Ұмытпайды «Қояндың»…
Ешкім ұмытылмайды. Ештеңе ұмыт қалмайды. «Қазақ әдебиеті» газеті ескерусіз қалып, ұмытылып бара жатқан біраз қаламгерді оқырман ортасымен қайтадан қауыштырды. Алда әлі де сол бағытты ұстанады. Өздеріңіз білетін, әдебиетке зор үлес қосқан, дегенмен, қағаберісте қалып қойған азаматтар болса, хабарласыңыздар. Бүгін біз Сатыбалды Даумов туралы естеліктер мен ақын шығармашылығына кезек береміз.
Сатыбалды Даумов – соңына өшпес мұра қалдырған тау-тұлға. Ол, ең алдымен, қаламынан жыр құйылған ақын болатын. Әйтсе де, «поэзия» дейтін салқар көште біздің кейіпкеріміз қандай қасиетімен ерекшеленетін? Оны білу үшін Қазақстанның Халық жазушысы, ақын Мұзафар Әлімбаевтің мына сөзін оқып көрелік:
«Сатыбалды Даумовты мен сонау студент кезінен білемін. Поэзиядағы алғашқы қадамдарына да куәмін. Университет бітіріп, журналист атанған тұсында да сырласудың желісі үзілген емес. Әсіресе, «Еңбек таңы» журналының Бас редакторы болған жылдарында оның қаламгерлігі шыңдала түсті. Көсемсөз, тарихи зерттеулер жазды. Поэзияда өзіне қатаң талап қойып, алғашқы жинағын шығаруға да асықпағаны сөз өнерін әспеттеудің үлгісі еді. Алғашқы өлеңдер кітабына ағалық шын көңілден қуанып, газетке пікірімді жазып едім. Сатыбалды аз жазған жоқ, алайда асылын талдап-талғап қана жариялайтын. Бізді сонысымен ырзалайтын. Сатыбалды көп оқитын, білімдар азамат еді. Батыс, Шығыс поэзиясын, туған әдебиетті, тарихты тәптіштеп білгендіктен, оның ауызша әңгімесі тағылымды да тартымды болатын».
Осынау шағын естеліктен қаламгердің сөз өнерін кие тұтқанын, жазуға үлкен жауапкершілікпен қарағанын аңғарамыз. Бұл – әсіресе, әдебиетке жаңа қадам басқан кез келген жас үшін үлгі болар биік қасиет.
Қай қаламгер де әдебиетке үлкен мақсатпен келері анық. Сол мақсаттың үдесінен қаншалықты шыға алғандығына – сырт жұрт сыншы. Бұл орайда Сатыбалды Даумовтың қазақ әдебиетіндегі орнына Қазақстанның Халық жазушысы, ақын Қадыр Мырза-Әлі мынадай баға беріпті:
«Мен Сатыбалдыны кітабы шықпай тұрып-ақ ақын деп білетінмін. Осындай ақынның кітабы неге шықпаған деп те таңғалатынмын. Тіпті, соның өлеңдерін шығармай жүргендерге де таңғалатынмын. Бірде Сатыбалдымен баспада кездесіп қалдық. Сәкен Иманасов – Бас редактор. Сәкеңе кіріп: «Мына жігіт талантты, жасы алпысқа таяп қалды. Мұның жасындағы ақындар он-он бес кітабын шығарып тастады. Ал бұл жігіттің бір де бір кітабы шықпапты. Мына жігіттің кітабын шығарып бер», – дедім. Обалы не керек, Сәкен Иманасов кітабын жоспарға кіргізді. Сол кітабы шықты. Сатыбалды өзінің әдебиетші болатынын білген, іштей дайындалған, өте сауатты жігіт болатын. Ол әдебиетте үлкен орнын қалдырды. Мұны жолдастықтан, ағайынгершіліктен, құрдастықтан айтып отырған жоқпын, оған көзім жеткендіктен айтып отырмын. Ол соңғы кезде тарихты да қазбалады. Алма Оразбаева жөнінде поэма жазып жүрді. Батыс Қазақстан облысына қарасты Бөкей ордасының тарихын зерттеді. Шығармашылық жолында аудармашылықпен де айналысты. Ол – қазақ әдебиетіне тек кіріп-шығу үшін ғана келген адам емес. Ол қазақ әдебиетіне өзіндік орнын лайықты етіп қалдыра білді».
Ақиық ақын Мұқағали Мақатаев «Ақынды ақын қолдамаса болмайды» деп айтқандай, шығармашылық қуаты мол жеке бір талантқа тағы бір шоқтығы биік таланттың сүйеу білдіруіне сүйсіне отырып, кейіпкерімізді жақын тани түсеміз. Иә, поэзияға да, прозаға да, тарихқа да кең құлаш сермеген Сатыбалды Даумовтың еңбегі ұшан-теңіз екені – даусыз ақиқат. Сол мұраны көздің қарашығындай сақтап, терең зерделей білу – тірілер, біздердің, кейінгі ұрпақтың парызы.
Ақынды тану үшін өлеңдерін оқу керек. Өйткені өлең дегеніміз – ақын жанының дауысы, жүрегінің үні. Өлең деген – ақынның болмысы, мінезі, өзіне тән қасиеті. Яғни, өзі. Бұл орайда ақын Сейфолла Оспан:
«Сатыбалдының «Осынау тұрған Нарында» деген кітабы қатты ұнады. Қазіргі айтып жүрген ақындарымыздың, шындығы керек, солардың бәрінен үстем шықты. Бұл кісі сөзге жоқ, тек қана өзін-өзі тұйықтап өскен. Екінші жағынан, бұл кісінің арыны – Хамит Ерғалиев ағамыздың арыны да, ал, ішкі астары – Әбу Сәрсенбаевқа келеді. Ана кісілер сондай мінезде болған кезде, бұл кісі өзінің бойындағы осындай мінездерін ішіне бүккен сияқты. Соның нәтижесінде бұл кісі не жазса да, тоқ етерін айтуды үйренген», – дей отырып, оқырман қауымды Даумов әлеміне үңілте түседі.
Ақын болмысын оның қандай жағдайда да жанынан табыла білетін жан жарынан артық ешкім де тани білмесі анық. Олай болса, Сатыбалды Даумовтың жұбайы Асылғаным апайдың мына бір естелігіне кезек берелік:
«Сатыбалды өте ұстамды, көп сөйлемейтін, аз, сазды кісі еді. Жанұясын жақсы көретін. Отбасы үшін де 40-45 жылдай бір орында жұмысын атқарды, әлгі жазушылар жаққа кетіп қалмай, балаларын асырап, адам етем деп барын салды. Негізінен, екеуміз де отбасы үшін өмір сүрген адамбыз. Ол, жалпы, балажан болатын. Жора-жолдастардың үйіне қонаққа барсақ, сол үйдің балаларының бәрі де біздің кісінің мойнына асылып, құшақтап, мәре-сәре болып жататын. Өте бауырмал, ақылды адам еді».
Қоғамның қай құбылысы да ақынды бей-жай қалдырмайды. Жүрегіне салмақ салады, толғантады. Ал, біздің кейіпкерімізді өмірдің қандай жайттары теңіздей тебірентті екен? Ақын Дүйсенбек Қанатбаев былай депті:
«Даумовтың өмірінің екі ерекшелігі бар. Бірі – кіндік кескен жерінен тірілей ажырасуы, Азғыр мен Капустин сынды полигондардың қыр-сыры, туған жерден еріксіз көшірілуі. Ақын қайтыс болғаннан кейін «Қазақ әдебиеті» газеті ақынның «Қоянды» аза жырын жариялаған еді. Редакция оған мынандай кіріспе сөз жазыпты: «Ажал базарыңа да, ажалыңа да қарамайды», – деген сөз рас. Туған жерін барынша сүйген ақынның бізге әкелген соңғы топтамасындағы аза жырының әуені өзіне де арналғандай… Бір жұбанарлығы, оның жыр ғұмыры – мәңгі».
Осы арада ақын поэзиясына – «Қоянды» атты аза жырына кезек берелік:
Іздеме бекер картадан,
«Қоянды» деген жазуды.
Жазусыз да оны дәл табам,
Ауылды сол бір аз үйлі.
Қояндым,
Көрмегелі көп жыл өтті,
Сағыныш ет жүректі елжіретті.
Орныңды қалдым сипап іздеп келіп,
Ел босып, тоз-тоз болып
Жер жүдепті.
Ауыл жоқ…
Тұрмын енді жұртын басып.
Жадау түз, жатыр сұлық,
сиқы қашып.
Құйрықсыз қызыл шақа қыр түлкісі
Жанымнан өте берді сылти басып.
Сауы жоқ, адам түгіл аң-құсының,
Түсінер бұл өңірдің қайғысын кім?!
Кетіпті бір-ақ жылда киік құрып,
Еріген қардың ішіп «қанды суын».
Зымыран төбесінен құлап-құлап,
Төбелер жатыр өліп, сұлап-сұлап.
Жыландай жан-жағына
у шашады,
Жаралы жер төсінен су атқылап.
Өлі су,
Өлі ауа,
Өлген ауыл.
Аспаннан себеді өлім
жерге жаңбыр.
Ұйтқытып радиация
шаң-тозаңын,
Алмайды күндіз-түні жел де
дамыл.
Тағы да соқты, міне, құм бораны,
Құм борап жүрегімді мұңға орады.
Бір сұрақ жауабы жоқ
тілге оралды,
«Ойраны шыққан елдің
кімге обалы?»
Иә, «Қоянды» – туған жерін құлай сүйген ақын жанының шырылы. Қасіретті күйдегі Қояндысына қанатымен су сепкен қарлығашша араша түсе алмай, қапаланған ақын жүрегінің мұң-зары.
Д.Қанатбевтың сөзін әрі қарай сабақтасақ:
«Даумов өмірінің екінші ерекшелігі – оның өлең жазуды тым кешірек бастағандығы. Мұнысын ақынның өзі де сып-сыпайы әрі дәл жеткізген еді.
Абайша бастағандар көп болғанмен,
Бола алған қайсысы бар Абай бірақ?
Расымен, қаламгердің әдебиеттегі орны қолына қай кезден бастап қалам алғандығымен өлшенбейді. Ең бастысы, оқырманға не бере алғанында. Біздің кейіпкеріміз – осы ең басты парызына адал болған қаламгер. Ендеше, Сатыбалды Даумовтың есімі халық жадынан ешқашан өшпек емес.
Мөлдір РАЙЫМБЕК
Сатыбалды Даумов
Белгілі мәдениет қайраткері, ақын, журналист, жазушы-өлкетанушы, Қазақстан Жазушылар одағының мүшесі.
1935 жылы Батыс Қазақстан облысы Бөкей Орда ауданының Қоянды ауылында дүниеге келген. 1953-59 жылдары ҚазҰУ филология факультетінде оқыған. «Қазақстанның ауыл шаруашылығы» журналында әдеби қызметкер, аударма бөлімінің меңгерушісі қызметтерін атқарған. 1969-95 жылдары республикалық «Еңбек таңы» журналында Бас редактор болды.
«Жалын ғұмыр» атты өлеңдер, «Тауқыметті тағдыр» деректі-эссе кітаптары, танымдық мақалалары мен очерктері жарық көрген.
Қазақстанның Еңбек сіңірген мәдениет қайраткері. 2004 жылы Алматыда қайтыс болды.
ПІКІРЛЕР1