ел еңсесін енді тіктейді-ау деген тұстарда қайта айналып келіп соққан дағдарыс осы күні қазақты тіпті бас көтертпей тастаған секілді. Кейбіреулер жалпы қазақ қоғамы дағдарысқа бейім қоғам деп жатады. Мүмкін ол да рас шығар. «Тарта жесең тай қалар, қоя жесең қой қаларды» айтқан бабаларымыздың бұрынғы ынсабы мен обал-сауапты ойлаған ізгі қасиетін бүгін неге есімізден шығарып, ойымыздан өшіріп алдық? Сарапшыларымыз бүгін осы сауалдарды әңгіме өзегі етпек.
Нұрлан ЕРІМБЕТОВ,
саясаттанушы
БІЗГЕ КЕРЕГІ – ШЫНАЙЫЛЫҚ
– Менің ойымша, Жаңа Қазақстан бәсекеге қабілетті ел болуы керек. Қазір ауылшаруашылығы, өнеркәсіп, іскерлік секілді барлық салаларда бәсекелестік қалыптасып келе жатыр. Бұл – қуанарлық жағдай.
Өзіміз куә болып отырғандай, қазір көп елдерде ауызбіршіліктің жоқтығынан қиын жағдайлар орын алып отыр. Сондықтан елімізге бүгін ұйыған ынтымақ ауадай қажет. Ұлтаралық, дінаралық мәселелерді қозғайтын провокаторларға елікпей, татулықты сақтауға тырысуымыз қажет. Тыныштық пен бейбітшілік тәуелсіз еліміздің басты құндылығы.
Көңіл бөлетін тағы бір маңызды мәселе – жастар тәрбиесі, жастар саясаты. Біз балаларымызды әлеуметтік желілерден алып кетуіміз керек. Кішкентай бүлдіршіндерді әлеуметтік желіге жегу қылмыспен барабар дер едім. Баланы түрлі қосымшаларға қатыстырып, ерігіп бос отыруына мүмкіндік бермеген жөн. Баламен бірге отырып әңгімелесу, кітап оқып беру, театр мен киноға алып бару – оны үлде мен бүлдеге орап, қолына айфон ұстатып, қалтасына ақша салып бергеннен әлдеқайда қайырлы. Бала үшін уақыт бөлуге жұмыстан қол тимейді деп өз-өзімізді ақтаймыз, ертең бұның ақыры үлкен өкінішке алып келетінін неге ескере бермейміз?
Еліміз жер көлемі жағынан дүниежүзі бойынша тоғызыншы орында деп мақтанамыз. Ал сол жердегі халық саны кей мемлекеттердің бір ғана қаласының тұрғындары санымен тең. Біз осы жерді сақтап қалу үшін ынтымағымызды нығайта отырып, жұдырықтай жұмылып ел мүддесі үшін қызмет етуіміз керек. Қазір ешкім біреудің байлығы мен жерін қару кезеніп келіп тартып алмайды. Сыртқы жау біреудің дүниесіне еге болу үшін сол елді өз ішінен ірітуге тырысады. Халықты бір-біріне айдап салып, ел іргесін сөгуге күш салады. Бұл әдіс бүгінде кеңінен қолданылып жүргенін көзіқарақты оқырман жақсы біледі. Ішінен іріп-шіріген ел өзі-ақ ел болудан қалады. Осыдан сақтанғанымыз абзал.
Дәл қазір өтпелі кезеңді бастан кешіріп отырғанымыз рас. Бірақ бүгінгі дағдарысты бізден өзге де көптеген елдер өткеріп жатыр. Қазір біріншіден, халық арқа сүйеп отырған мұнай да, уран да азайып жатыр. Екіншіден, жұмыссыздық кең етек жайып барады. Бірақ жұмыс жоқ деп қарап отырып, аштан өлуге болмайды ғой. Ауылыңда, ауданыңда жұмыс жоқ па, жұмыс бар аймақтарға көш. Қарап жатуды өзіңе ар санап, жалқаулықты тастап, қайтсем де балаларымды жеткіземін деп еңбектенсең, ісің далаға кетпейді. Еңбегіңнің жемісін жейсің. Осы тұста тағы бір үлкен мәселенің шеті шығады. Бұл – балаға мамандық таңдау мәселесі. Мына заманда баланың мамандық таңдауда қателесуіне жол бермеуіміз керек. Бүгін қай сала мамандарына сұраныс басым, баланың икемі қай шаруаға келіп тұр деген секілді алғышарттарды ескере отырып, балаға бағыт-бағдар көрсету – әр ата-ананың міндеті. Бұрынғыдай балам бастық болады деп бос үміттендіретін, экономист пен заңгер болса деп қиялдайтын уақыт өтіп кетті. Осы күні қалтасында екі-үш дипломы бар жастардың көбі жұмыссыз жүр. Бірталайы қара жұмысқа жегілген. Бұған кімді кінәлаймыз? Елдің бәрі бастық, қаржыгер, заңгер болса, басқа жұмысты кім істейді. Газет-журналды қарап отырсақ, қоғамда техникалық мамандарға, инженер, технологтарға сұраныс басым. Адал еңбегімен нанын тауып жеуі үшін, өзгеден тіленбей өз күнін өзі көруі үшін баламызды сондай салаларға мамандандыруға тырысуымыз керек.
Түтіні түзу шығатын мықты ел болу үшін билік те, халық та бір-біріне адал болуы керек. Әділдік орнаған қоғам ғана болашаққа сеніммен қадам баса алады. Билік халықты алдарқатпай, жағдай қиын болса оны ашық айтып, сабыр мен үнемшілдікке шақырсын. Шынайылықты байқамау мүмкін емес қой. Шынайылықты көрген халық та жұдырықтай жиылып бар нәрсеге дайын болуға тырысады. Менің байқауымша, қазір билік тарапынан осындай шынайы әңгімелер айтыла бастаған секілді.
Сейдахмет ҚҰТТЫҚАДАМ,
саясаттанушы
«МЫСЫҚТЫҢ ТҮСІ МАҢЫЗДЫ ЕМЕС,
ТЕК ТЫШҚАН АУЛАСА БОЛДЫ»
– Жаңа Қазақстан деген – ел жағдайы жаңарды, халықтың күнкөріс деңгейі көтерілді, білім мен мәдениет жоғарылады деген сөз. Ал бізде осы көрсеткіштер байқала ма? Қай саланы алсаңыз да ақсап тұр.
Соңғы уақыттары жоғары жақта кадрлар өзгеріп жатыр. Жауапты орындарға халықтың сенімін ақтай алатын мықты азаматтар келе бастағаны үмітімізді үкілей түседі. Биліктің саясаты кадрларға байланысты ғой. Кадрлар мықты болса, саясат мықты болады, тасымыз өрге дөңгелейді. Жақында үкімет басына келген Е.Сағынтаев та, И.Тасмағамбетов те мықты жігіттер. Осы кісілердің аянбай еңбек етуіне жағдай жасалса, біраз мәселе шешімін табады деп сенемін.
Жалпы, өтпелі кезең дегеннің мәнін біз дұрыс түсінбей жүрген секілдіміз. Із қалдырмай өтеді де кетеді деген түсінік қате. Мысалы, өткен ғасырдың отызыншы жылдары өтпелі кезең болды. Сол өтпелі кезең қазақтың басына қандай қасірет алып келді? Тарихымыздан өшпестей орнын ойып тұрып алған жоқ па? Сондықтан біз осы кезеңнен абыроймен шығып кету жағын ойлауымыз керек еді. Бұл кезең бізде ұзаққа созылып бара жатқаны рас. Жиырма бес жылдан бері өтпелі кезеңнің өткелінен өте алмай келеміз. Менің ойымша, біз енді өтпелі деген ұғымды қойып, жаңғыру жолына түсуіміз қажет. Осы кезеңде мінезімізге сіңіп, әдетімізге айнала бастаған бірталай жағымсыз сипаттардан арылу да кезек күттірмейтін мәселе. «Әйтеуір біртіндеп кетеді ғой, бұл әдеттен ақырындап арыламыз» деп немқұрайлылық танытуға болмайды. Анығында, бұл жайдан-жай кете салатын нәрсе емес. Қазақта «ауру қалса да әдет қалмайды» деген сөз бар ғой. Қойдан қозы, жылқыдан құлын туатыны секілді, ұрыдан ұры туатыны заңдылық. Ал неғұрлым заң бұзушылар көбейген сайын, әділетсіздіктен көз ашпаған халықтың ұнжырғасы түсе бастайды.
Бізде қазір жалпақ ұрандарды көп айтатын жалған патриоттар көп. Сенімге кіру үшін әр сөздің мағынасы өзіне сай болуы керек. «Бізде бәрі керемет, алдыңғы қатарлы елдердің сапында келе жатырмыз» деген сөздер ешкімді қуанта алмайды. Себебі, қара халықтың тұрмысы күннен-күнге қиындау үстінде. Әлемдік сараптаулардың нәтижесіне қарасаңыз, Қазақстан әлемдік көштің соңына әрең-әрең ілесіп келе жатқанын байқайсыз. Еліміз бен жеріміздің тұнып тұрған байлығын өз игілігімізге пайдаланып та үлгере алмай қалдық. Қай елді білімді, әділ азаматтар басқарса, сол елдің болашағы жарқын. Ал елді алаяқтар мен жемқорлар билесе, ол елдің болашағына балта шабылды деген сөз. Сондықтан да кадр саясатына баса назар аударуымыз қажет.
Кеңес кезеңінде жап-жақсы жұмыс жасап тұрған өндіріс орындарын қираттық. Енді қайтадан сол өндірісті қолға алуға тиіспіз. Өтірік көлгірсігенім емес, жалпы қазақтар дарынды халық. Сол дарынымыз бен білімімізді ел игілігі үшін дұрыс жұмсауға күш салатын күн туды.
Біз феодализмнен социализмге секірдік, кейін социализмнен қайтып капитализмге өттік. Менің ойымша, формация деген тек қана теория жүзінде айтылатын ұғым. Ал өмірде ол әр түрлі болады. Айталық, Жапония феодализмнен бірден капитализмге секіріп кетті. Сол секілді, Араб Әмірліктері, Малайзия секілді елдер қоғамдық формацияның бірінен екіншісіне өтсе де қазір дамып, өзге елдің алдына шықты.
Негізінде көп нәрсе елдің жігерлілігіне, басшылардың көрегендігіне байланысты. Елін жақсылыққа жетелеймін деген адамға әлемде тәжірибе көп. «Қара ма, ақ па бәрібір. «Мысықтың түсі маңызды емес, тек тышқан ауласа болды» деген сөз бар. Сол секілді, феодализм ба, социализм ба, капитализм ба, посткапитализм ба бәрібір, ең бастысы халықтың әл-ауқатын көтеріп, елдің білімі мен мәдениетінің өркендеуіне жағдай жасаса болды. Мәселен, әлеуметтанушылар Жапонияда баяғы феодализмнің сарқыншақтары қалғанын айтады. Әсіресе, үлкен корпорацияларда атасы, баласы, немересі – бүкіл әулетімен өмір бойы жұмыс істеп өтеді екен. Меніңше, сол «измдердің» айтарлықтай ролі жоқ. Басты мәселе – халықтың жағдайы жақсы болғаны. Сол «изм» елге жұмыс жасап, әл-ауқатын көтерсе, біз үшін керегі осы. Ал біз қазір қай «измде» жүргенімізді де білмей қалған сияқтымыз. Социализмнен кетіп, капитализмге кіре қалдық. Капитализмнің де керемет жақсылықтарын көре алмай, тек жағымсыз тұстарымен ұшырасып келеміз. Ал қазақтың жолы бұл емес еді.
Өзінің сара жолын айқындап, дамуға аяқ басу үшін қазаққа ең бірінші әділдік керек. Қай жағынан алсақ та, қазақ қоғамы әділдікке зәру. Сотымыз бай-кедей деп алаламай әділ шешім шығарса, қарапайым жұмысшының еңбегі әділ бағаланса, көпшілік өз еңбегі мен білімі арқылы ғана жетістікке жетуді үйренсе жағдайымыз бүгінгіден көш ілгері болар еді. Тағы керек нәрсе – білім. Еш нәрседен хабарсыз я саясатты, я мәдениетті, я ғылымды білмейтін жастар бар. Өзі надан болса ол ертең қалай қызмет жасайды, елді қалай алға сүйрейді. Осындай сауатсыздықтан қорқуымыз керек.
Үшінші мәселе, біздің алға қойған мақсат-мұратымыз айқын болуы тиіс. Әр азамат ең алдымен өзінің емес, елінің мүддесін ойлайтын жағдайға жетсек, болашағымыз жарқын болар еді.
Төртінші мәселе, өз байлығымызға өзіміз ие болуымыз керек. Алайда, қазір өз байлығымыз өз қолымызда емес, тоқсан пайызы шетел азаматтарының меншігіне кетті. Сол байлықтар өз жұртымыздың игілігіне жұмсалса, жағдайымыз басқаша болмас па еді.
Біздегі әкімдер мен министрлерге қызметті беретін халық емес, жоғары лауазымды азаматтар. Сол себепті, олар халыққа емес, өзінен жоғарыдағыларға жағынуды, солардың көңілінен шығуды бірінші орынға қояды. Себебі, оның «тағдырын шешетін» биліктегілер. Сондықтан олардың айтқанын екі етуге «хақысы жоқ». Ал егер халықта олардың жұмысын бағалайтын, сын-пікірін айтып, керек кезінде орнынан түсіретін өкілеттік болса, бәрі ел үшін жұмыс істеуге мүдделі болар еді. Енді бір мәселе, бізде шенеуніктер әр үш жыл сайын бір орыннан екіншісіне ауыстырылып тұрады. Шахмат тастары секілді бір-бірімен орын алмастырғаны болмаса, сырттан көп ешкімді тағайындай қоймайтыны тағы бар. Ол өзіне жүктелген міндетті толық түсініп, үйреніп үлгермей жатып, келесі қызметке секіріп кете барады. Әзірге олардың бітіретін бар тірлігі сол үш жылдың ішінде қолынан келгенше қазынадан қарпып жеп қалу. Бізде қанша айтылса да, өзгеріссіз келе жатқан және бір үрдіс – топтық жүйе. Әркім жаңа тағайындалған қызметіне өз командасын ала барады. Бұл да қанша сыналса да әлі доғарылмай келе жатқан нәрсе. Қысқасы, шенеуніктің тағдыры халыққа тәуелді болмайынша олар елдің қамын жей қоймайтын секілді. Халық оларды іскерлігі мен адалдығы, білім-білігі арқылы саралап, бағалап отырса, сонда ғана еліміз алға басқан болар еді.
Расул ЖҰМАЛЫ,
саясаттанушы
ҚҰНДЫЛЫҚТАРЫ ӨЗГЕРГЕН ҚОҒАМ
Менің ойымша, «Жаңа Қазақстан» деген тіркесті көп қолданатын билік өкілдері осы сөздің түп-төркінін дұрыс түсіне алмай жүрген секілді. Жаңа Қазақстан – гүлденген, алдыңғы қатарлы елдермен терезесі тең, бәсекеге қабілетті ел болуы керек деген сыңайдағы жаттанды сөздерді ұсынады. Әрине, барлығымыздың көздегеніміз де осы. Бірақ «оған жетудің жолы қандай, сол жетістікке жету үшін қазақ қандай болуы керек?» деген сауалдарға жауап беруге тырыспайды. Әзірге бізде идеологиялық мазмұны беймәлім құр ұрандар көп айтылатын болған.
«Жаңа Қазақстан» ұғымы бар болса демек, «ескі (байырғы) Қазақстан» да болды деген сөз ғой. Сол ескі Қазақстанды біз қалай суреттейміз? Мүмкін, жемқорлық жайлаған, мұнайға ғана арқа сүйеген, қоғамы орыс тілді, қазақ тілді болып екіге жарылған мемлекет шығар? Жаңа Қазақстан құру үшін осы ескі Қазақстанның олқылықтарын тезге салатын алғышарттарды белгілеуіміз қажет емес пе.
Жаңа Қазақстанға, жаңа кезеңге өту туралы ұсыныстарды өз басым қолдаймын. Бірақ аты бар заты жоқ, іші мазмұнсыз дүниелерге қарсымын. Бізге керегі біріншіден, ең негізгі құндылықтарымыз – тәуелсіздік, еркіндік, әділдік, ар-ұят ұғымдарының негізінде құрылған және осы нәрселерге қол жеткізетін демократияның негізіндеріне басымдық берген, біреуден жасқанбайтын, өзгеге еліктемейтін қоғам. Екінші жағынан, өзіміздің төл дәстүріміз бен тілімізге, мәдениетімізге, тарихымызға басымдық берген, басқалардың жетегінде кетпеген өз ұлтының мүддесін бірінші орынға қоятын қоғамды айтар едім. Ондай қоғамға жету үшін нақты мазмұндама жасап, оны халыққа жеткізу керек. Ол шаруаның негізі ұлт ретіндегі құндылықтарымыздың сапасын көтеру. Яғни ұлттың тілі, ділі, дәстүрі, тарихы, әдебиеті, мәдениеті – рухани дүниесі назардан тыс қалмауы тиіс. Бұл бағытта биліктің ұсынысын формалды түрде қолдануға болады. Бірақ биліктің өзі мәжілістерін қазақша өткізбесе, тарих мәселесінде де жан-жағынан жасқана берсе, төл мәдениетіміз бен дәстүрімізге емес, сырттан келген дүниелерге басымдық беріп қойса, халық қайда барады? Сөзі басқа ісі басқа билік халықтың наразылығын тудырып жүр емес пе.
Ал енді жаңа Қазақстан мен жаңа қазақтың алдына қойған мақсаттары қандай? Олар нені құндылық санайды? Бүгінгі заманның талаптарына сай келетін жаңа ел болу үшін жалаң ұрандар жеткіліксіз. Басы бар аяғы жоқ, атауы бар заты жоқ бағдарламалар мүлдем қажетсіз. Себебі, жиырма бес жыл ішінде қабылданған талай бағдарламалардың біреуі де іске аспады. Яғни науқаншылдықтың ешқандай да қисыны жоқ екеніне халықтың көзі жетті. Мемлекеттік бағдарламаларға деген халық сенімі әбден әлсіреп бітті. Сол сенімді қайтару үшін сөзден іске көшуіміз қажет секілді.
Бүгінгі қазақ қоғамына қарап, ширек ғасыр ішінде қол жеткізген жетістіктерімізден гөрі, жіберген қателіктеріміз басым болды ма деген ой туады. Ұлттық мемлекет ретінде қалыптасу жағынан алып қарасақ, бұрын бір мемлекеттің құрамында болған Украина, Грузия, Өзбекстан секілді елдермен салыстырғанда көп мәселеде артта қалған жағдайымыз бар. Басқасын былай қойғанда, біз осы уақытқа дейін әлі ұлттық идеологиямызды қалыптастыра алған жоқпыз. Бәрімізді ұйыстыратын ортақ ұстаным болмағандықтан, жік-жікке бөлініп кеттік. Байлар мен кедейлер, үкіметке жақындар мен үкіметтен аластатылғандар, қазақтілділер мен орыстілділер, ауылдықтар мен қалалықтар боп бөлінуіміз өз алдына, жершілдік пен рушылдық мәселесі тіпті ушығып бара жатқандай. Сондықтан бүгінгі қазақты мен дәл кешегідей ел басына күн туғанда бір жеңнен қол, бір жағадан бас шығарып ауызбіршілік танытатын ынтымағы ұйыған ел деп айта алмас едім. Олай деуіме бірнеше себеп бар.
Осыдан аз уақыт бұрын жеріміз шетелдіктерге сатылады деген мәселе көтерілгенде жер тағдырына алаңдап, қарсылық көрсеткен қазақтардың саны санаулы ғана болды. Бүкіл халықтың он пайызына да жетпейтін бөлігіміз өз позициямызды білдіре алдық. Қалғандарымыз тасада тығылып, сескеніп, қорқып отырдық. Кейбіріміз тіпті биліктегілердің бастамасын қолдап шыға келдік. Бірер жыл бұрын Жаңаөзен қаласында «жалақымызды шетелдіктермен теңестіріңдер» деп заңды талап қойып алаңға шыққан азаматтарымызды қан жоса қылды. Бірталайын оққа ұшырды. Сонда солардың мүддесін қорғап, мұңын мұңдап қанша қазақ шықты? Ауыз толтырып айтарлықтай ешкім жоқ. Осыдан бір, екі, үш ғасыр бұрын осындай жағдайлар болса, бәріміз біріміз үшін атқа қонған болар ма едік. Бұрын қазақ әлдеқайда ұйымшыл еді, әлдеқайда бауырмал еді, әділдікке деген азаматтық ұстанымы әлдеқайда жоғары еді. Өкінішке қарай түрлі тарихи нәубеттерді басынан өткерген қазақ қазір үркек, жасқаншақ. Баяғы қазаққа тән намыс, жігер, батылдық, сөзге тоқтау секілді көптеген қасиеттерден айрылып қалған. Оның орнын жемқорлық, байлыққа табыну, шендінің алдында тізе бүгу, білімге емес күшке басымдық беру, әділетсіздікке бару секілді көптеген жағымсыз әдеттер басқан. Осындай келеңсіз тұстарымызды өзіміз мойындамай тұрып, көкірегімізді ұрып, «біз керемет халықпыз» деп ұрандатудың еш қажеті жоқ. Біздің ұлылығымыз бен мықтылығымызды өзіміз емес, өзгелер мойындайтындай жағдайға жетуіміз керек. Ал ондай деңгейге жету үшін ұлт ретіндегі ерекшеліктерімізді сақтай отырып, құндылықтарымызды ардап, игілікті істерге мойын бұруымыз керек.
Шын мәнінде біз қазір өтпелі кезеңде ғұмыр кешіп отырмыз. Рас, кей халықтарда бұл кезең дәл біздегідей ұзақ мерзімге созылып кетпеген. Біз еріншектің ертеңі бітпейтіні секілді, бүгін болмаса да ертең бақытқа кенелеміз деп, өзімізді ертеңмен алдап келе жатырмыз. Алайда, жиырма бес жыл өтсе де, сол баяғы дағдарыс, сол баяғы қымбатшылық пен төл валютамыздың құнсыздануы, халықтың басым бөлігінің кедейлікте күн кешуі өзгеріссіз қалып отыр. Негізі мұның барлығы жекелеген адамдарға емес, халықтың өзіне, ұстанымына байланысты. Қоғамымыздың жігері жасыған, намысы жаншылған, құндылықтары өзгерген. Бұрынғы рухани құндылықтардың орнын байлық пен даңққа негізделген жалған құндылықтар басты. Қоғамымыз жасқаншақ, әділетсіздіктерге көз жұма қарайтын селқос, немқұрайлы болса, биліктен талап етудің орнына оның алдында тізе бүгіп, оған жағынудың жолын іздейтін болса, бұл өтпелі кезең әрі қарай да жалғасып кете береді. Оның ұзара түсуіне жекелеген билік басындағы шенділерді кінәлаудың еш қисыны жоқ. Себебі, биліктегілер халық өздеріне қаншалықты мүмкіндік беріп, үнсіздік танытқан сайын соншалықты өздерінің бірқалыпты тірліктерін жалғастыра береді. Яғни бұл жерде негізгі жауапкершілік қоғамдағы әр азаматтың ұстанымына тікелей байланысты. Халықтың қазіргі өте аянышты жағдайға шыдап, үндемей отырғаны – оның осы мүшкіл халін қанағат тұтып, бәріне көне беретінін білдіреді. Олай болса, бүгінгі жағдайымызға таңғалудың қажеті жоқ. Осы жолды таңдаған, биліктегілерге дауыс беріп сайлап, мақтап-мақтап мәртебесін көтеріп, көкірегіне нан пісіріп қойған өзімізбіз. Енді, міне, соның «жемісін» көріп отырмыз.
Қоғам қаншалықты талапшыл болған сайын, биліктегілер ширай түседі. Ал біздің халық тым момын, көнбіс. Негізінде қалың жұрт билік пен шендіге емес, керісінше билік пен шенді бұқараға қызмет етуі керек деген демократияның талабы біздің есімізден шығып кетті. Барлық мүмкіндік пен байлығын биліктегілердің қолына ұстатып қойып, оны бақылай алмай отырған халық меніңше, кінәні өзінен іздеуі тиіс. Өзін зор, өзгені қор санайтын шенеуніктердің қалыптасуына себепші болған біздің өзіміз. Сондықтан біздегі қазіргі мәселе өзіміздің немқұрайлылығымыз бен момындығымыз. Жыламаған баланың аш қалатынын біле тұра іштен тынып, өз үнсіздігімізге өзіміз тұншығып отырған жайымыз бар. Шенеуніктерді моральдық тұрғыда адамгершілікке шақырып, тым асқақтап кеткен әкім-қараларды сынап-мінегеннен еш нәрсе шықпайтыны белгілі. Қоғамның өзі дүр сілкінбесе, жақсы өмірге ұмтылып, талаптарын қоймаса, ондай қоғамды басқарып отырған биліктен ешбір пәтуа шықпайды.
Дайындаған
Айнара АШАН.