Ұлттық ұстаным
Қазақта батырлықты мадақтау, Ел арасында батырлардың есімін ардақтап, ұлан-асыр той жасау мен ас беру кең етек алды. Біздегі батырлар жырындағы гипербола, яғни олардың тұлғасын асыра әсірелеу ескілікті әдіс болса да, әлі күнге баурағыштық күші барына таңырқайсың. Жалпы, бұл қасиетімізді ұлт ретіндегі ерекшелігіміз десек те болатындай. Әйтсе де, ара-тұра басқа ұлттардың, әсіресе орыс тарихшыларының «Қазақтардың өзгелерден артықшылығы – олар атқа жақсы отырады және ат үстінде керемет айқасады» деген пікірлерін оқып қаламыз. Сондай-ақ, отырықшы халықтар мен көшпенді халықтардың айырмашылығын зерттеген ғалымдар көшпенді халықтардың өте алғыр, мәселені шешуге келгенде жылдам және өткір келетіндігін айтады. Ал отырықшы халықтар тиянақтылығы мен ерік-жігерінің мықты, төзімділігімен ерекшеленеді дейді. Өткен ғасырда өмір сүрген бабалардың ерлігі мен өрлігін мақтан етіп, олардың әр ісін өнеге тұтуымыз, әрине, орынды. Әйтсе де, соңғы кезде әр ру өз аталарын түгендеуді, олардың көзсіз батырлығын дәріптеуді дәстүрге айналдырған секілді. Ал осы әрекеттердің ұлт тұтастығына, ұрпақ алдындағы жауапкершілікке, тіпті мемлекеттік аппарат құруда қандай әсері болуы мүмкін? Осы көшпенді өмір салтынан қалған мінезіміздің бізге тигізетін пайдасы көп пе, әлде зияны басым ба? Мықты мемлекет болу үшін қазаққа қандай ұстаным қажет? – деген сауалдарға жауап іздеп көрген едік…
Бексұлтан НҰРЖЕКЕ,
жазушы
Қазақ қайда қалады?
Қазақта әр ауылда, әр өңірде батырлар болған. Кейбіреулер қазақтың бәрі батыр ма деген пікір айтады. Батырлық деген жауды өлтіру, қырумен ғана шектелмейді. Елдің есесі кетіп бара жатқан жерде бел шешіп, кесімді сөз айтып, әділдік танытқан кісіні де қазақ батыр деген. Сөйлемей бұғып қалатын, бүгін мынаны, ертең ананы жақтапжүретін адамдарды қорқақ, ез дейді. Ондайлар не өзін, не басқаны қорғай алмайды. Қазақтың билерінің ішінде де ешкімге туысқаншылық, рушылдық жасамайтын, қара қылды қақ жарған әділ адамдар «батыр» атанған.
Қазір радио, теледидардан көкірегін керіп, «біз анандаймыз, біз мынандаймыз» деп сөйлеп жатқандарды жиі көреміз. Осындай адамдардың әңгімесін естіп отырып, қатты қынжыламын. Өйткені, оның айтып отырғаны біздің ерлік емес, ертедегі біздің ата-бабаларымыздың әділдігі. Бұрын бүйткенбіз, сөйткенбіз дегеннен гөрі, біз осылай жасап жатырмыз ба дегенді ойланғанымыз жөн секілді.
Қазіргі кезде ең жоқ дегенде әрбір рудың он-он бес шақты қоры бар. Ал қазақтың басын біріктіретін қор бар ма? Әрине, мүлдем жоқ деп айтуға болмайды, бар. Бірақ ондай қорлар некен-саяқ. Егер осылай ру-ру болып бөлініп, әркім өз ата-бабасына ескерткіш орнатумен айналыса беретін болса ертең қазақтың жері шұбар ала болады. Сонда әр рудың, тайпаның ғана мүддесін қорғап кететін болсақ, қазақ қайда қалады? Қазақтың жері қайда қалады? Ал осы мәселеге саналы көзқараспен қарасақ, әр рудан тараған ұл мен қыз сол руға қойылған ескерткіш емес пе… Одан да бабалар қорын құрсақ, ұлтқа қорғаныш болар еді деп санаймын.
Жалпы, руды қорғаудан қазақтың көсегесі көгереді деген түсінік қате деп ойлаймын. Рулық, тайпалық дәуір деген әрбір мемлекетте болған. Бірақ олардың барлығы да өткен тарихтың қойнауында қалды. Бұдан гөрі біз Тәуелсіз мемлекет құрып, Ұлт болуды ойлағанымыз жөн болар еді. Егер осы бетімізбен кете берсек, біздің Тәуелсіз мемлекетіміздің жалауы еш жерде желбіремейді. Абайдың:
«Бас-басына би болған өңшең қиқым,
Мінеки, бұзған жоқ па елдің сыйқын», –
деген сөзі біздің қазіргі жағдайымызға сай айтылғандай.
Қор құрудағы ең басты мақсат – жеке-жеке бастық болуды ойлағаннан туындаған мәселе деуге де болатындай. Шын мәнінде, қазақ бір атадан тараған. Мысалы, кеңес өкіметі кезінің өзінде ұлы жүзді Ақарыс, орта жүзді Жанарыс, кіші жүзді Бекарыс дейді екен деп естігенбіз. «Алтау ала болса ауыздағы кетеді, төртеу түгел болса төбедегі келеді» деген мақалдың өзі сол Арыс бабамыздан қалған екен. Үлкен ұлын Ақарыс, ортаншы баласын Жанарыс, кішісін Бекарыс деп атаған. Ал Ақ пен Пан деген баласы Тәңіртаудың түбінде жылқы күзетіп жүрген кезінде үсіп, қайтыс болады. Сондықтан да сол айды «ақпан» деп атаған. Ал осы сақтарды және біздің арыс бабамыз шетелдерді аралағанда өзінің туысы Тоқсарымен бірге жүрген дейді. Ал Геродот, Лукияндардың жазбасында «Грек еліне бірінші келген анахарсистер емес, тоқсаниттер еді» дейді. Бұдан біздің шежіреміз бен Геродоттың жазғандарының бәрі бір арнаға тоғысатынын аңғаруға болады.
Бұл айтылған сөздерді руыңды құрт, тайпаңды құрт деп түсінбеуіміз керек. Бірақ кішіліктен асып, мемлекет болу жолында біріккен адамдардың енді қайтып рулыққа қызмет етуі дұрыс емес деп есептеймін. Бұл ілгерілеу, өсу емес, кейінге шегіну, өшу дер едім. Шындығына келсек, руға бөлінудің арғы жағында руын дәріптеу, көсем, ақша, бәсекелестік деген сияқты көптеген мәселелер бар. Бір сөзбен айтқанда, ата-бабаның атын бизнеске айналдыру секілді. Ал бұл бизнес емес, ұлттық идеологияға айналуы керек. Біз қазір осы жағын ойлап жатқанымыз жоқ. Жеті атаңды біл дегенге әркім өз руынан кімдер шыққанын түгендеп кетті. Мұның соңы жақсылыққа апармайды. Бір жағадан бас, бір жеңнен қол шығарып, жұмылған жұдырықтай берік болғанда ғана мықты мемлекет құра аламыз. Ал мемлекет құра салу оңай шаруа емес. Сол үшін де жеке бастың мүддесін кейінге ысырып, біртұтас ұлт болудың қамын жасағанымыз жөн.
Тұрсын Ғабитов,
философия ғылымының докторы, әл-Фараби атындағы
ҚазҰУ профессоры
«Батыр» – тарихи-мәдени феномен
Еліміздегі «батыр» феноменін мадақтау, ел арасынан батырларды көп шығару, батырлар тұлғасын асыра әсірелеу ұзақ жылдарға созылған бодандық пен тоталитаризмнен кейін келген тәуелсіздік пен азаттықтың алғашқы уақытындағы жағымды толқын іспеттес. Бірақ ұзақ уақыт осындай эмоциялардың жетегінде қала берген дұрыс емес. Шешілмеген мәселелер де аз емес. Батырлық нақтылы ұғым және ол ғасырлармен, жаугершілік заманымен, азаттық үшін күреспен байланысты және «жырау», «рубасы», «көсем», «қолбасы» сияқты негізінен өткен тарихпен байланысты.
Батыр – өзінің жігері мен ерлігі арқасында қауымнан дараланып шыққан мәдени кейіпкерге жатады. Ол тек жаугершілік оқиғаларында ғана емес, сонымен қатар елін басқыншылар мен табиғаттағы тылсым күштерден қорғауда орасан зор жанқиярлық танытады. Мысалы, «Манас» жырында қырғыз батыры Сырғақ оқ пен найза алмайтын жалғыз көзді циклоп Малғұнды көзін түйреп жеңеді. Фирдоусидің «Шахнамасына» Рүстем зал циклоп Исфендиарды екіұшты жебемен жаралайды. Табиғи кесір күш сияқты батыр да ерекше қорғалған. Мысалы, Манас, Алпамысты «атса мылтық өтпейді, шапса қылыш кеспейді». Батырдың даралық қасиеті әмбебапты сипатта келтіріледі. Мысалы «Қорқыт ата жырындағы» батыр Бисаттың циклоппен шайқасын алайық. «Төбекөз» туралы аңызды алғаш зерттеген неміс ғалымы Диц. Ол Төбекөзді Гомердің «Одиссейіндегі» Полифеммен салыстырады, сөйтіп гректер бұл аңызды Шығыс елдерінен алған деген қорытындыға келеді. Археологтар Енисей бойынан жалғыз көзді дәудің тасқа түсірілген бейнесін тапты. Мұның өзі, оған қоса кейін келе діни нанымға ие болып кеткен «Тас әулие» (Тарбағатай), «Қоңыр әулие» (Шыңғыс тауда), «Қазығұрт үңгірі» (Шымкент маңында), «Айдаһарлы үңгір» (Атасу бойында) сияқты қатерлі жерлерді ерте заманда жезтырнақ, дәулер мекен етеді десетін қорқынышты орындар болғанын белгілейді.
Бұл мәтіннен мынадай бір ой қорытуға болады: батыр – табиғаттан алғашқы азаттық алған тұлға. Оның жігері мен қайраты табиғи күштерден жоғары тұрады. Әрине, мәдени қаһарманның («культурный герой») теріс әлеуметтік қызметі мен деструкциялық әрекеттерін аңғарған абзал. Алайда, негізі ілкі тектен, мәдени қаһарманнан басталатын батыр бейнесі халықтың мифологиялық, генеалогиялық, тарихи жадында Құдай деңгейіне дейін көтеріле (Шоқан Уәлихановтың «әр қазақ ерлігі мен елдігі арқылы өлгеннен кейін аруаққа айнала алады» деген ойын еске алайық) алады. Мәдени қаһарман Прометей адамзатқа от сыйласа, Толағай тауды арқалап әкелді, Қабанбай, Наурызбай, Бөгенбайлар халқын геноцидтен аман алып қалды.
Батыр жаудың небір әсем шаһарларын, биік мұнаралы бекіністерін, бау-бақшалы сарайларын шауып алғанымен онда тұрақтап қалмайды, аяғында сол баяғы көшпелі тіршілікке қайтып оралады. Әскери демократиялық әлеуметтік құрылымда батырлармен қатар ерекше қызмет атқарған мәдени қаһармандарға әскербасылар, бектер мен хан-сұлтандар жатады. Ежелгі түркілік мәдениетте элитарлық тұлғалар қасиетті саналып, тернарлық әлемде оларға жоғары дүниеден орын беріледі. Мысалы, ғұндардың тәңірқұты Көктен жаралған және Күн нұрымен шапағатталған деп есептелген.
Қазіргі заманда да батырлық пен ерлікке орын бар. Мысалы, Ұлы Отан соғысының батырлары мен азаттық үшін күрескен Желтоқсан батырлары. Олардың халық үшін, ел үшін жасаған ерліктері ешқашан ұмытылмауға тиіс. Дегенмен, шын батыр болуменен өз-өзін батыр жасаудың аражігін ажыратып алғанымыз жөн секілді. Жалпы, Тәуелсіз ел болып, мықты мемлекет құру жолында бірауыздылық, руға емес, елге деген сүйіспеншілік қажет секілді.
Зиябек ЕРМҰҚАНҰЛЫ,
тарих ғылымының докторы,
Еуразия Ұлттық университетінің профессоры, Ұлттық тарихшылар конгресінің ғылыми хатшысы
Батырларға тән ұстаным
Бағзы замандардан-ақ дала халқының аты тамаша жауынгерлер ретінде әлемге танылған.
Әскери өнер оларға арғы бабалары – қыпшақтардан, түркілерден, ғұндар мен сақтардан мұра болып қалған. Өз жерлерін, халқын, малын шетелдік шапқыншылардан қалай да қорғап қалу олардың еркін, әскери-соғыс тұрмыс салтын ұстануына басты себеп болды.
Біздің заманымызға дейінгі
V ғасырдың өзінде белгілі грек оқымыстысы Геродот «Грек-парсы соғыстарының тарихы» кітабында біздің тікелей арғы бабаларымыз сақтардың аса жоғары әскери қасиеттері жайлы: «Скиф (сақ-авт) әскеріне Еуропаның халқы ғана емес, тіпті Азияда да, бірде-бір тайпа жалғыздан-жалғыз біріккен скифтерге қарсы күресе алмайды. Олар ат үстінде де, жаяу да соғыса береді – соғыстың екі түрін де меңгерген… садақпен де, найзамен де, айбалтамен де шайқасады», – деп жазған. Ол сондай-ақ, «Бізге белгілі халықтардың ішінде тек қана скифтер адам өмірі үшін ең маңызды өнерді игерген. Оның мәні мынада, олар еліне шабуыл жасаған бірде-бір жауының аман қалуына жол бермейді және ешкім оларды қуып жете алмайды… Себебі олардың тұрғын үйі – күймелер», – дейді.
Үш ғасыр өткеннен кейін басқа бір ұлы грек Дионисий Периэгит те біздің тікелей арғы тегімізге қатысты лайықты мақтау сөзден аянып қалмаған. Ол: «Согдиананың ар жағында, Яксарттың ағысы бойында, садақ оғымен жайпайтын, әлемдегі мергендердің ішіндегі ең шеберлері, бір де жебесін айдалаға атпайтын сақтар тұрады», – деп жазады. Бұл сөздер даланың ежелгі тұрғындары, біздің тікелей арғы бабаларымыз жайындағы жалған мақтау емес, басқа өркениеттер мен мәдениеттердің өкілдері, тіпті көбінесе жау болған тарап өкілінің шынайы әрі сүйсіне баға беруі.
Қазақстан тарихында елеулі із қалдырған біздің келесі бабаларымыз – ғұндар. Түркі тілдес ғұндардың асқан әскери-соғыс қасиеттерін рим оқымыстысы Аммиан Марцеллина (330-400 ж.ж. шамасы) былай деп сипаттайды: «Олардың дене мүшелері бұлшық етті, мықты, мойындары жуан… Олар тау-тасты, орманды кезіп көшіп жүреді, бесігінде жатып ыстық-суыққа, шөлге де төзуге үйренеді… Олар мінсіз жауынгерлер деп мойындауға әбден лайық, өйткені алыстан садақ атып, жақындасса жауымен қоян-қолтық айқасып, өздеріне дарытпай, жанқиярлық батырлықпен қылыштасып, атта отыруына да, жаяу кетуіне де мүмкіндік бермеу үшін жауына арқан лақтырады».
Біздің даңқты тарихымызда жеке дара тоқталатын кезең ортағасырлық түркілер дәуірі, олар да біздің арғы бабаларымыз. Арабтар олардың әскери өнеріне жоғары баға берген, мысалға, араб оқымыстысы аль-Джахиз (775-868 ж.ж.): «Түркілер жабайы аңдарды, құстарды, нысаналарды, қозғалмайтын нысандарды, орнатып қойған суреттерді, жыртқыш құстарды көздеп атады. Ол хариджит (ең батыл сарбаздар – арабтар – авт.) бір жебені садағына оқтағанша, он жебесін атып үлгереді», – деп жазған.
Қару күшінің мәңгілікке даңқын шығарған Ұлы дала қыпшақтары. Олар турасында аты әйгілі араб жылнамашысы аль-Омари: «Татарларды (моңғолдарды) олардан (қыпшақтардан) басқа ешкім жеңе алмаған», – десе, оның келесі бір жерлесі Ибн-Яхий олардың бірегей, қайталанбас әскери қасиеттерін елеулі түрде толықтырып, сипаттайды: «Қыпшақтың түркілері басқа түркілерге қарағанда өздерінің діндарлығымен, батылдығымен, шапшаң қимылымен, дене сымбатымен, бет-келбетінің келістілігімен ерекшеленеді. Мысырдың сұлтандары мен әмірлері солардан шыққан және осы империялардың әскерінің көп бөлігін құрайды».
Қазақтың кез келгені мықты жауынгер болған. Бұл жөнінде ХІХ ғасырдың ең басында Қазақстанда болған Я.Гавердовский жақсы жазған: «Қырғыздарда (қазақтарда – авт.) әскери өнер мәртебелі деп саналады, сондықтан да онымен бүкіл халық айналысады. Қаруды меңгере алған адам өзімен бірге қынында үнемі қылышын немесе пышағын алып жүруі және рубасыларының бірінші шақыртуынан-ақ жасаққа келіп қосылуы тиіс». Қысқа ғана уақыттың ішінде далалықтар саны көп және толығымен соғысқа қабілетті әскер дайындай алатын.
Жалпы, әскери жасақ әскер рухының жоғарылығымен ерекшеленді. Өздерінің жақын туыстарымен жақын жүргендіктен олар өз беттерімен ұрыс даласын тастап кету туралы ойламайтын да. Сатқындар мен қорқақтарды далалықтар ашықтан-ашық жек көретін.
Сондықтан отырықшы халықтар көшпенділерден, соның ішінде қазақтардан мықтылау дегенге келіспеймін. Отырықшы халықтардың бізден артықшылығы техникаға бейімдігінде, қару-жарақ жағынан бізден озықтау болғандығында.
Шайқастарда айрықша көзге түскен әскери жасақтардың қолбасшыларын, сондай-ақ қатардағы жауынгерлерді де қазақтар «батыр» деп атаған. Кейіннен ру арасындағы күресте, барымтада, патша үкіметіне және ортаазиялық хандықтарға қарсы күресте ерекшеленген адамдар да солай атала бастады. «Батыр» атағын тек жеке басының ерлігінің арқасында ғана алатын. XVIII ғасырда қазақ қоғамында халықтың сүйіспеншілігіне бөленген тұтастай батырлар шоғыры пайда болды. Бұл, ең алдымен, қазақ халқының жоңғар басқыншылығына қарсы күресімен байланысты. Бұлар: Бөгенбай, Қабанбай, Малайсары, Есет, Тайлақ, Жәнібек, Өтеген, Олжабай, Бәйімбет, Байболат және басқалары. XIX ғасырда қазақтардың Ресей империясы мен ортаазиялық хандықтардың экспансиясына қарсы ұлт-азаттық қозғалыстары кезінде халықтың есінде қалған батырларымыз: Наурызбай, Ағыбай, Бұхарбай, Иман, Жоламан, Есет, Сұраншы және басқалар. Ата-аналар өздерінің ұлдарына солардың атын беруге тырысқан. Айрықша ерекшеленген батырлар қасиетті Түркістан қаласында, Қожа Ахмет Иассауидің кесенесінде жерлену құқығына ие болған.
Көшпелілер арасында бес қаруы сай болу өте беделді және құрметке лайық деп саналған. Мысалы, қару асынбаған қазақты құрылтайларға кіргізбеген. Оларды дауыс беру құқығынан айырған, бұл масқараның зоры болып саналды. Белгілі қазақ зерттеушісі Көшке Кемеңгерұлының пікірінше, «қаруы бар жас, жасы үлкен қарусыз руласына тұрып орын бермеген». Жердің ұлтарақтай пұшпағын шайқаспен сақтап қалу керек болатын, дала жағдайында кімнің қолында қаруы болып, оны ептілікпен қолдана білсе, сол құрметке лайық болды.
Далалықтар төзімділік, шыдамдылық, батылдық және қайсарлық сияқты мықты қасиеттерге бай болған. Бұл туралы көптеген Ресей және шетел ғалымдары өз зерттеулерінде ерекше атап көрсеткен. Мысалға, Кіші жүздің тұрмыс-салтын жақсы білген Ф.М.Лазаревский ХІХ ғасырдың ортасында: «Қырғыздар (қазақтар) өздерімен көршілес, қатар көшіп-қонып жүрген халықтарға қарағанда анағұрлым батылырақ және ержүрек келеді», – деп сүйсіне жазған. Мұны белгілі орыс әдебиетшісі В.С.Бурнашев те растайды: «Ержүректілік олардың кішкентай қара көздерінде жалтылдап тұрады, ал дене тұрпатының мықтылығы олардың әу баста қалыптасқан күшін көрсетеді».
Жауынгерлік жағынан әйелдер қауымы да қалыспаған. Бұл жөнінде Ресейдің келесі бір өкілі Ф.Назаров: «Олардың әйелдері, дәл өздеріндей, аттың құлағында ойнайды, найзамен және айбалтамен қаруланып алып шайқасады және жауыздығы жағынан еркектерден асып түсердей», – деп жазады.
Бүкіл әлем тәуелсіз бағасына сенім артатын, жаңа замандағы белгілі ағылшын оқымыстысы Д.Флэтчер де далалықтардың батырлығына тәнті болған. Ол: «Өлімді жек көретіндіктері сонша, жауынан жеңілгеннен гөрі өлім құшуға даяр және тас-талқан болып жеңілсе, енді шайқасып, өзін құтқара алмаған күннің өзінде қаруын кеміреді!», – дейді.
Екінші дүниежүзілік соғыс жылдарында да қандастарымыз ерлік пен батырлықтың үлгісін көрсетіп, Кеңес Одағының Батыры, Даңқ орденінің толық иегері болған жауынгерлердің саны рекордтық көрсеткішке жетті. Нәзік жандылар да бұдан қалыс қалмады. Даңқты әскери дәстүрлерімізді Ауғанстан территориясында ерлік көрсеткен интернационалист-жауынгерлеріміз жалғастырды.
Жаугершілік заманда әр қазақ атқа қонып, Отанын қорғады. Шаһит болды, ерлік жасады. Ол кезде батыр болмау мүмкін емес еді. Сондықтан батырлардың тойларынан, көптеген мақалалардың шығуынан қорықпау керек. Біздің әрқайсымыздың да арғы аталарымыз жер мен ел үшін күресті.
Сондықтан оларды ұлықтау – біздің міндет және парыз. Себебі, қазір жау шапса, жас жағынан соғысқа жарайтын еркектердің жартысынан көбі «атқа» қона алмайды. Көбінің көзі көрмейді, салмағы аз немесе әскери дайындығы жоқ. Біразы үйсіз-күйсіз жүргендердің Отанды қорғайтын ниеті де жоқ. Мысалы, кеңес өкіметінің кезінде әскерге бармаған жігітті жігіт қатарына санамаған. Ол кезде он жігіттің тоғызы әскерде болса, қазір керісінше – онның тоғызы әскерге бармайды…
Әр ру өз бабасын ұлықтау арқылы ұлттың бірлігі бұзылады дегенге мен келіспеймін. Көшпенді өмір салтынан қалған қайсар мінезіміздің бізге тигізетін пайдасы зор. Мықты мемлекет құру үшін қазаққа тектілік, адалдық, бірауыздылық, сөзге беріктік секілді нағыз батырларға тән қасиеттер мен мықты ұстаным қажет.
Бетті әзірлеген Г.СЫДЫҚОВА.
ПІКІРЛЕР1