Бір кездері «Өшеді өлең немесе көшеді өлең» деп жыр жазған қазақтың ақиық ақыны Мұқағали Мақатаевтың өміршең туындыларының бұл күндері әр түрлі топтама, жинақ болып оқырмандарымен  жиірек қауышып жүргені белгілі. Тек соңғы төрт-бес жылдың бедерінде жырсүйер қауымның кітап сөресі ақынның көлемді «Таңдамалысымен», «Жүрек арызы», «Өмірдастан», «Өмір-өзен» сияқты жыр жинақтарымен толықты.

Енді, міне, Мұқаңның 85 жыл­дық мерейтойы тұсында «Қа­з-Ақ­парат» баспасы «Тамаша айым – та­мызым» атты ке­зек­ті ­жыр кі­­та­­бын оқырман қа­уым назарына ұсы­нып отыр. Ақын соңында қал­дыр­ған «Күнделігінде»: «Таң­дама­лың­­ның» болуы жақсы-ақ қой. Оны мен «Тамаша айым – тамызым» («Августь – месяц свя­­щен­ный…») деп атаймын…», – деп ар­манын ақ­та­рады. «Егер баспамен шартқа отырсам, онда сол та­мыз айында отыруым керек. Әдет­те олар келесі жылдың шартын сол айда жасайды. Бұл – бі­рін­­ші­ден, ал екіншіден, тамыз жаз­дың ақырғы айы, үшінші­ден, ме­нің жортуылдарым да бітеді, қалай дегенмен мен енді жас емес­пін ғой, міне, 44-ке келдім. Әрине, бұл менің жас­ты­ғымның соңы. Жаз­дан кейін күз келеді. Сондық­тан да мен таңдамалымның атын «Тамаша айым – тамызым» деп қой­­мақ­пын», – деп сыр шертеді күн­делік жолдары. Өкінішке қа­рай, арада аттай бір жыл уақыт өт­кенде ақын жүрегі со­ғуын тоқ­татып, жоғарыдағы үкілі үмітінің орындалмай қалғаны белгілі.
Мұқағали мұраларымен етене та­ныс көзіқарақты оқыр­ман­ның көңіл түкпірін­дегі өкініштің бір мыс­қал өтеуі болса деген ниетпен шы­ға­рылып отырған осынау жи­нақ­қа ақынның көпшілік көзайы­мына айналған таңдамалы өлең­дері топтастырылған.