Сөзін жазған: Аманғазы Кәріпжанәулеті
Музыкасын жазған: Мұратбек Сарыбасов

 

 

 

Ақша бұлттан әрі асқан

Ай жұлдызбен таласқан

Тарбағатай құт мекен

Ынтымағы жарасқан

Бұйырған елге несібің

Арманның ашты есігін

Қияға қанат  қақтырған

Туған жер алтын бесігім.

 

Қайырмасы:

Пейілдері ақ шуақ

Суаттары нақ шұбат

Жарқырай бер қазақтың

Исі аңқыған Ақсуат.

 

Жадыратқан тірлікті

Базар, Боғас, Кіндікті

Қарғыбаның бойынан

Түлейді екен кіл мықты.

Сыр жасырған әр тасы

Бөртостаған  жартасы

Ғаламда жоқ даламның

Тәңір таққан алқасы.

 

Қайырмасы:

Береке бірлік бақ қуат

Дарыған жер Ақсуат

Сенде өткізген бір күнім

Мың күнімнен жақсырақ.

 

Қыз жаралса намыстан

Ұлдары кілең арыстан

Қазақтығын сақтаған

Біздің дала данышпан.

Жат көңілін жықпаған

Жарастықты құптаған

Амандасқан қонағы

Ауыз тимей шықпаған.