АБАЙ АТЫНДАҒЫ ОҚУ ОРНЫНЫҢ ИГІЛІКТІ ІСТЕРІ
10.10.2018
762
1

Бүгінде Қазақстандағы тұңғыш жоғары оқу орны – Абай атындағы Қазақ ұлттық педагогикалық универ­ситетінің 90 жылдығы кеңінен атап өтілуде. Мерейтойға бай­ла­нысты университет ғалымдары онға тарта тарихи танымдық кітаптарды жарыққа шығарды. Қазан айының 2-күні оқу орнында осы басы­лым­дар­дың тұсаукесер рәсімі өтті.

Жиынды ашқан университет ректоры, про­фессор Такир Оспанұлы Балықбаев іс-шараның маңызына тоқтала келе: «Осы 90 жылда университетімізді аса көрнекті мемлекет және қоғам қайраткері Санжар Асфендияровтан бастап, Бәймен Алма­нов, Шәрифолла Сақаев, Шайхислам Бекжа­нов, Серғали Толыбеков, Халел Әділ­гереев, Ахмеди Ысқақов, Асқар За­ка­рин, Мәлік Ғаб­дуллин, Жұмабек Жүніс­беков, Құлжа­бай Қасымов, Тоқмұ­хамед Садықов, Серік Пірәлиев сияқты білім, ғылым саласының белгілі өкілдері басқар­ды. Олардың бәрі де – өз кездерінде оқу орнының дамуына қал-қадырынша үлес қосқан тұлғалар. 1928 жылы ашылған университеттің қалыптасуы мен дамуында Қазақстан оқу-ағарту Халық Комиссары Ораз Жандосовтың, Алаш зиялылары Ахмет Байтұрсынов пен Халел Досмұха­медов сияқты тұлғалардың жарқын іздері бар. Біз 90 жылдық мерейтой қар­саңын­да осы тұлғалар туралы «Өнегелі өмір» серия­сымен тарихи-танымдық кітап­тар шы­ғару­ды қолға алған едік. Бүгін «Сан­жар Асфендияров», «Ораз Жандосов», «Ха­лел Досмұхамедов», «Халел Әділ­гереев», «Мә­лік Ғабдуллин» деп аталатын кітаптар топтамасы қолымызға тиіп отыр. Осы кітаптардың әл-Фараби атындағы Қаз­ҰУ баспасынан шығуына қолұшын бер­ген ректор, академик Ғалымқайыр Мұтан­ұлы Мұтановқа және Қазақстан Жазу­шылар одағы Басқармасы төрағасы­ның орынба­сары Бауыржан Жақыпқа алғыс айтамыз. Мәмбет Қойгелді бастаған тарихшы ұстаздарымыз тұңғыш білім ордасының өткенін терең зерттеп, «Абай университеті. 90 жылдық тарихынан» деген кітапты жа­рыққа шығарды. Универ­сите­ті­міз биыл­дан бастап «Ұлағат» сериясымен өзіміздің танымал түлектеріміз туралы кітаптар шығаруды қолға алды. Алғашқы басы­лы­мы – белгілі математик Әбдімәжит Өтеш­ке арналған «Қалдырған ізің мәңгілік» деп аталатын жинақ. Сондай-ақ, «Ауызша авторлық әдебиет ғылыми-зерттеу орта­лығының» директоры, профессор Бекен Ыбы­райымовтың басшылығымен «Шер­нияз Жарылғасұлы шығармалары», «Алтын арқау», «Ұлттық рух және шығар­машылық даралық» атты зерттеу еңбектері жарық көрді. Университет қызметкері Мырзахан Ахметовтың «Парасат пен парыз» таным­дық кітабы мен «Тұңғыш университет» фотоальбомы да универ­ситет­тің 90 жыл­дығына арналып отыр», – деді. Тарихшы-ғалым Хангелді Әб­жанов, Ораз Жан­до­совтың ұлы, тарихшы- ғалым Әли Жан­досов, Ораз Жандосовтың тұңғыш немересі, университетіміздің түлегі, ақын Гүлнәр Едігеқызы Жандосова, Мәлік Ғабдуллиннің қызы Майдан Мә­лік­қызы, Хәлел Әділгереевтің ұлы Бақыт Әділгереев, университет түлегі Әбдімәжит Өтештің әпкесі Жарқын Өтеш, әл-Фараби атындағы ҚазҰУ профессоры Талас Омар­беков, ақын-драматург Нұрлан Оразалин және тағы басқа кеш қонақтары универси­тет ұжы­мын 90 жылдық мерейтоймен құттық­тап, білім ордасының тарихын ұрпақтан-ұр­паққа жеткізу жолында өне­гелі іс атқа­рып келе жатқан университет ректоры Та­кир Балықбаевқа және авторлар қауы­мына алғыс айтты.

Шоқан Құттыбаев,
Абай атындағы ҚазҰПУ-дың Қоғаммен байланыс бөлімінің қызметкері

ПІКІРЛЕР1
Аноним 28.10.2019 | 14:07

қасымов қ. ә математика пәні бойынша кітапты каидан таба аламыз

ПІКІР ҚОСУ

Ваш адрес email не будет опубликован.

Пікір