БОЛАТТЫҢ «ТАЛАНЫ»
Биыл «Қазақфильм» киностудиясы үшін мерейтойлы, мерекелі жыл. Ш.Айманов атындағы «Қазақфильм» киностудиясы өзінің 75 жылдық мерейтойын тойлауда. Қазақстан Тәуелсіздігінің 25 жылдық мерейтойына да киностудия ұжымы үлкен дайындықпен келіп, Мәдениет және спорт министрлігінің тапсырысымен бірнеше көркем және деректі фильмдерді қалың көпшілікке ұсынды. Оның ішінде көрерменнің ықыласына бөленіп үлгерген «Анаға апарар жол» көркем фильмі мен «Фатима» деректі фильміне қоса, алдағы уақытта көрермен назарына ұсынылар «28 Панфиловшы», «Оралман» және Қазақ хандығының 550 жылдығына арналған «Қазақ Елі» көп бөлімді көркемсуретті фильмдері де бар.
Қазақстан Республикасының 25 жылдық мерейтойына орайластырылған тағы бір тың жоба – «Талан» атты фильмнің түсірілім барысымен танысу үшін Алматыдан журналистер қауымы арнайы аттандық. Фильмді ҚР Мәдениет және спорт министрлігінің тапсырысы бойынша Ш.Айманов атындағы «Қазақфильм» АҚ өндіріске жіберген. Бағытымыз – Алматы облысының Райымбек ауданына қарасты Күрметі ауылының шеткері жағы. Тау етегінде орналасқан қарағайлы орманның шетінде 1930-40 жылдардағы қазақ ауылы қонған. Мұнда режиссер Болат Қалымбетовтың «Талан» атты толықметражды көркем фильмінің түсірілімі басталып та кеткен екен.
Фильмнің сценарийі жазушы Жүсіпбек Қорғасбектің «Қасқыр-Адам» повесінің желісі бойынша жазылған. Кинофильм тарихымыздағы аса күрделі кезеңді адам болмысының құбылысы арқылы танытқысы келеді.
Түсірілім алаңында барған журналистермен кездесу барысында Болат Қалымбетов фильм жайлы ойымен бөлісті. Бұл фильм тарихымыздың ең қиын кезеңдері – жиырмасыншы ғасырдың отызыншы, қырқыншы жылдарында болған оқиғаларды қарапайым адамдардың өмірі арқылы суреттейді. Фильмнің мақсаты – сол замандағы адам бейнесін экранда көрсету.
«Бұл менің бесінші кином. Жобаны он екі жыл күттім. Әрине, ол үшін ешкімді кінәламаймын. Дүниежүзілік дағдарыстың салқыны біздің елге де тиді ғой. Енді «ештен кеш жақсы» деп, түсірілім жұмыстарын бастап кеттік. Түсірілім жұмыстарын 15 қарашаға дейін аяқтауымыз керек. Еліміз капитализмнің есігінен баяғыда аттап қойыпты. Қазір әрбір сағатымызға жұмсалған ақша есептеулі. Өкіметтен бөлінетін қаржыны тек қажетімізге жаратуымыз керек. Бұл бір есептен дұрыс шығар деп ойлаймын. Елбасымыздың өзі бір сөзінде: «Ақшаны оңды-солды шашпай, үнемдеңдер», – деп жатыр ғой. Әрине, кино – өнердің қиын саласының бірі. Кейде бір кикілжіңдер туып жатады. Ол үшін не істеу керек? Елімізде көп жылдардан бері талқыланбай жатқан «Кино туралы заңды» қабылдау керек деп ойлаймын. Бұл жайлы айта берсем, әңгіменің соңына жетпей қалуымыз мүмкін. Сондықтан кино жайлы қысқаша ғана айтып өтейін. Сценарий авторы мен және Ғазиз Насыров. Жүсіпбек Қорғасбектің «Қасқыр-Адам» деген повесінің желісімен түсіріп жатырмыз. Әрине, жазушы шығармасынан бірталай өзгерістер болуы мүмкін. Оған Жүкең ренжімейді деп ойлаймын.
Ал киноны шамамыз келгенше жаңа сарынмен түсіріп жатырмыз.Талан дегеннің бір мағынасы тағдыр ғой. Сондықтан мұнда адамның тағдыры басты сипат алады. Кино отызыншы, қырқыншы жылдардағы оқиға негізінде өрбиді. Сол кезеңдегі адамдардың тағдыры, қарым-қатынасы арқылы күрделі кезеңнің суретін салғымыз келді. Киноны түсіруге Күрметінің ғажап табиғатын арнайы таңдап алдық. Біз адам тағдырымен қатар ұлттың табиғатын да көрсетсек дейміз. Әзірге киноның қырық пайызы түсіріліп бітті. Өзім жаңа, жас актерлерді ашқанды ұнатамын. Сондықтан басты рөлдердің бірін сомдауға Асан Мәжит (Тағай) пен Жасұлан Әйтеновты (Керім) таңдап алдым. Әрине, Асан бірнеше сериалдар мен кинолар арқылы көрерменге таныс болып қалған да шығар. Бірақ Жасұлан бұрын-соңды киноға түскен емес. Фильмді үлкен экраннан 2017 жылдың наурыз айында көресіздер деген ойдамын. Мұнда айта кетер дүние – бұл фильм Қазақстан Республикасы Тәуелсіздігінің жиырма бес жылдығына арналып отыр. Себебі, киноның негізгі оқиғасы біздің ұлттың, елдің тағдырына байланысты кезеңді қамтиды», – дейді Болат Қалымбетов.
Болат Қалымбетов бұл фильмді он екі жыл күттім дегенімен, білуімізше, дәл осы сценарий түсірушісін одан да көп уақыт күткен сыңайлы. Себебі, көпшілікке «Жансебіл» сынды туындысымен жақсы таныс рефиссер Аяған Шәжімбай «Қасқыр-Адам» повесінің желісімен киносценарий ұсынып, ол нарық жылдарымен тұспа-тұс келген уақытта, біраз уақытқа кейін шегерілген еді. Не болса да, қазақ халқының отызыншы, қырқыншы жылдары бастан өткерген тарихын көркем тілде кестелеген туынды 2017 жылы қалың көрерменімен қауышады деп сенеміз.