Екібастұздық ақын Алмагүл Жүгінісова Көкшетау қаласында Қазақ хандығының 550 жылды­ғына орай өткен аймақтық ақын­дар айтысының бас жүлдесін же­ңіп алды.

Алмагүл ақынның өңірлік додалардан әкелген жүлдесі бұл ға­на емес. 2010 жылы Ақмола об­лысының 70 жылдығына, Көк­шетау қаласының 185 жылдығына ар­налған «Жер шоқтығы – Көк­ше­тау» атты республикалық ай­тыс­тың бас жүлдесін алып келген болатын. Сондай-ақ, 2009 жылы Баянауыл ауданында «Ел ертеңі – ауылда», сол жылы Павлодар жә­не Екібастұз қалаларында нау­рыз мерекесіне арналған об­лыс­тық айтыстардың жеңімпазы бол­ған. Бұл жолғы айтыс Көкшетау қа­ласының «Жасыл орман» шипажайында «Бурабай Fest» қазақстандық өнер­лі жастардың бірінші фестивалі аясында ұйымдастырылды. Аламан додаға Астана, Петропавл, Арқалық, Павлодар және Көкшетау қалаларынан бар­лығы 8 ақын қатысты.

– Сөз сайысына айтыс сахнасына соңғы жылдары ғана шықса да, өткір сөз, терең ойымен тыңдармандарын аузына қаратқан жалынды жас ақындар келіпті. Айтыс өте қызықты әрі тартысты болды. Тақырып Қазақ хандығының 550 жылдығы болған соң, өте салмақты өтті. Арзан сөзге, жеңіл әзілге ешкім жол берген жоқ. Қазақтың өткен тарихын, басынан өткен зобалаң жылдар оқи­ғасын жырлауға тырыстық, – дейді ақын Алмагүл Жүгінісова.