Жуырда Абай атындағы мемлекеттік академиялық Опера және балет  театрында көрнекті ақын, Мемлекеттік сыйлықтың лауреаты, Қазақстан Республикасының еңбек сіңірген қайраткері Марфуға Айтхожаның  ел тәуелсіздігінің 25 жылдығына арналған «Жыр аққуы – Марфуға» атты шығармашылық кеші өтті.

Алматы қаласының әкімдігі ұйым­дастырған бұл кеш Құрманғазы атындағы ұлт-аспаптар оркестрінің   орындауындағы көңіл толқытар күймен ашылды.

Шара барысында қала әкі­мі­нің орынбасары Сұлтанбек Мә­ке­жанов ақынның өмір жолы мен шы­ғармашылық табыстарын айта келіп, қала әкімі Бауыржан Байбектің құттықтау хаты мен сый­лығын табыс етті. Сондай-ақ, ҚР Мемлекеттік хатшысы Гүл­шара Әбдіхалықованың, Мәде­ниет және спорт министрінің  құттықтауларын министрліктің жауапты хатшысы Қуатжан Уә­лиев салтанатты түрде тапсырды. Қазақстан Жазушылар одағы бас­қарма төрағасының орынбасары, ақын Ғалым Жайлыбай

ҚР Парламент Сенатының төрағасы Қасым-Жомарт Тоқаевтың, Үкімет басшысының орынбасары Иманғали Тасмағанбетовтың, ҚР Жоғарғы сотының төрағасы Қайрат Мәмидің, «Түрксой» ұйымының төрағасы Дүйсен Қасейіновтың, Ақтөбе облысының әкімі Бердібек Сапарбаевтың  құттықтау жеделхаттарын табыс­тап, «Жыр аққуы» атанған Марфуға Айтхожаның асқақ та тұнық поэзиясының ерекшеліктеріне, ақынның адами келбетіне тоқталып өтті.

Талдықорған жұртының  ыстық ықыласы мен Алматы облысы әкімі Аман­дық Баталовтың құттықтауын әкімнің орынбасары Бақтияр Өнербаев жеткізіп,  Алаштың ардақты ақынының  иығына құндыз жағалы бешпет жапты.  «Нұр Отан» партиясы төрағасының бірінші орынбасары Мұхтар Құл-Мұхамедтің құттықтау хатын қалалық партия филиа­лының өкілі Жұлдыз Омарбекова жеткізді.

Елімізге танымал көрнекті ақындар: Несіпбек Айтов пен Маралтай Ыбырайымұлы кеш иесіне өлеңдерін арнаса, Бауыржан Жақып осыдан 51 жыл бұрын ақын бітірген әл-Фараби атындағы Ұлттық университеттің «Алтын медалін» табыс етті. Кешке қазақтың тұңғыш  ғарышкері, Кеңес Одағының Батыры, Қазақстан Республикасының Халық Қаһарманы Тоқтар Әубәкіровтің  келуі – жұртшылық үшін ерекше оқиға болды. Жыр  кешінде Құрманғазы атындағы ұлт-аспаптар оркестрінің сүйемелдеуімен елімізге танымал өнер шеберлері ақынның өлеңдеріне шығарылған  әндерді орындады. Соңынан Марфуға Айтхожа сөз алып, мерейлі мерекесіне орай осы кешке келген барша қауымға алғыс айтты.