ЖЫМҚЫРМАМЫЗ ЖАС ПА, ЖАСАМЫС ПА?
05.08.2016
971
0

Оқырман хатыАты-жөні белгісіз оқырманнан келген  хат әбігерге салғаннан бөлек,  алты жыл бұрын шыққан «Алаш айнасы» газетінің беттерін ақтарып шығуға мәжбүр етті. Астана күніне орай ұйымдастырылған сұрауларға жауап берген  көзеліміз біреудің сөзін өз сөзі етіп ұсынуының себебін неге жорырымызды білмей дал болдық. Хатты оқырманға жеткізуді жөн санадық.

Атыңнан айналайын, «Қазақ әдебие­ті»! Әдебиет пен мәдениеттің қайнар бұлағы, ұлттық болмысымыздың айнасы деп оқимыз өзіңді. Осы пікірге қара дақ түсуін қаламаймыз да. Бірақ 8.07.2016 ж. №28 нөмірде Айнара Ашан­ның «Бабалар аңсаған қайырымды қала» материалында Г.Құдайберген­қызының «Далалық дүниетанымның қайта оралуы» атты «терең толғанысы» жарық көрді. Мұны тырнақшаға алудың себебі бар.

Енді 2010 жылғы 3 шілдедегі «Алаш айнасы» газетінің 1 бетінде басталып, 6 бетінде  аяқталған «Астана  идеясы қа­зақ­қа не берді?» атты Құбаш Сағидол­ла­­ұлының мақаласын оқып шығыңыз­дар. Тақырып, содан соң Г.Қ.-ның тү­сіні­гіне тым ауыр тиген бірді-екілі тір­кес және «дер едім», «деп білемін» де­ген «авторлық бояу» болмаса, қаз-қал­пында көшірілген. Автордың қырағы­лығын мойындау керек, «Астана 12 жылдық тарихында» деген де «18-ге» өзгертілген.

Бір қызығы…  Дәл осылай басталатын бір абзац қана «Алаш айнасының» тура сол нөміріндегі тура сол мақаланың астына орналасқан Дария Беркенқызы дайындаған «ВВС-ді таңғалдырған жас қала» деген материалдан ұрланған. Сонда «Қазақ әдебиеті» араға 5-6 жыл салып, «Алаш айнасын» қайталап отыр ма? Авторлық құқық дегенді естіген­де­ріңіз бар ма?

«Авторша» айтайық. Бір «қызығы», Г.Қ. болашақ журналистерге дәріс беріп жүрген мүйізі қарағайдай оқу орнында аға оқытушы екен. Өзі ұрлықпен айналысатын оқытушы қандай маман дайындайды? Бұған қатысты Еуразия университетінің журналистика факуль­те­тінің деканы не жауап қайтарар екен? Кадрын қорғай ма, әлде ұлт пен ұрпаққа жаны ашып, шындықты жақтап, бір шара қолдана ма?

Осындайда оқытушылық лауазымды, ғылыми дәрежені  балдыр-батпақ­пен, таныс-біліспен сатып алған жоқ па екен деген де жымысқы ой келеді қауақ ба­сымызға.

Құрметті редакция алқасындағы дүйім қазаққа қадірлі қаламгер азаматтар! Келер сандарыңыздан дәл осы са­уалға жауап күтеміз газет бетінен. Сөз қадірін өз қадірім деп білетін, ұлттың ұяты болып саналатын «Қазақ әдебиеті» қазақтың сөзін, қазақтың әдебиетін, журналистиканы, ұстаздықты ойыншық санайтындарды бетімен жібермеуге тиіс. Әйтпесе, газеттен оқып жүрген сара сөз, салымды ойлар бекер болмақ. Жауап газет  бетінде жарияланса, соңғы уақыт­та біреудікін көшіріп, көсемсіп жүрген­дерге сабақ болар еді. Артық-ауыс кеткеніміз болса, кешірім етерсіздер.

«Қазақ әдебиетінің» оқырманы. 

 

ПІКІР ҚОСУ