ЭКОЛОГИЯЛЫҚ БЕЙІМДЕЛУДІҢ ҰЛТТЫҚ ЕРЕКШЕЛІГІ
Қазақ халқының мыңдаған жылдар бойы тірнектеп жинаған өмірлік тәжірибесі мен табиғат құбылыстарын терең білуінің арқасында қазақи экологиялық мәдениет қалыптасқан еді. Бабаларымыз талмай ұдайы қайталап отыратын ырым-тыйымдар, мақал-мәтелдер арқылы осы дәстүр ұрпақтан-ұрпаққа жетті. «Атадан мал қалғанша тал қалсын», «Бұлақ көрсең, көзін аш», «Ағаш тамырымен мықты, адам дос-жарымен мықты», «Гүл өссе – жердің көркі, қыз өссе – елдің көркі» деген секілді сөздер халықтың табиғатқа деген шынайы ықыласынан туса керек. Бүгінде осы қасиеттерден ажырап, қоршаған ортаға деген ұлттық болмысымызды жоғалтқандаймыз. «Адамзаттың табиғатсыз күні жоқ, табиғаттың оны айтуға тілі жоқ» дегеннің түп-төркінінің өзі де осыны меңзейтіндей. Біз осы орайда бабалар қалыптастырған қазақи экологиялық мәдениетті қаншалықты сақтап қалдық? Қазір қазақтың экологиялық мәдениеті қай шамада? – деген сауалдарға мамандардың не дейтініне көз жүгіртіп көрейік…
Күләш ДҮЙСЕНБАЙҚЫЗЫ,
география ғылымының докторы, профессор,
Абай атындағы ҚазҰПУ
Жаратылыстану және география институтының директоры
ҚАЗАҚ ХАЛҚЫНЫҢ ТАБИҒАТТЫ ҚОРҒАУ ДӘСТҮРІ
Қазақ халқының «малшылық мәдениеті» деп аталған дәстүрлі шаруашылық-мәдени жүйесінде төрт түлік малға ежелден-ақ айрықша көзқарас қалыптасқан. Мысалы, қазақтардың амандасу дәстүріндегі «мал-жанның амандығын» сұрауда малға байланысты мәселелер «жан» категориясына қатыстылардан, яғни адамдардың өзінен де маңызды болып көрінеді. Бұл орайда «малшылық мәдениеттің» басты ерекшелігі ретінде қазақ қоғамының тіршілік ету болмысы «мал амандығымен» тікелей байланысты болғандығын атап өткіміз келеді. Табиғи орта жағдайларының анықтаушы орнын ескерсек, «мал амандығы» осы ортадағы экологиялық тепе-теңдіктен туындайтындығын түсіну қиын емес. Қазақ халқының «жан амандығы» мал амандығымен, ал ол өз кезегінде, табиғи орта амандығымен ұштастырылады.
Экологиялық тәжірибе қоршаған ортаның табиғат жағдайларын танып, ресурстық мүмкіншіліктерін игеру мақсатында ғасырлар бойы жинақталған эмпиристік білім қорын құрайды. Осы тұрғыдан алғанда, шаруашылықтық-мәдени дәстүрлердің экологиялық шарттастығын қазақ халқының экологиялық бейімделуі (адаптация) мен дәстүрлі мәдениеттегі кеңістік пен уақыт ұғымдарын түсінуге байланысты мәселелер тұрғысында қарастыруға болады. Бұл тақырып төңірегіндегі қамтылатын мәселелер қазақ халқы мәдениетінің қалыптасуындағы табиғи ортаның субстраттық маңызын айқындауға бағытталады. Қазақ халқының дәстүрлі мал шаруашылығын саралау барысында оның дәстүрлі қазақ қоғамы үшін адаптацияның барынша жетілген формасы болғандығын айтуға болады, себебі, ол неғұрлым тұрақты экономикалық өнімділікке қол жеткізді.
Көшпенділікті аридтік жағдайларға бейімделудің бір түрі ретінде ғана қабылдау жаңсақтық болар еді. Өйткені, экожүйелердегі қатал табиғат жағдайларында шаруашылықтың бұл түрін өнімді етіп ұйымдастыру үшін экологиялық тәжірибе де қажет болды. Олай болса, халықтың табиғи ортаға бейімделу үшін қажет ақпарлар жиынтығы ұзақ жылдар бойына жиналып, ұрпақтарына беріліп, кеңістік пен уақыт талқысына түсті. Мысалы, көшпенді мал шаруашылығының дамуына алғышарт ролін аңшылық кәсіп атқарған. Аң аулау барысында жабайы аңдардың қоныс аударған аумақтарын көру арқылы адамдар шөлдердің табиғи-климаттық ерекшеліктерін танып, болашақтағы көшпелі мал шаруашылығына қажетті экологиялық бейімделудің тәжірибесін жинақтай бастады.
Көшпелі қазақ қоғамының қуаңшылық жағдайға бейімделуінің тағы бір дәлелі табиғатты пайдалану механизмінен көрінеді. Зерттеушілердің пайымдауынша, өндірістік процесс пен тіршілік келбетінің шашыраңқы (дисперстік) құрылымы ерекше экожүйелердің нәзік құрылымын сақтауға бағытталған қадам болды. Мұның мәні табиғи жайылымдарды пайдаланудың маусымдық сипатынан, көшу маршруттарының нақтылы заңдылықтарға бағындырылуынан, көшпенді шаруашылықтардағы мал санының шектеулілігінен айқын ашылады. Мысалы, қой отарындағы мал саны 600-ден аспауы қажет болды. Бұл, өз кезегінде, табиғи жайылымдарды тозудан сақтады. Жайылымдардың мүмкіншіліктері ерекше атаулар арқылы сипатталынды: жылқылар жүріп өткен жайылымды қазақтар «алатебін» деп атаса, мал толық жайылған жерлерді «ақтебін» деген. Табиғи жайылымдарды пайдалану барысында қорғалатын жайылым түрлері де ерекшеленген.
Қыстау маңындағы шөбі шүйгін жерлерді ауыл болып қорғаған, сондықтан мұндай жерлер «қорықтар» деп аталған. Қорықтар әлсіз малдар үшін пайдаланылған. Қорықтардың өсімдік жамылғысы шабындық ретінде де пайдаланылған. Жайылымдық қорлардың қатарына қой үшін ғана пайдаланылған «қой бөлік» немесе «келте-қыстау», қыстық қой жайылымы ретінде пайдаланылатын «қойтебін» де жатқызылған. Жайылымдардың мал түріне байланысты жіктеліп пайдаланылуы қазақ халқының төрт түлік малдың биологиялық қажеттерін, өсімдік жамылғысының азықтық мүмкіншіліктерін жете білгендігінен хабар береді.
Көшу барысы ру басылары, сұлтандардың қатысуымен реттеліп отырған. Олар көшу мерзімі мен маршруттары туралы нұсқаулар берген. Көшу жүйесінің реттелген сипаты жайылымдарды шамадан тыс тоздыруға, сөйтіп малдың шығындануына жол бермеген.
Қазақ халқының мекен ортасына бейімделуі барысында шаруашылықтық-мәдени қатынастарда әр түрлі өзгерістер жүрді, бұл экологиялық тәжірибені байытты. Мұның барлығы мәдениетте өз ізін қалдыруы тиіс еді, өйткені мәдениет адам қоғамының адаптациялық тетігі болып табылады.
Көшпелі мал шаруашылығының жетекшілік мәнін анықтауда табиғи факторлардың орны ерекше болғандықтан, кейінгі индустриялық қоғам жағдайында ауыл шаруашылығының басқа салаларын енгізудің өзі Қазақстанның аридтік (арид – климаты ыстық және құрғақ болып келетін жердің топырағы) экожүйелерінің деградациясына әкеп соқты. Экожүйелерге шамадан тыс жүктеме түсіру салдарынан ғасырлар бойы табиғи мал жайылымы болған аудандар өзін-өзі реттеу қабілетінен айырылды. Осы тұрғыдан жыртқан жерді 15-20 жылдан кейін ғана пайдаланған немесе мүлде тастап кеткен қазақ халқы табиғи жайылымдарды қалпына келтіру мақсатын көздегенін айта кеткен жөн. Кейбір мәліметтер бойынша, қазақтар ебелек өсе бастаған жерді ғана өңдеуге болады деп есептеген. Бұл халықтың экологиялық мәдениетінің жоғары деңгейінен және мекен ортасының табиғи ерекшеліктерін жете білгендігінен хабар береді.
Қазақ халқының экологиялық мәдениетінің жоғары дәрежеде болғандығын айғақтайтын тарихи деректер жеткілікті. Тарихшы Д.Кішібеков ағаш жеткілікті аймақтардың өзінде көшпенді қазақтың отын ретінде тезекті пайдалануын ағаш қорын сақтауға тырысушылықпен түсіндіреді. ХІХ ғасырдың ортасында қазақ жерін аралаған орыс зоологы Н.Северцов ғасырлар бойы қазақтар қызғыштай қорыған Іле Алатауындағы, Наурызымдағы, Аманқарағайдағы орман қорын қоныс аударып келген казактар мен орыстардың аяусыз құртып жатқаны туралы мәліметтер келтіреді.
Қазақстанның далалық бөлігінде жергілікті халық ежелден орманды алқаптарды, тоғай шоқтары мен бұталарды, тіпті жеке ағаштарды әр түрлі сылтаумен тиісуге болмайтын қасиетті объектілер ретінде жариялап, қорғауға алған. Сондай-ақ, қазақтардың ежелгі аң аулау дәстүрінде жабайы аңдар тобының ең соңғысын әдейі атпай, оны еркіне жіберу әдеті кездеседі. Бұл айтылғандар қазақ халқының табиғатты қорғау дәстүрінің табиғатты тану, оның қорларын шаруашылық мақсатта пайдалану барысында қалыптасқандығын дәлелдей түседі.
Тұрсынгүл БАЗАРБАЕВА,
география ғылымының кандидаты,
Юнеско бойынша тұрақты даму кафедрасының
доцент міндетін атқарушы
ТАБИҒАТ – СҰЛУЛЫҚ ПЕН ӘСЕМДІК ӘЛЕМІ
«Атаңнан мал қалғанша, тал қалсын», «Ағаш жапырағымен, Жер топырағымен сәнді», «Құс қонбаған көл жетім, тыңдалмаған сөз жетім», «Ай шалқасынан туса, ай бойы аяз болады», «Бұлт қайда қонса, береке сонда келер», «Бір тал кессең, он тал ек», «Жерді босқа шұқыма, ағашты сындырма», т.б. мақал-мәтелдерді қазақ тегін айтпаған. Осы сөздердің мәнін аңғарсақ, астарында табиғатты қорғау, яғни Отанды қорғау деген терең ұғым жатыр. Қазақтар – тумысынан табиғатты сүйіп өскен, қоршаған ортаға үлкен ілтипатпен қараған халық. Халқымыз көшпенді өмір сүріп, көбіне мал шаруашылығымен айналысқандықтан жайылымдар мен су қорларын, тиімді пайдалану негіздерін жақсы білген. Дала халқының назарынан ешбір табиғат құбылысы тыс қалмаған.
Малшылар әр маусым сайын қоныс аудару арқылы табиғаттың өз қалпына келіп, құнарлығын арттыруына мүмкіндік жасаған. Ал қой мен ешкінің санын белгілі бір дәрежеде ұстауы, олардың майда тұяқтары топырақты өте қатты езгілеп, шаң тозаңды көтеріп, топырақ микрофлорасын жойып жіберетініне байланысты болған. Шөлді өңірде жер асты суларын іздеп табуға құмырсқаның да көп көмегі тиетіндігін білген. Өйткені бұл жәндіктер ылғалды жерді ғана мекендейді. Аң мен құстарға қарап ауа-райын да болжаған. Мысалы, қарлығаш аспанда самғап ұшса – ауа райының ашық, ал төмендеп ұшса – жауын болатыны халық арасында кең тараған. Шағала – теңізшілердің сенімді достарының бірі. Себебі, теңізшілердің ашық теңізге шығарда, шағалалардың мінез-құлқына қарап отырып, ауа-райының өзгерістерін алдын-ала болжаулары дәл келіп отырған. Қазақтар аққуды қадірлеп, киелі құс деп таныған. Аспаннан бір керемет ақша бұлт көрсе «аққудың қанатындай қалықтаған» деп жырлаған. Аққудың қанат қаққаны, тазалығы, сабырлы қимылы – оның тек сыртқы көрінісі. Байқағыш халық оның психологиялық күйін, жан сезімін түсіне білген. Оны кез келген шалшық көлде кездесе бермейтін аса талғампаз, тәкаппар құс деп қастерлейді. «Құс падишасы» деп те атайды, тазалық пен сұлулықтың символы деп біледі. Серігі мерт болған жерде өз жанын құрбан ететін оның ұлы қасиеті халық көңіліне ұнаған. Осы мысалда біз адамның жан тазалығы, яғни адам экологиясы да басты рольде екенін көреміз.
Мысалы, бүркіттің қаңтардың қақаған аязында жұмыртқасын тасқа салып шайқауы, қайраты қайтып қартайғанда жасық өмірге төзбей шарықтап, шырқап барып, өзін-өзі тасқа тастап мерт қылуы да бір ерекше қасиет. Денесі ықшам қаршыға аспанда қалықтап ұшып жүріп жерден азығын көрсе болды, оқша зу етіп төмен қарай зымырай жөнеледі. Аңшылардың халқымыздың батыр азаматтарын қаршығаға теңеуі де сондықтан болар.
Әл-Фараби бабамыз «Табиғатта барлығы математикалық дәлдікпен орналасқан, егер орнынан біреуі жылжыса, онда тепе-теңдік бұзылады» деген. Табиғатта бос немесе артық ешнәрсе жоқ. Барлығы бір-бірі үшін қажет, бір-бірінсіз тіршілік жоқ, бірі екіншісін толықтырып отырады, үнемі өзгерісте болады. Бұл – диалектиканың айнымас заңы!
Ал енді осыншама салт-дәстүрмен, тәрбиемен ұрпағына отбасында экологиялық тәрбие беріп келген халқымыздың бүгінгі жағдайы мәз емес. Адамдардың қанмен келген қасиетті жоғалтып, сан түрлі экологиялық мәселелер ішінде отырмыз. Өркениетке бастау берген қоңыр экономиканың қағидалары бүгінгі күнде жасыл экономикаға күрт бет бұруда. Бірақ біздің санамыздың экологиялық ойлау қабілетінен соншалықты алшақтап кеткендігін айналамыздағы қоршаған ортадан көруге болады.
Жапония елінде бала-бақшадан бастап, тіпті үйде жұмыссыз отырған адамдарға да экологиялық білім беру қарастырылған. Оларға күнделікті тұрмыста қолданатын химикаттардың зиянын айта келіп, оларды қалай, қай жерлерде утилизация жасау керектігі түсіндіреді. Сондықтан да болар, сол елдің экологиясы мен мәдениеті бүкіл әлемді танқалдырып отыр.
Біздің елде экологиялық мәдениетті, құндылықтарды, табиғатқа, адамдарға деген саналы көзқарасты қалыптастыру үшін адамдар өзін-өзі басқару қабілетін арттырғаны жөн. Ол үшін өзіміздің салт-дәстүрмен бірге қалыптасқан экологиялық мәдениетті, яғни қазақи тәрбиені қолға алу керек.
Табиғат – адам бойына қуат, көңіліне шабыт, сезіміне ләззат сыйлайтын сұлулық пен әсемдік әлемі. Ендеше, барымызды бағалайық!
Гүлім НҰРЛАНҚЫЗЫ.
ПІКІРЛЕР1