Қыздар университетінде ел Тәуелсіздігінің 25 жылдық мерейтойына және Семей полигонының жабылғанына 25 жыл толуына орай белгілі ақын, филология ғылымдарының докторы, профессор Бауыржан Өміржанұлы Жақып шығармашылығына арналған «Қазақ жолы» атты әдеби-сазды кеш өтті.

Ғибратты да тағылымды кешке ҚР еңбек сіңір­ген қайраткері, белгілі ақын Рафаэль Ниязбек, Халықаралық «Алаш» әдеби сый­лы­­ғының лауреаты, ақын Әділғазы Қайыр­беков, ҚР Жазушылар одағы Басқарма тө­рағасының орынбасары, ақын Жанарбек Әшімжан қатысты. Кеште Қыздар универси­теті студенттерінің орындауында Бауыржан Жақыптың Ел қасіретіне арнап жазған «Жан дауасы» поэмасына арналған театрлан­ды­рылған қойылым көрсетіліп, ел егемендігіне арналған өлеңдері оқылды. Студенттер «Де­ге­лең тауының зары», «Жапырақтар жыры», «Қураған тоғайдың соңғы мұңы», «Боза да­ланың мұңы», «Тартылған өзеннің мұңы», «Жел­дің жоқтауы» атты дастанынан үзін­ді­лерді жатқа оқыды. Поэзиялық кеште соны­мен қатар, ақын құрметіне арналған арнау өлең­дер де оқылып, ақынның сөзіне жазыл­ған «Тұғыр», «Егемен елім» әндері шырқалды. Кеш барысында Бауыржан Жақып «Домбыра», «Тамыздың  29-ы»,  «Менің Қазақста­ным!», «Қол­таңба» өлеңдерін және жастарды отан­сүйгіштік, патриоттық сезімге бөлейтін бір­­талай шығармаларын оқып, жырдан ша­шу шашты. Кеш барысында Б.Жақып жас­тар­дың өлең, поэзия, махаббат, ел руханияты, қазақ қызы тақырыптарына арналған сұрақ­тарына жауап беріп, қыздардың қара шаңырағына бірнеше кітабын тарту етіп, ақ тілегін арнады.

«Қыздар университеті тәрбиенің, тағы­лым­ның, білімнің ошағы. Мен үшін саналы, па­расатты, білімді қыздармен қауышу, пікір­ле­ріңізді біліп, үндеріңізді есту, сырлы сұх­бат құру ерекше ғанибет, үлкен бақыт. Бүгін менің өмірімде есте қаларлықтай күн болды. Керемет мазмұнды кешті ұйымдастыру­шы­лар­ға мың алғыс. Ерекше әсер алдым. Бұл қа­сиетті шаңырақтың біз үшін орны әрқашан бөлек. Қаракөз қарындастарымның білікті де білімді маман, шаңырақтың тұтқасы, ке­ре­гесінің берік болуы үшін қызмет ететін ұлт тәрбиешілері болатынына сенемін. Әрқай­сы­мыз ел Тәуелсіздігіміз үшін қызмет етсек, ал­дыға қойған мақсаттың бәріне жетеміз», – деді Б.Жақып. Кездесу соңында Педагогика және психология факультетінің деканы, п.ғ.д., профессор Сайра Жиенбаева сөз алып, кеш қонақтарына үлкен алғысын біл­діріп, қазақы дәстүр бойынша барша қо­нақ­тарға сый-сыяпат жасады.