Елімізде азық-түлік күн санап өсіп барады. Бұған халық наразы. Азық-түліктің қымбаттауын қолдан жасап, үстеме пайда көріп отырғандар жетерлік. Бұған Солтүстік Қазақстандағы мына жағдай мысал бола алады.
Жуырда облыстағы Сыбайлас жемқорлыққа қарсы қызметке жеке кәсіпкер арызданып, тұрақтандыру қорындағы азық-түлікті қымбат бағаға алуға мәжбүр болғанын айтқан.
СҚО Сыбайлас жемқорлыққа қарсы қызметтің мәліметінше, шағымданушы «Солтүстік» әлеуметтік-кәсіпкерлік корпорациясы» АҚ тарапынан әкімшілік кедергінің жасалғанын хабарлаған.
Кәсіпкердің айтуынша, оның ауылдық жерде дүкені бар. Сату үшін тұрақтандыру қорынан әлеуметтік маңызы бар азық-түліктің 5 түрін алмақ болады. Алайда акционерлік қоғамда оны әлеуметтік қантты қосымша алуға міндеттеген. Бұл тауар ол жерде басқа көтерме бағамен сату­шылардан 30 теңгеге қымбат болған.
«Солтүстік» ӘКК» АҚ осылайша шағын бизнес субъектілері есебінен бұрын қымбат бағаға алынған азық-түліктен құтылуды көздеген.
Ведомствоның араласуынан кейін барлық тараптардың қатысуымен кез­десу өтіп, мәселе оң шешілді. Яғни, кәсіпкерлер қажетті азық-түлікті еш шектеусіз сатып ала алады.
Мамандар азық-түліктің қымбат­тауының түрлі себебін айтады. Соның бірі – бағаны тұрақтандыру қорының жұмыс тәсілінің тиімсіздігі. Олар маусым кезінде азық-түлік өнімдерін арзан бағаға сатып алып, сақтап, кейін кәсіпкерлерге төмен бағамен беруге міндетті. Бірақ өздерінің істеріне немқұрайды қарайтындар жетерлік. Соның кесірінен елімізде азық-түлік бағасы тоқтаусыз өсуде.