Жуырда Алматы облысының Талғар ауданына қарасты Тұздыбастау ауылының Мәдениет үйінде халық­аралық «Алаш», Түркі әлемінің «Ақбозат» және Мұқағали атындағы сыйлықтардың лауреаты, ҚР Мәдениет қайраткері белгілі ақын Оразақын Асқардың өлеңдерін мәнерлеп оқудан мектеп оқушылары арасында байқау өтті.

Бұл іс-шара жас ұрпақ бойындағы отаншылдық сезімдердің қалыптасып дамуына және әдеби тілді ұштай түсу мақсатына арналды. Туған күні мамырда болатын ақынның 90 жылдығын атап өту көктемнің алғашқы күнінен-ақ басталып кетті.
Шараны ұйымдастыруға аудан басшы­лы­ғы­ның қолдауымен ұйытқы болған Тұздыбастау мәдениет үйінің директоры, танымал әнші, сазгер Мұратбек Сарбасов қысқаша естелік айта отырып, жиынды ақын өлеңіне шығарылған әнмен ашып берді. Қазылар алқасының төрайымы, Алматы қаласындағы Ш. Уәлиханов атындағы № 12 мамандандырылған гимназияның мұғалімі, ҚР Білім беру ісінің үздігі Сәжида Сабырбекова үміткерлердің жасына қарай екі үлкен топқа бөлініп, байқаудан өтетінін жариялады. Тек Тұздыбастаудан ғана емес, көрші ауылдардан да келген сайыскерлер сахнадан поэзияны қаншалықты сүйетінін және Оразақын Асқар аталарының шығармашылығы арқылы ана тіліне деген құрметтерін жарыса көрсетіп жатты.
Байқау қорытындысы бойынша 9 жасқа дейінгі оқушылар арасында бас жүлдені «Ата» өлеңін мәнерлеп оқыған № 39 орта мектеп оқушысы Дария Мұхаметқазы жеңіп алды. Бірінші орынды Б. Амантұрқызы, А. Мүтәліп бөлісті. Екінші орынды Ә.Жұмабек пен М.Ұлдахан, ал үшінші орынды Т. Марат пен М. Махмуд иеленді. Келесі, 10–14 жас аралығындағы топтан бас жүлдегер болып «Үйрен ана тіліңді» өлеңін оқыған әл-Фараби атындағы № 31 мектеп оқушысы Серік Айзере алға суырылып шықты. Бірінші орынды Е. Айдынқызы мен Қ. Сүйінбекқызы, екінші орынды А. Мұхаметқали, Ұ.Үкен, Н. Жақыпбек, үшінші орынды М. Тұрсынбай, А. Советбек, Ш. Мансурова, А. Тәңірберген бөлісті. Жеңімпаздар дипломдармен, сыйлықтармен марапатталды.
Алғыс айту күніне сәйкес келген бұл байқауда Оразақын Асқардың өмірлік жолдасы болған ҚР Журналистер одағының мүшесі Ажар Асқар апай, сондай-ақ ақынның қызы мен ұлы ұйымдастырушыларға үлкен алғысын айтып, оқушыларға және оларды тәрбиелеген ұстаздар мен ата-аналарға ризашылығын білдірді. Поэзия мерекесіне қатысушыларға осы ауыл тұрғыны Сәметай Әбдіқалықов қария ізгі тілегін айтты.

Наурызғали ДІНМҰХАМЕД,
Абылай хан атындағы ҚазХҚжәнеӘТУ
журналистика мамандығының 1-курс студенті