Адамның адам санатында жер басып жүруі үшін адам болуы шарт емес.
***
Беделді жоғалтпаудың ең тиімді тәсілі – оны еш уақытта пайдаланбау.
***
Ешнәрсеге түсінбей күлкіге батқан адамның денсаулығы арта бермек.
***
Киіміңе дақ түсіргенше, арыңа дақ түсір. Алдыңғысы жұрттың бәрінің көзіне түскенмен, соңғысын ешкім де көре алмайды.
***
Дарынды жазушылардың шығармаларын ортақол жазушылардың туындыларымен салыстыра сынасаң, алдыңғысы да, соңғысы да ұтылмайды.
***
Тіліңнің кесірінен зәбір-жапа шегіп, басыңды тауға да, тасқа да ұрғаннан гөрі, сол тілді шайнап тастаған артық.
***
Әйеліңді алға салып отырсаң – адаспайсың, адасуың мүмкін, бірақ айыпты болмайсың.
***
Шындықтың бетін біреу ашқанмен, ол жарыққа шыққаннан кейін авторлары әлденешеу болып кетеді.
***
Өз орныңа біреуді қойып, оның іс-әрекетін сырттай бақыласаң, жының келеді.
***
Үйдің іші-сырты жиһаз бен басқа да байлықтарға толып тұрғанда оның ішінен адам табу қиын.
***
Ешкімді менсінбейтін адамның төбесінен қарайтын бір нәрсе бар, ол – басындағы бас киімі.
***
О басында адамдар малды жетекке жүруді үйретті де, одан кейін өздері жетекке жүруге машықтанды.
***
Қолтаңба – өмірдегі құнсыз сыйлықтардың бірі.
***
Гарнитур – бір семьяның толық жинағы.
***
Оркестр – таяқшамен жөн сілтемесе, өз еркімен үн шығара алмайтын өнерпаздар жиынтығы.
***
Келгенде Аяз ата екенін анық білгенмен, оның кетерде қай атаға айналатынын бір Құдайдың өзі біледі.
***
Зачетка – студент білімінің толық жинағы.
***
Ақыл дегенің бар болсын, жоқ болсын, адамға қорлық көрсеткеннен басқа түк бітірмейді.
***
Жас кезіңде түкке қажеті жоқ, ал қартайғанда іздеп таба алмайтын нәрсең – жастық шағың.
***
Тілді тағам ретінде пайдалансаң, дәмді-ақ, ал сөйлеу құралы ретінде пайдалансаң, өзіңе таяқ жегізеді.
***
Үлде мен бүлдеге бөленген адам да өзінің о басында анадан жалаңаш туғанын ұмытпауы керек.
***
Қолынан жазу-сызу келетін адамға өзін соавторлыққа ұсыну да – тапқырлықтың бір белгісі.
***
Бітпес істі – түсінікті нәрсені де өз қолына алса, түсініксіз етіп жіберетін адамдар басқарады.
***
Әділетті адам шындықты бетке айтам деп толғангып жүргенде, әділетсіз адам сол шындыққа қарсы майдан ашып та үлгереді.
***
Өзіне-өзі табынған адам еш уақытта жеке адамға табынбайды.
***
Ең дарынды деген ақыннан асып түсу үшін де сол дарынды ақынды бетке ұстау керек.
***
Арқадан түскен ауыр жүк кейде аяғыңды жаныштап кетеді.
***
Арақты татып алмағанмен шөлмегімен үйге алып қойғанның айыбы жоқ.
***
Шындықты тура айту үшін де әңгімені орағытып бастаған ұтады.
***
Қолына билік тиген адам көбіне қамшы салдырмайды.
***
Көлеңкеде тұрған адамның жан-жағының бәрі көлеңке.
***
Көгерген көк тиындық құны жоқ жұмыс істеп те жүз сомдап ақша табуға болады.
***
Көбіне бастық болу қолдан келгенмен, басқару қолдан келмегендіктен, адам өзінен де, өзгеден де өш алады.
***
Дон Жуанның рөлін тамаша ойнайтыны сондай, оны сахнадан көрген әйел баласы басқа жерде көрсе, еріксіз қолтығында кетеді.
***
Вулканды сырқаты меңдеткен тауға теңегің келеді, қызу әбден көтерілгенде құсады.
***
Жұмыс бабымен жалақысын өсіре алмаған адам диссертацияға қол созады.
***
Ақша іздемейтін ақын да ақша үшін ұйқас іздеп отырғанын сезбейді.
***
Қыздарға біреуге қалыңдық болу үшін өтірік болса да алдануы керек.
***
Әйелдерге қоғамдық жұмыс демалу үшін керек, әйтпесе, бала бағып, кір жуып, күйеуіне тамақ даярлап, дүкендер аралап, діңкесі құрыр еді.
***
Өзіңнің кім екеніңді білгің келсе, көршіңнің сен туралы айтқан әңгімесіне құлағыңды түр!
***
Барлық бәле – қырық градуста.
***
Кейбіреулер ойлайды жазушы емеспін, ақын емеспін, менің автографым кімге керек деп. Кассаға керек.
***
Жалқаудың үміт артқан күні бар, ол – ертең.
***
Адам мен балықтың қарым-қатынасы – қармақтың ұшында.
***
Бойдақ болу қиын емес, ешбір қыз-келіншекті ұнатпасаң болды, олар сені жек көреді де, бойдақ болып жүре бересің.
***
Қара уылдырығы қара ниеттілердің қолына түскенде балық ұялғаннан қызарады да, қызыл балық деген атқа ие болады.
***
Бюрократ – ешкімді менсінбеудің тәсілін тапқан өнертапқыш.
***
Окулист – көзден сыр ұрлайтын адам.
***
Еркектің нақсүйері – өз әйелінің жасанды серігі.
***
Әлі күнге дейін бір де бір сыйлыққа ие болып көрмеген жанр – арыз.
***
Қансонардағы қасқырдың ізі сияқты отбасын тастап кеткен еркектің де ізі сайрап жатады, сол із апарып алиментке тірейді.
***
Зоопарктегі аңдардан «Сендерді неге торға қамап қойған?» – деп сұрасаң, олардың егер тілі болса, «Кең дүниеге сыймай кеттік қой» деген жауап қайтарар еді.
***
Емтиханды мен студенттің біліммен жекпе-жегі деп едім, бір студент келіп түзету енгізді: оның ойынша, емтихан – бұзау мен бұқаның шайқасы.
***
Біреудің мықтылығын да, әлсіздігін де паш ететін жанр – анекдот.
***
Оқымысты – көп оқығаны үшін үкіметтен ақша алып тұратын жатып ішер.
***
Жалтырбастың бір ерекшелігі – шашы ағармайды.
***
Қожанасыр болмаса, оның есегінің де аты шықпас еді.
***
Әйел еркек үшін тылсым дүние де, ал еркек әйел үшін ақымақ қана.
***
Бойында ешбір міні жоқ адам да сол мінсіздігінен зардап шекпек.
***
Әр нәрсеге сын көзбен қарағанда адам ілгері баспақшы, ал бәрін құшақ жая қабылдаған кері кетпекші.
***
Адамның көркі қимылында.
***
Айтыс-тартыс кезіндегі ұстамдылық – ардың тазалығы.
***
Адал еңбек бағаланбаған жерде арамзаның құны артса, өмірдің ең үлкен өкініші – сол.
***
Жақсының да, жаманның да санатына қосылмаған адам – хайуанның бір түрі.

***
Бүкіл өмір бірнәрсені күтумен ғана өтеді.

***
Халық есін жиғаннан кейін өткен тарихына үңіледі.

 

 

Сайымжан ЕРКЕБАЕВ