ӘН ҚАЛҚЫТЫП, ЖЫР ТӨККЕН
Ел тәуелсіздігінің 25 жылдығы мен Алматы қаласының 1000 жылдығына орай 7 қазан күні Республика сарайында ақын Б.Әшірбаев пен әнші-композитор Т.Жақсыбаевтың ұйымдастыруымен «Жеті нота» ән-жыр кеші өтті. Аты айтып тұрғандай бұл кеште поэзия өкілдері өз өлеңдерін оқып, әншілер еліміздің танымал композиторларының әндерін шырқады. Ақын, «Дарын» мемлекеттік жастар сыйлығының лауреаты, «Заң» газетінің Бас редакторы Бекжан Әшірбаев жобаның мақсаты: «Жеті нота» ән-жыр кешінің ерекшелігі шығармашылықтың үштік одағын халыққа таныстыру әрі насихаттау, елге тек әншілерді ғана емес, композиторлар мен ақындарды да етене таныстыру», – деп атап өтті.
Халықаралық «Алаш» әдеби сыйлығының лауреаты Ғ.Жайлыбай, Қазақстан Жазушылар одағының мүшесі З.Қоңырова, Қазақстан Жастар одағы «Серпер» сыйлығының лауреаты Ә.Шегебай, «Дарын» мемлекеттік жастар сыйлығының лауреаты Б.Әшірбаев, Халықаралық «Шабыт» фестивалінің лауреаты С.Қамшыгер сынды ақындар өлеңдерін оқыды.
Айтулы мерекелік шараға орай Жазушылар одағының мүшесі, генерал-майор Ә.Нұрманов пен Марапат комитетінің төрайымы Г.Иманова Қазақстан Жазушылар одағы Басқарма төрағасының бірінші орынбасары Ғ.Жайлыбай мырза мен ақын Ә.Шегебайға Халықаралық «Ататүрік төсбелгісін», З.Қоңыроваға «Ұлт мақтанышы» төсбелгісін табыс етті.
Ұлттық ғылым академиясының құрметті мүшесі А.Тшанов Өнер жанашырлары-меценат С.Молдажановқа «Алтын қыран» төсбелгісін, Д.Үсіпбаевқа «Ел ардақтысы» төсбелгісін табыстады. Ал сатирик, сазгер Ж.Дәулет әнші-композитор Ұ.Жолдасовқа «Өнер жұлдызы» төсбелгісін, әнші-актриса Ж.Дүйсенбиеваға «Халықаралық мәдениет майталманы» төсбелгісін тапсырды.
Кеш барысында эстрада жұлдыздары Ұ.Жолдасов, Ө.Айниязов, Т.Асар, Р.Әлқожа, Ж.Дүйсенбиева, Т.Серіков, Б.Сейдуәлиева, «Жігіттер» квартеті, т.б. өз өнерлерін көрсетіп, көрермендер қошеметіне бөленді.
М.ШОЙБЕКОВА.