«ҚАРАҒАНДЫ КӨКТЕМІ»
03.05.2023
3223
0

12 вагон. Мейрамхана. Ғалым Боқаштың Мұқағалидың өлеңіне жазған әні көңілді тербеп тұр. «Күн қайда асығады?» Біз қайда асығамыз? Біз – Алматыдан ат­танған бес ақын, Қарағандыға бара жатқанбыз. Өйткені ертең жүректер бүр жарып, жан гүлдемек. «Қарағанды көктемі» ат­ты поэзия фестивалі өтпек!

Сәуірдің жиырма бірі күні поэзия фестивалінің шымылдығын «Сарыарқа» әні ашты. Серік Ақсұңқарұлы мен Ғалым Жайлыбай Қазақ­станның қиыр-қиырынан келген хас һәм жас ақындарды, Түркия мен Әзербайжаннан келген қаламгерлер Екбер Қошалы, Иылмаз Окуклу, Селим Юкайды жалынды жырларымен қарсы алды. Шараның салтанат­ты ашылу рәсімінен соң «Аймақтағы жас ақын-жазушыларды шығармашылық қолдау және әлеумет­тік жағдайы» тақырыбында дөңгелек үстел өт­ті. Баяндама оқыған, сөз сөйлеген аға буын жастардың мәселесін талқылап, әдеби-шығармашылық үдерістерге тоқталды. Қорытындысында қордаланған бірқатар мәселені негізге ала отырып, тиісті орындарға хат жолдайтын болып тарқасты.
Мұнан соң «Карлаг» мұражайына бардық. Карлагты халықаралық деңгейде көтеріп, оған поэма да арнаған ақын Ғалым Жайлыбай қонақтарды кіреберістен жертөлесіне дейін өзі аралатып, қанша жылғы ізденісін ортаға салды. Әсіресе осынау қасірет­ті мекенді алғаш көрген жас қаламгерлердің жүрегіне шер байланып, қайта жолға ат­тандық. Сол түні зар қысқан жүректен өлең ақтарыларын бәріміз де іштей түйсіндік…
Мұң шымылдығын Е.А.Бөкетов атын­дағы Қарағанды университеті түрді. Бұлай болатын себебі – сол ғимарат­та ғаламат жыр кеші өт­ті. Кеш тізгінін әдебиет сыншысы, филология ғылымдарының докторы Жансая Жарылғап қолына алды. Біз Жансая ағамыздың терең біліміне, тамағынан сөз сауған шешендігіне таңдай қағыстық. Ал аға буын арқырап өлең оқыды. «Қара өлеңнің қағбасы» атанып үлгерген кенді шәрдің көгінде жыр жұлдызы жанды. Кеш барысында ҚЖО Басқарма Төрағасы Ұлықбек Есдәулет, Ербол Алшынбай, Руза Алдашева, Жоламан Айткен, Салтанат Қайырбекқызы, Әлия Іңкәрбек қатарлы ақындарға Жазушы­лар одағының куәлігін табыс ет­ті.
Ертеңіне «Қасым үйін» араладық. Содан соң кезек жастарға тиді. Жас перілер жыр оқыды. Фестиваль қорытындысында, ҚарУ ректоры Нұрлан Дулатбеков, Роза Аспанқызы мен Абзал Мақаштың кітаптарын шығарып беретін болды. Соңында сөз алған Шаһизада Әбдікәрімов поэзия мерекесіне жиналған жас қаламгерлердің осалы жоқ екенін, жастар антологиясының жарық көруіне демеуші болатынын айт­ты.
Нарық заманда руханият­ты да ұмытпай «Қарағанды көктемі» фестивалінің өтуіне мұрындық болған Қарағанды қаласының әкімдігінен бар облыс үлгі алса екен. ҚЖО-ның Қарағанды облыстық филиалының директоры ақын Жанат Жаңқаштың да ұйымдастыру қабілетін атап өтпесек қиянат болар.
Мәртебелі поэзия жасасын!

Асылан ҚУАНЫШҰЛЫ

ПІКІР ҚОСУ

Ваш адрес email не будет опубликован.

Пікір