КІТАП – ҰЛТТЫҚ ҚАЗЫНА
Ұлттық кітапханада Парламент мәжілісінің көшпелі отырысы өтіп, Әлеуметтік-мәдени даму комитетінің жұмыс тобы «Қазақстан Республикасының кейбір заңнамалық актілеріне мәдениет мәселелері бойынша өзгерістер мен толықтырулар енгізу» туралы заң жобасы бойынша маңызды сұрақтарды талқылады.
Заң жобасын талқылау барысында жас ақын Олжас Қасым бейнесюжет арқылы мемлекеттік тапсырыспен жарық көрген өлеңдер жинағының екі мың таралыммен шыққанын, көлемі 5 баспа табақ кітабына 25 мың теңге қаламақы алғанын, ал автор есебінде өзіне бір ғана кітап тегін берілгенін айта келіп, Қазақстанда да өзге елдердегідей баспа агенттіктері жұмыс істесе деген тілегін білдірді.
Талқы барысында сөз алған Қазақстанның Еңбек Ері, ақын, қоғам қайраткері Олжас Сүлейменов:
«Мен әлгінде бейнесюжеттен Олжас Қасым атты жас ақынның сөзін тыңдадым. Жас Олжас жаңа заманның, тәуелсіз әдебиеттің Олжасына қарап отырып ұялдым… Біз жаңа буынды қолдай алмай отырмыз. Жас Олжастың кітабы 2000 данамен шығыпты. 5 баспа табақ өлеңдері үшін 25 000 теңге қаламақы алыпты. Өзіне 1 дана ғана кітап беріліпті. Ұят қой. Мемлекеттің қамқорлығын сезінбеген өнер – өгей бала сияқты өмір сүреді. Мен өзім атақты ақын атансам да, соңғы 25 жылда шыққан кітаптарым үшін 1 теңге де қаламақы алмаппын. Мінеки, мемлекет менің кәсіби шығармашылығымның лайықты бағасын бермеген сияқты болып көрінеді. Иә, маған басқа қызметім үшін ақша төлейді және аз емес. Бірақ мен ақындық еңбегімнің жемісі – өлең жинақтарым үшін лайықты қаламақы алуға тиістімін ғой», – деді.
Олжас Сүлейменов қаламақы мәселесінде өзі елшілік қызмет атқарған Италиядағы парламент тәжірибесін қолдануды ұсынып: «Италияда 1998 жылы барлық жекеменшік банктер өздерінің жылдық табыстарының бір бөлігін Мәдениет министрлігіне және тәуелсіз қоғамдық мәдени ұйымдарға аударатыны туралы «Чампи заңы» шықты. Бұл қаржы әдебиетті, классикалық әдебиетті қолдауға жұмсалады. Мен мәжілістегілер осы заңды зерттесе, тым болмағанда жеке тармақтарын қолдануды енгізсе деп ойлаймын. Банктердің табыстары баршылық, соның аз ғана бөлігін құрбандық ету оларды тұралатып тастамайды», – деді.
Ақын ұсынысына қатысты Парламент мәжілісі төрағасының орынбасары Гүлмира Исимбаева: «Егер жазушының кітабының қоғамдық маңызының жоғары екені анықталса, оны мемлекет сатып алып, шығарма авторына қаламақы төлейтін болады. Үкіметтің жасаған жобасы бойынша қаламақы әр баспатабақ шығармаға кем дегенде 150 мың теңгеден төленбек», – деп жауап берді.
Осы мақсатта қазынадан 1,5 млрд. теңге қаржы бөлінбек. Егер жоба мақұлданса, қаламақы көбейіп, ақын-жазушылар азапты еңбектеріне лайық қаламақы алмақ. Сонымен қатар, мемлекеттік тапсырыспен шығатын кітаптардың таралымын көбейту мәселесі де кеңінен сөз болды. Депутаттардың айтуынша, қаламақыға бөлінетін қаржы алдағы 3 жылдық бюджет жоспарына енгізілмегендіктен, жыл соңына дейін заңды қабылдап, қаржы көлемін бекітуге ықпал ету қажет екен.
ҚР Жазушылар одағының Төрағасы Нұрлан Оразалин: «Бұл жоба – тілді, әдебиетті қорғау. Біздің рухани әлемімізге мемлекет тарапынан жасалатын үлкен қамқорлық деп бағалауымыз керек. Заңның ең басты жетістігі де осы. Жазған шығармасына лайық қаламақы төлеу мәселесі оң шешіле бастаса, біздің рухани кеңістігімізде қазіргі оқырман талғамына сай, тың, үлкен туындылар дүниеге келеді-ау деп ойлаймын», – деді.
Сондай-ақ, құжатта қоғамдық маңызы бар шығармаларды басып шығарып, тарату және оқырманға жеткізу, театр, кітапхана сияқты мәдени ұйымдардың жағдайын жақсарту жайы да сөз болды.
Қарагөз СЕРІКҚЫЗЫ.