29-мамыр күні әл-Фараби атындағы Қазақ Ұлт­тық университетінің шаңырақ көтергеніне 90 жыл толу мерейтойы аясында тарихшы-ғалым, Қазақстан Республикасы Әлеумет­тік ғылымдар Академиясының академигі, профессор Талас Омарбековтің туған күні және Қазақстандағы «саяси қуғын-сүргін құрбандарын» еске алу шарасына орай «Омарбеков оқулары» ат­ты халықаралық ғылыми-практикалық конференция өт­ті.

Дәстүрлі конференцияның негізгі мақсаты – профессор Т. Омарбековтің ғылыми шығармашылығын насихат­тау мен жинақтау және ХХ ғасырдың 20-30 жылдары Қазақстанда болған аштық пен саяси қуғын-сүргін мәселелерін зерт­теу болатын. Осы орайда конференция жұмысына Қазақстан, Түркия, Жапония тарихшылары мен қоғамтанушы ғалымдар, мемлекет­тік және қоғамдық ұйымдардың өкілдері қатысып, өздерінің тың тақырыптары мен тұжырымдарын ортаға салды.
Конференцияға Түркияның Едитепе университетінің профессоры Ахмет Ташағыл, Жапониядан Тохоку университетінің профессоры Дүйсенәлі Әбділәшімұлы қатысып, қазақ тарихының өзекті мәселелерін талқыға салды.
Жиын барысында тарих факультетінің деканы Д.С.Байғунақов, ҚР ҰҒА академигі, профессор Х.М.Әбжанов, ҚР Жоғары мектебі Ғылым академиясының академигі, профессор Қансейіт Әбдезұлы, Абай ғылыми зерт­теу институтының директоры, профессор Жанғара Дәдебаев, ҚР ҰҒА академигі, Қазақстан тарихы кафедрасының меңгерушісі, профессор Б.Б.Кәрібаев, тарих ғылымдарының докторы, профессор Аманжол Қалыш, Археология, этнология және музеология кафедрасының меңгерушісі, профессор Б.К.Қалшабаева баяндамаларын Талас Омарбековтің тарих ғылымына қосқан қомақты үлесін, адами болмысы мен зерт­теушілік қарым-қабілетін, еңбектерін зерделеуге бағыт­тады.
Тәуелсіз Қазақстанның төл тарихын алғашқы жылдардан бастап жаңаша концептуалдық көзқарас, негізінде жазуға ден қойған көрнекті ғалым ХХ ғасырдың 20-30 жылдардағы ашаршылықтан қаза тапқан миллиондаған қазақтың жоқтаушысы, іздеушісі болды. Өмірінің соңына дейін мұрағат­та аштық пен саяси қуғын-сүргін мәселелерін зерделеп, тың мәлімет­терді айқындады. Т.Омарбеков қазақ халқының тарихын, этникалық құрамын, мемлекет­тілігін, билеуші қағандар, хандар тарихын зерделеп, артынан өшпес із қалдырған тұлға. Оның зерттеу еңбектері ұлт­тық тарихымыздың бет­терінде сақталатынына сенеміз.

Н.А. Тасилова,
әл-Фараби атындағы ҚазҰУ қ.м.ф.
М.Д.Байдәулетова,
PhD докторы