Қашанғы мың өліп, мың тіріле береміз?
Қазақтың бір-ақ мәселесі бар: ол «болу мен көріну». «Мен осымын» дейміз. Бірақ олай емеспіз. Абайдың «Аларман», «Десіндер» хәлі жанды жеп, қу нәпсі құлқынның ноқталы есегі болып кеткенбіз.Бұл барлық салада, барлық қабатта, барлық жерде көрініс беріп жатса, қалыпты жағдайға айналса, типтеніп дағды болса қалай ашынбайсың. Тілде бар, ділде жоқ, тірлікте бар ірілікте жоқ.
Досай КЕНЖЕТАЙ,
дінтанушы
«Мен қазақпын, мың өліп, мың тірілген»… Негізі мақтанатын сөз емес. Бұл қазақ ешқашан ауырып өлмеген деген сөз. Ол әрдайым ауырмай өлген. Ауырмай өлу – рухани дерт, даңғойлық, нәпсіқұмарлық, имансыздық, сатқындық, ойсыздық, надандық… осылай кете береді. Сосын тәні саудың жаны сау деп қояды. Бұлай сау болғаны құрысын. Аңдамай сөйлейді, ауырмай өледі. Аңдамай іс қылады, сатқындығын да білмей қалады. Аңдамай одақ құрады, сосын бәрінен айрылады да, ешкімге керек болмай қалады. Өз бауырына аңдамай қиянат жасайды, тағы ауырмай өледі. Тек бармағын шайнаумен күні өтеді.Аңдамай еліктейді, сосын өзінен өзі өледі. Өлген – ары, намысы. Сосын өзін ақтап тағы шығады. Өткеннен сабақ алмайды, тағы өледі. Қашанғы мың өліп, мың тіріле береміз?
Қазақ халқы тәубешіл. Ол рас. Бірақ тәубені қайта-қайта бұза беру деген өзіңді-өзің алдау емес пе?