САРЫАРҚАНЫҢ ЗЕРЛІ ТӘЖІНДЕЙ…
– Аңыз бен ақиқаттың арасын жақындатқан құдіретті уақыттың өшпес ізін тамашалап, қыран қанатты еліміздің болашақ дидарын көз алдыңызға елестеткіңіз келе ме? – Әрине, мүмкін болса.
Осынау елең еткізер қызықты да, күпті сауалға белгілі фотожурналист Шүкір Шахайдың «Астана – Қазақстанның жүрегі» аталатын жаңа фотоальбомы жауап берсе керек. Танымал шебердің қырағы объективіне ілінген әр туындыға, әр суретке жіті үңіліп, байыппен назар аударған сайын кешегі күннің жаңғырығын естіріңіз хақ. Бұған дейін тәуелсіз мемлекетіміздің елең-алаңынан бастап, алғашқы тәй-тәй қадамы, есею-еңсеру баспалдақтары, қалыптасу кезеңдері мен өсу-өркендеу сәттері хақында жан-жақты баян етер құнды кітаптардың авторы бұл жолы елорданың фотошежіресін ұсынған.
«Астана бүкіл Қазақстан дамуының
локомотивіне айналуы керек».
Н.Ә.НАЗАРБАЕВ.
Ұлы тарихтың, толғақты тағдырдың қас-қағым мезеттерінен өрілген фототуындылардың айтары мол. Ғажабы сол, өзге өнер түрлеріне қарағанда дәлдікті, нақтылықты қажет ететін фотоөнері әр оқиғаны, әр жаңалықты қаз-қалпында жанарыңа елестетеді. Асқақ пафоссыз, еш артық-ауыс бояусыз. Керемет деп осындайды айтса болар.
Шүкір Шахайдың әр фотосын тамашалап отырып, еріксіз өткенді еске түсіресің. Құлағыңның түбіне қаршадай кезімізде асыл әжелерімізден естіген «Ерте-ерте, ертеде…» сарынына ұқсас сиқырлы әуез келетіндей. Жоқ, қателесетін тәріздімін. Ескі естегінің ежелгі әуені емес екен. Бұл – бүгінгі дәуірдің, қазіргі заманның ертегісі болса ше! Тұп-тура осыдан он-он бес жыл бұрын әппақ шаңы шыққан, сайын даласында ебелегі кезіп, күндіз-түні өкпек желі өксіген өңір еді дегенге жан баласы сенбейді-ау! Өйткені, көз алдыңда құлазыған құладүзде асқақтай бой көтерген алып шаһардың бұлттармен таласқан зәулім ғимараттары, оқтай тартылған даңғылдардың жиектерін көмкерген архитектуралық айшықты ансамбльдер, ерке Есілді ерсілі-қарсылы шимайлай өрнектеген әрқилы көпірлер, көз жауын алар тұрғын үй кешендері, ірі-ірі әлеуметтік-мәдени орталықтар, әлемдік деңгейдегі нысандармен иық тіресетін стадиондар мен спорт сарайлары, театрлар мен білім ордалары. Қала қақпалары – әуежайды, темір жол вокзалын бір-бірімен жалғаған күретамыр жолдардың ажарын ашқан түрлі-түрлі ескерткіштер, ойдым-ойдым көк-жасыл саябақтар мен бұрқақтары аспанға атқақтаған әсем гүлзарлар… Бәрі-бәрі құрыш қолды құрылысшылар күні кеше ғана тұрғызған. Бұл күнде халық игілігіне қызмет көрсетуде.
Аз уақыттың ішінде Сарыарқаның төрінде барлық сән-салтанатымен шаңырақ көтерген Қазақ елінің астанасы жайында небір теңеулер мен эпитеттер айтылуда. Жүрек түкпірінен шыққан лағыл лебіздер, ыстық ықыластар мерейімізді марқайтып, еңсемізді тұлғаландыра түсетіні және рас. Бір мезет көңілімізді шалқытып шарықтатар сол сөздерді жадымызға түсіріп көрейікші. «ХХІ ғасырдың ғажайыбы», «Дала төсіндегі жұмақ-шаһар», «Астана – Қазақстанның жүрегі», «Елорда – Елбасының ерлігі», «Келешегі керемет қиялдағы қала».
…Сырт көз – сыншы. Қуаныштысы, жоғарыда тізген тамаша тіркестерді көптеп түзуге болады. Әңгіме әуеніне қарай есімдері әлемге әйгілі марқасқалардың байтағымыз жайында жүрекжарды лебіздерінің кейбірін жаңғыртуды жөн санадық. Атақты бразилиялық жазушы Пауло Коэльо өз әсерін былайша білдіріпті: «Мен қазірдің өзінде Астананы дала төсінде жайқала өсіп келе жатқан гүлге теңей аламын. Қазақстанның жаңа елордасы мына дүниенің мәңгі тоқтамас көшпелілері мен дәруіштеріне жаңғыртудың қандайлық маңызды екенін еске салып тұратын болады». Ал дүние жүзінің барлық елдерінің көбінде болып, астаналарын тамашалаған Біріккен Ұлттар Ұйымының Бас хатшысы Пан Ги Мун көрікті ойын төмендегіше түйеді: «Астананың
ажары – жаңа Қазақстанның бедерлі бейнесі. Бұл қала әр түрлі этносқа жататын, әр түрлі дін ұстанатын бір ұлт ретінде үйлесімді өмір сүретін адамдардың ортақ үйі, ол өңірдегі ең қарқынды дамыған және экономикалық жағынан табысты қалаға айналған».
Рухың асқақтап алақаныңдағы елорда жылнамасын ынтыға парақтарың сөзсіз. Құдды кинолентадай тізбектеліп, бірінен соң бірі көз жауын аларын қайтерсің. Көк күмбезді айбынды да, айдынды Ақорда, Астананың бойтұмарына айналған Бәйтерек, ай-мұнаралары аспанға шаншылған Нұр-Астана мен Әзірет Сұлтан мешіттері, достық пен бірліктің ыстық ұясындай көрінер Пирамида, шұғылалы шаңырағын күн сүйген Ханшатыр, ұшар басында ақша бұлттар ойнаған ҚТЖ мен Медиа-орталық, еңселі елорданың Бас қақпасы – Салтанат аркасы, тәулік бойына шамы сөнбейтін Цирк үйі, Сарыарқаның салқар құшағындай керілген Министрліктер үйінің алып ғимараты, адамдарға қажетті сервистердің бәрі қамтылған – кондоминиум-кварталдар… Келешекке қол созған Астананың кез келген бұрышы, кез келген бөлшегі жүрекке ыстық-ау. Сәулет өнерінің тілімен жазылған, әлемдік архитектураның теңдессіз үлгілері үйлесімді құп қосылған ғажайып ғимараттар керуенін одан әрі тамашалай түскің келеді. Тәуелсіздіктің символы саналар Қазақ елі монументі, дөңгелек шеңберлі алаң, доллар бейнелі Қаржы министрлігі, алтын конусты «Самұрық» офисі, жұмыртқа пішінді архив үйі, көкке атылған зымыран кораблінің өзіндей «Байқоңыр» тұрғын-үй кешені, ат шаптырым аумақты алып жатқан ірі-ірі медицина орталықтары, жоғары оқу орындары мен білім ошақтары, мәдени-ғылыми мекемелері бірін-бірі толықтырып, Астана ажарына көрік қосып, құлпыртып, сұлуландырып жібергендей.
Мың бұралған Есілдің қос жағалауындағы құрылыс жұмыстары толассыз жүргізілуде. Жарқ-жұрқ жымыңдаған түнгі шырақтар мен отшашулар Астана келбетін одан бетер айшықтай түскендей.ЭКСПО қалашығының құрылысы күн санап құлпырады. Егемен еліміздің ертеңі шынында ертегідей дерсің сүйсіне. Қала тынысы тәулік бойына сәл саябырламайды. Өйткені, Астана – Қазақстанның жүрегі ғой. Бұл сөзді бүгінгі таңда әр қазақстандық қуана, мақтаныш сезіммен айтады. Шын мәнісінде солай. Ақбас Алатаудың алтын алқасы Алматы – Тәуелсіздік бесігі болса, Астананы Елбасының сөзімен жеткізсек: «Қазақстан дамуының локомотиві».
Иә, Астананың өркендеуі – Қазақстанның өркендеуі. Шынайы пікірді Шүкір Шахайдың фототуындылары айғақтай түссе керек. Астана альбомында елорданың мерейлі мерекесі кезінде Қазақстанның облыстары сыйға тартқан құрылыс нысандарының фотосуреттері де берілген. Сонымен бірге, облыс орталықтарында жаңадан ашылған, тікелей Астана есімін иемденген мекендердің фотолары да жарияланыпты. Республика байтағының төрінде бой көтерген жыр алыбы Жамбылдың зәулім ескерткішін Алматы облысы, даңқты батыр Бауыржан Момышұлының ескерткішін тараздықтар сыйға тартқан. Шығыстың ержүрек шынары Әлия Молдағұлованың ескерткішін ақтөбеліктер тұрғызғаны баршаға мәлім. Сондай-ақ, өзге де облыстардың тартулары – сұлу су бұрқақтары мен әсем әуіздер, саялы бақтар мен жайнаған гүлзарлар… Ал облыстардың кіндік қалаларындағы тарихи орындар көпшілік назарын аударары даусыз. Естен кетпес мезеттерді әр қырынан бейнелеген фотосуреттерге қарай бергің келеді, қарай бергің келеді.
Кешегі мен бүгінді астастырып, өткен мен болашақты жалғастырып, алтын көпірдей көрінер бұл көріністер – тарихтың ұмытылмас қас-қағым сәттері емес пе! Объективтің әр шыртылы – хас шебердің қиял көзі, ой көзі, сезім көзі. Назарға алған нысанды бар нақышымен, бар бояуымен, бар болмысымен түсіріп алуға ұмтылады. Игілікті ізденіс жеміссіз де емес. Оның дәлелі қолыңызға ұстаған фотокітап – Астананың фотошежіресі. Бір қызығы, әрі таңқаларлығы есімі дүние жүзіне мәшһүр жапон архитекторы Кисе Курокава кескіндеген елорда дидары танымастай өзгеріске ұшырауда. Дәуір талабы, өмір талабы, уақыт талабы. Қазақ Елі астанасының қарқынды тіршілік-тынысы тудырған тың өзгерістердің соны серпілістерге ұласуы заңды құбылыс. Ойымызды бодандық қамытынан құтылып, тәуелсіздігімізді алғанда тұңғыш рет құттықтап, жүректері жарыла қуанған бауырлас, ежелден тамырлас Түрік Республикасының бұрынғы Президенті Абдулла Гүлдің лебізімен шегелемекпіз: «Әр келгенімде гүлдене түскеніне куә болып жүрген Астана қаласы – Қазақстанның динамизмі мен Президент Назарбаев мырзаның көрегендігін бейнелейтін ең үлкен туынды». Биік баға, әділ пікір.
…Ақиқи архитектуралық туындыға айналған Астананың келбетін айшықтаған құрылыс графикасы, құрылыс пейзажы күн ілгері озған сайын түрлене түспек.
…Шуақты дидарын таң қылаң бергеннен күннің арайлы нұры аймаласа, түнде алтын айдың сәулесі тербеген Сарыарқаның зерлі тәжіндей жарқыраған Астана болашаққа беттеп барады.
…Келешекке қол созған жасыл белдеулі қазақ шаһарының қазіргі қарышты қадамы керемет-ақ.
Жанат ЕЛШІБЕК,
Халықаралық «Алаш» әдеби сыйлығының лауреаты.
АСТАНА.