«ЖҰЛДЫЗДЫ» ОҚЫҢЫЗДАР!
13.05.2024
270
0

«Жұлдыз» журналының кезекті 4- саны (2024) жарық көрді. Журналдың бұл жолғы беташары ретінде Ел президенті Қасым-Жомарт Тоқаевтың биыл Сарайшықта өткен Ұлттық құрылтайда сөйлеген сөзінен үзінді берілген. Мемлекет басшысы бұл сөзінде ел тарихын білудің маңызын айта келіп, елімізде қазақ тілінің мәртебесі артып, оған деген сұраныс күшейіп келе жатқанына тоқталып өтеді. Сонымен бірге озық ойлы ұлт болу үшін бүкіл қоғам сана-сезімін өзгертіп, жаңа құндылықтарды орнықтыруы керек екенін де ескертеді.

Детектив жанры бойынша жас жазушы А.Аймағамбетовтің «Бұ­ры­лыс­қа жарты қадам қалғанда» ро­манының бастапқы тараулары берілген. Жалғасын алдағы нөмірлерден оқи аласыздар. Проза жанрынан Айзат Рақыштың «Келіншек гүлі солғанда» атты хикаятында бүгінгі заман адамдарының өмірге, қоғамға деген көзқарасы, мінез-құлқы жай баяндаумен емес, олардың басынан өткен әр алуан уақиғалар, кейде қуанышты, кейде ренішті сәттер арқылы шебер суреттелген.
Ал әлемге әйгілі «Гильгамеш тура­лы дастанды» алғаш рет қазақшаға тәржімалаған ақын М.Қайыңбаймен сұх­баттан б.з.д. өте көне дәуірдегі шумерлердің өмір салтына біраз көз жүгіртіп, алуан-алуан ойға кетері сөзсіз. Қазақ прозасының көгіне жарқ етіп көтеріліп, сұм ажал ортамыздан ойда-жоқта жұлып әкеткен дарынды жазушы Марат Қабанбаевтың «Кентавриадасы» – нағыз «бас алмай» оқитын дүние.
Журналдың осы санындағы «Кү­зел­ген тарихты кім түзейді» атты ғы­лыми-зерттеу тұрғысындағы мақала жалпы түркі тарихындағы астары әлі де ашыла қоймаған, бұрын айтыла бермейтін жұмбақ сырларға сын көз­бен қарата түскендей болады. Ал бел­гілі жазушы Тұрысбек Сәукетаевтың «Өлгендер қайтып келеді» деп аталатын бүгінгі қазақ прозасындағы тың жанр – роман-фэнтезиін осы нөмірден оқысаңыз, келесі нөмірдегі жалғасы тезірек келсе екен деп асыға күтіп отыратын боласыз.
Кезінде ғылымда да, әдебиетте де, тарихта да есімі елге әйгілі небір айту­лы тұлғалардың өздері біліктігі мен білімдігін түпсіз терең мұхитқа балаған ғұлама ғалым Әлкей Марғұлан туралы Серік Негимовтың мақаласын оқып отырып өзіңіздің түпсіз терең тарихқа сүңгіп кеткендей күйге түскеніңізді де байқамай қаласыз.
Танымал ақын Аманғазы Кәріпжан мен Бекболат Қаленовтің жыр жолдары өлеңсүйер қауымды бей-жай қалдырмайды.
«Жұлдыздың» келесі санында жолыққанша күн жақсы, құрметті халайық.

М.САХИҰЛЫ

ПІКІР ҚОСУ

Ваш адрес email не будет опубликован.

Пікір