ӘКЕ АМАНАТЫ
Менің әкем – Қазақстанның халық ақыны Әбдіғали Сариев 1900 жылы Алматы облысы, Жамбыл ауданы, Қарақыстақ ауылында дүниеге келді. Әкесі Сары 1917 жылы, шешесі Салиха 1922 жылы қайтыс болады. Бабам Нұрымбет Текестегі ұйғырлардан бір тақия тары әкеліп, Қарақыстақ өзенінің суын бұрып, осы жерге еккен екен… Өзеннің бекітілген жері Бұрған аталыпты.
Әкем Кеңес дәуіріне дейін осы өңірге аты әйгілі Шалтабай байдың малын бағып, ептеп егін салып күн көріпті. 1919 жылы ескіше, кейін латынша хат танып, мойынсеріктің, артельдің есепшісі, жергілікті советтің хатшысы болады. Жаппай коллективтендіру кезінде құрылған «Бұрған» колхозына елді ұйымдастыруға атсалысады. «Тілші», «Социалистік Қазақстан» газеттерінің штаттан тыс тілшісі бола жүріп, 1934 жылы СССР Жазушылар одағының мүшелігіне өтеді. Ауданда қолына тиген әр түрлі қызметтерді атқара жүріп, 64 жасында дүние салды.
Әкемнің жастық шағында жазған жырлары көп сақталмаған. Әкесі дүниеден өткен соң тұрмыстан таршылық көріп, рухы жүдеп, сарыуайымға салынғанға ұқсайды. Оны былай деп жырға қосады:
Жарлылық сені қайтейін,
Жандай досты жат еттің, –
немесе:
Дертімнің ойын таба алмай,
Арпалыстым уменен.
Жүзім жатыр жуылып,
Көзден аққан суменен…
Ақынның махаббат тақырыбында да оншақты жыры сақталған. Жыр кейіпкерлерінің аты белгісіз. Алайда, тереңнен тартқан ақынның ішкі сыры менмұндалап тұрады және шынайы сезімі аңғарылады.
Сағындым, сарғайдым,
Сен үшін күйемін.
Сырым сол, сондаймын,
Өзіңді сүйемін.
Шөлімнен қанбаймын,
Жалғансыз бүйерім.
Әкем халқымыздың көшпенділік тұрмыс дәстүрінде дүниеге келді. Ат жалын тартып мінген шақта жер жүзін бұлттай қаптап Кеңес үкіметі келді. Оның көз алдында жаңа тұрмыс орнап, жарлы байға теңелді, халықтың жаппай сауаты ашылды, электр жарығы келді, сәнді қалашықтар бой түзеді, кең далада егіс алқаптары жайқалды – қысқасы, мүлде жаңа сападағы қоғам құрылды. Ол осы екі заманды салыстыра жырлады және кеңестік құндылықтарға жан-тәнімен берілді. Шынында да қыспақта өмір сүрген сауатсыз халық үшін әсіресе қарапайым еңбек адамдары үшін Кеңес дәуірімен бірге көптеген жақсылықтар көктен түскендей болды. Осы өзгерістер ақынды қанаттандырды.
Талмай шауып келемін,
Тайым атпен жарысып,
Қалмай шауып келемін…
Мен жүйрікпін дегенді,
Ерегіссем алдыма,
Салмай шауып келемін, – дейді. Бұл кәдімгі Жетісудың дәстүрлі поэзиясы, жастайынан Сүйінбай, Жамбыл, Өмірзақ, ағасы Үмбетәлі ақындарды жаттап өскен ақын сөзі.
Отан соғысы жылдары елде қалған ақын-жазушылардың бәрі қолындағы қаламын қару ретінде жұмсады. Кезінде кеңестік идеология тыйым салған батырлар жыры жариялана бастады. «Бәрі де майдан үшін!» деген ұран салынды. Әбекең сол ұранның бел ортасынан табылды. Бұл тақырыпта да мол мұра қалдырды.
Ақ семсері жарқылдап,
Сермеді ерлер үйіріп.
Құлаған таудан қорымдай,
Өлігі жаудың үйіліп.
Қаршыға қуған шылдайын,
Желкесінен қиылып.
Үріккен қойдай жосылып,
Бір қайырылмай бұрылып.
Кеңес үкіметінің қабырғасы қатайып, бұғанасы бекіген кезде Ғылым академиясының Әдебиет және өнер институты Әбдіғали секілді адамдарды іздейді. Себебі, халықтың тарихи сөзі солардың жадында еді. Әкем академияның мамандарынан жиі-жиі хат алатын болды. Солардың сұрауы бойынша халық арасына кең тараған әдеби нұсқаларды, ауыз әдебиетінің үлгілерін, жеке ақындардың әдеби мұраларын жинап, алдымен араб әрпімен қағазға түсіріп, маған кирилше көшіртумен болды. Солардың бәрі де қазір М.О.Әуезов атындағы Әдебиет және өнер институтының архивінде сақтаулы тұр. Сүйінбай ақыннан жинастырған мол мұра кезінде Сұлтанғали Садырбаевтың қолына тиді…
Сталиндік зорлық-зомбылық, ат құлағын жеген аштық бәсеңдеп, соғыс аяқталып, елдің бүйірі шығып, тұрмыс түзеле бастады. Түрлене бастаған ел тұрмысымен бірге науқаншылдық әдебиеттің де арыны басылып, кәсіби ақын-жазушылардың жаңа легі шығып, сөз заманға сай түзеле бастаған шақта Әбдіғали да жұртпен бірге өз сөзін айтады. «Жаз» деген өлеңінің ықшамдалған нұсқасына назар салып көрелік:
Көсілген таудың сеңгірі,
Жібектен шұлғау шұлғанып…
Әскерін түзеп құмырсқа,
Азық тасып шұбалып.
Бидайдың дәні төгіліп,
Қылыштай қыннан шығарып.
Отыз тісін қайраған,
Машиналар тұр барып.
Қалқан құлақ құлқайыр,
Шатырын жайып қырланып.
Бөртіп, бөртіп бүлдірген,
Пісетін күнін тұр бағып.
Басын жарып ақбұлақ,
Тасып аққан арнадан.
Батыр тәует жол түзеп,
Жыланның жолын байлаған.
Ақын жаздың келбетіне өзінше ой түйіп, поэзия тілімен жырлайды. Осы бір жолдардан өлең деген құдіреттің қай заманда да өзінің құндылығын жоймайтындығын аңғарамыз.
1956 жылдың жазында белгілі ғалым Есмағамбет Ысмайылов бастаған бір топ ақын-жазушылар ел аралап жүріп біздің ауылға келді. Сол жолы Есағаң мен әкем екеуі колхоздан ат алдырып, жайлауға шықты. Таза ауада, салқын самалда, гүлдері жайнаған көк майсада бір айдай болып, қымыз ішіп, тынығып қайтты.
Екі жағы көк майса,
Қарақыстақ арнасы.
Қырғыздың қарлы тауына,
Айқасқан барып жалғасы.
Аяз ата секілді,
Көрініп әппақ қар басы.
Желекті найза көтерген,
Батырдай тұрған нар басы.
Қарақия, Майтөбе,
Бөлекше біткен тұлғасы.
Кілемдей шыққан шөбінен,
Жер ызғары өтпейді,
Сүйсінер адам жамбасы.
Әбдіғали Сариев шығармашылығы – туған жердің тарихы, ел тұрмысы, өзгерген өңір, коммунистік партия мен оның көсемдері. Ақын ел ішіндегі жақсылықты жария етіп, келеңсіздіктерді өткір сынға алады. Оның сатиралық сарындағы жырлары өте көп. Мәселен, иесі қалжырата мініп, әбден болдырған аттың зары ретінде жазылған «Көк бесті» атты мына бір мысал жырға назар аударалық:
Менің атым көк бесті,
Көк бесті бейнет көп кешті.
Сырымды айтсам ағайын,
Көкбестіні сөкпес-ті.
Сембай мінген кезінде,
Деуші еді жылқы жетпес-ті.
Қалдырып ем шаңыма,
Талай жылқы беттесті.
И болып қазір жамбасым,
Сабаса қамшы өтпес-ті.
Оған себеп не десең,
Тұяқ тозып, өкпе өшті.
Жұмаш батыр мінгелі,
Менімен талай шектесті.
Басқармадан алғанда,
«Бағам, – деп, – жақсы» реттесті.
Ақын қай жанрда қалам тербесе де поэзияның көркем сұлу табиғатынан айнымайды. Ол ауылда өсіп, өз еркімен хат таныды. Анда-санда бір ұйымдастырылатын айтыстарға барып тұрды. Ауылда, ағайын-туыстың арасында жүріп, алпыс төрт жыл ғұмырында соңына ұшан-теңіз жыр қалдырды.
Оның «Асу» дастаны Алатауға орыстың аяғы жеткен кезең мен Қоқанның қыспағы, қырғыз бен арадағы алауыздық – бәрі шынайы суреттеледі. Бұл дастанда Сұраншы, Саурық батырлардың ерлігін паш етеді. Көлемді дастаннан кезінде үзінділер жарияланған. Шығарманың құндылығы туралы пікір жоқтың қасы.
1916 жылғы Ұлт-азаттық көтерілісті баяндайтын «Алатау майданы» дастанының да орны бөлек. Бұл дастан да өзінің жарық көрер күнін күтіп сарыжамбас болып жатыр. Ұлы Отан соғысы тақырыбына жазылған «Партизан Ғалым» поэмасының да кезінде жұқанасы ғана жарияланған екен. Қолымызда дастанның екі нұсқасы жатыр. Ақын майдан даласын көзімен көргендей шынайы жазады. Сонымен қатар, осы тақырыптағы «Кекілбай батыр» поэмасы халық поэзиясы, батырлар жырының дәстүрлі стилінде жазылған.
Толып жатқан жыр-толғаулардың негізгі тақырыбы – өз кезіндегі ел тұрмысы, тарих және шығыс аңыздары, ұстазы Жамбыл. Ақын елімен бірге күн кеше отырып, Қарақыстақ, Жамбыл ауылында болып жатқан тіршілікті сондай бір махаббат сезімімен жырлайды. Ауылдың көрінісі, арықтарда сылдырлап ағып жатқан су, жеміс ағаштары, егістік, шалғын шөпті шерткен шегіртке, Алатаудың мұнар басы, етегінде жайылған мал – барлығы сөйлеп тұр. Туған жерге деген ақындық сезім осындай болса керек. Осы байлықтың барлығы өз кезінде сыншылардың назарына ілікпеген. Себебі, жарияланбаған. Жарияланбаған дүние, әрине, бағасын ала алмайды.
Айтыстары өз алдында бір төбе. Сәндібаламен (ақын Әнуарбек Дүйсембиевтің анасы), Болман ақынмен, Кененмен айтыстары сақталған екен. Осы үш қарсыластан да Әбдіғалидың шоқтығы биік болып жеңіске жетеді. Бұл, әрине, ақындық қуат дер едім.
Кеңес дәуірінде әр жылдары кабинеттердің есігін тоздыра жүріп бірнеше жыр жинақтарын жарияладым. Бірақ мұның бәрі әкемнің соңында қалған мол мұраны қамти алмады. Қазақша айтқанда, «Құлағын кесіп құнтитып, құйрығын кесіп шұнтитып» дегендей көлемі шағын, сапасы айтарлықтай болмады.
Соңғы бір жарым жылда әдебиет зерттеушісі, ақын інім Нұрлан Әбдібеков екеуміз әкемнен қалған архивті аштық. Араб, латын тілдеріндегі қолжазбалар түгел оқылып, сараланып, әрқайсысы 23 баспа табақ үш томға топтастырылды. Қазір алғысөз, ғылыми түсініктер жазылу үстінде. Бұл еңбек М.Әуезов атындағы Әдебиет және өнер институтының назарында. Қаржы табылып жатса, осы үш томдық толық шығармалар жинағы жарық көреді деген үміттемін. Себебі, халық ақындарын да келешекпен жүздестіретін уақыт жетті.
Шайымхан ӘБДІҒАЛИҚЫЗЫ,
зейнеткер.